ବାଲେଶ୍ବର: ଓମଫେଡ ଏମ୍ପ୍ଲଇଜ ୟୁନିଅନ ବାଲେଶ୍ଵର ଶାଖା ପକ୍ଷରୁ କର୍ମଚାରୀଙ୍କ ବିଭିନ୍ନ ଦାବି ନେଇ ଦିଆଯାଇଥିବା ଧାରଣା ୯ ଦିନରେ ପହଞ୍ଚିଛି । ରେମୁଣା ସ୍ଥିତ ଓମଫେଡ ବାଲେଶ୍ବର ଡେରୀ କାର୍ଯ୍ୟାଳୟ ସମ୍ମୁଖରେ କଳାବ୍ୟାଚ ପିନ୍ଧି କର୍ମଚାରୀମାନେ ପ୍ରତିବାଦ କରିଛନ୍ତି ।
ଜୁଲାଇ 25 ତାରିଖରୁ ଏହି ପ୍ରତିବାଦ ଆରମ୍ଭ ହୋଇଛି । 21ଟି ଦାବି ସମୂହକୁ ନେଇ କର୍ମଚାରୀମାନେ ଧାରଣାରେ ବସିଥିବା ବେଳେ 3 ତାରିଖରେ ସେମାନଙ୍କ ସହ ଆଲୋଚନା କରିବା ପାଇଁ ମ୍ୟାନେଜମେଣ୍ଟ ସ୍ଥିର କରିଥିବା ଜଣାପଡ଼ିଛି। କର୍ମଚାରୀଙ୍କ ଦାବି ଅନୁସାରେ, ସପ୍ତମ ବେତନ କମିଶନ ଲାଗୁ ହେବାପରେ ବକେୟା ଅର୍ଥ ତୁରନ୍ତ ପ୍ରଦାନ କରିବା, ଠିକା କର୍ମଚାରୀଙ୍କ ପାଇଁ ଉପଯୁକ୍ତ ଦରମା ଲାଗୁ କରିବା, ବଦଳି ନିୟମରେ ସଠିକ ଭାବେ ନିଷ୍ପତ୍ତି ନେବା ସହ ନୂତନ ନିଯୁକ୍ତିରେ ସ୍ବଚ୍ଛତା ରଖିବା ଭଳି ଦାବି ଉପସ୍ଥାପନ କରାଯାଇଛି ।
ଇଟିଭି ଭାରତ, ବାଲେଶ୍ବର