ବାଲେଶ୍ବର : ଚଳିତ ଶିକ୍ଷା ବର୍ଷର ଯୁକ୍ତଦୁଇ ବିଜ୍ଞାନ ଓ ବାଣିଜ୍ୟ ପରୀକ୍ଷା ଫଳ ବୁଧବାର ପ୍ରକାଶ ପାଇଛି । ଏଥର ମଧ୍ୟ ଛାତ୍ରଙ୍କ ଠାରୁ ଆଗରେ ରହିଛନ୍ତି ଛାତ୍ରୀ । ଚଳିତ ଥର ଯୁକ୍ତଦୁଇ ବିଜ୍ଞାନ ପରୀକ୍ଷା ଫଳ ପ୍ରକାଶ ପରେ ପ୍ରାୟତଃ ବିଭିନ୍ନ କଲେଜରେ ପାସହାର ଅଧିକ ରହିଛି । ବିଶେଷ କରି ବିଭିନ୍ନ ଘରୋଇ ଶିକ୍ଷା ଅନୁଷ୍ଠାନ ଗୁଡିକରେ ଛାତ୍ରଛାତ୍ରୀମାନେ ପରୀକ୍ଷାରେ ଭଲ ନମ୍ବର ରଖି ପାସ କରିଛନ୍ତି । ଏହି କ୍ରମରେ ବାଲେଶ୍ଵରର ଏକ ଘରୋଇ କଲେଜରେ ପ୍ରଥମ ସ୍ଥାନରେ ଶତ ପ୍ରତିଶତ ଛାତ୍ରଛାତ୍ରୀ ପାସ କରିଥିବା ବେଳେ ଜଣେ ଆଦିବାସୀ ଛାତ୍ର ହିମାଂଶୁ କୁମାର ସିଂ ୯୪ ପ୍ରତିଶତ ନମ୍ବର ରଖିଛନ୍ତି। ଯାହାକୁ ନେଇ କଲେଜ ଓ ଛାତ୍ରଛାତ୍ରୀଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଛି । ଭବିଷ୍ୟତରେ ସେ ଜଣେ ଭଲ ଡାକ୍ତର ହେବେ ବୋଲି ଆଶା ରଖିଛନ୍ତି ।
ତେବେ ଏହି କଲେଜର ମୋଟ 105 ଜଣ ଛାତ୍ରଛାତ୍ରୀ ଚଳିତ ବର୍ଷ ଯୁକ୍ତ ଦୁଇ ବିଜ୍ଞାନ ପରୀକ୍ଷା ଦେଇଥିଲେ । ସମସ୍ତ ଛାତ୍ରଛାତ୍ରୀ ପ୍ରଥମ ସ୍ଥାନ ଅଧିକାର କରି ପାସ କରିଛନ୍ତି । ଏମାନଙ୍କ ମଧ୍ୟରେ ଜଣେ ଆଦିବାସୀ ଛାତ୍ର ହିମାଂଶୁ କୁମାର ସିଂ ସର୍ବାଧିକ ୯୪ ପ୍ରତିଶତ ନମ୍ବର ରଖିଛନ୍ତି । ଏହି ଅବସରରେ କଲେଜରେ ଏକ ବିଶେଷ କାର୍ଯ୍ୟକ୍ରମ ଆୟୋଜନ କରାଯାଇ ହିମାଂଶୁଙ୍କ ଏ ସଫଳତା ପାଇଁ ତାଙ୍କୁ ସମ୍ବର୍ଦ୍ଧିତ କରାଯାଇଛି ।