ବାଲେଶ୍ଵର: ବେଦ କହେ ‘ପିତା ଧର୍ମ ପିତା ସ୍ବର୍ଗ ପିତାହିଁ ପରମ ତପ, ପିତରି ପ୍ରତିମାପନ୍ନେ ପ୍ରିୟନ୍ତେ ସର୍ବ ଦେବତାଃ’ l ହେଲେ ଆମ ତଥାକଥିତ ସଭ୍ୟ ସମାଜରେ ଆଜି ପିତାର ଅବସ୍ଥା କେତେ ଶୋଚନୀୟ, ତାହାର ବସ୍ତବ ଚିତ୍ର ଦେଖିଲେ ଆପଣ ମଧ୍ୟ ବିଶ୍ବାସ କରିପାରିବେ ନାହିଁ । ବାଲେଶ୍ବର ଖଇରା ବ୍ଲକ ଖାଡିଗୋଛି ଗ୍ରାମର ଶ୍ରୀଧର ମଲ୍ଲିକ । ବୟସ ୮୦ ଛୁଇଁଲାଣି, ଚାଲିବାକୁ ଅଣ୍ଟାରେ ବଳ ନଥିବାରୁ ପାଦ ଥରହର ହେଉଛି । ପରିଣତ ବୟସରେ ସାହାରା କହିଲେ ଏକ ମାତ୍ର ବାଡି ଖଣ୍ଡେ । ରହିବା ପାଇଁ ପାଖରେ ଘର ଖଣ୍ଡେ ନଥିବାରୁ କେତେବେଳେ ଗଛ ମୂଳରେ ତ ପୁଣି କେତେବେଳେ କେଉଁ ସ୍କୁଲ ବାରଣ୍ଡାରେ ମୁଣ୍ଡ ଗୁଞ୍ଜୁଛନ୍ତି । ଅନ୍ୟପଟେ ପେଟକୁ ଦାନା ଯୋଗାଇବାକୁ ଅର୍ଥ ନଥିବାରୁ ଦିନେ ଖାଇଲେ ଦିନେ ପୁଣି ଉପାସ ରହୁଛନ୍ତି ବୃଦ୍ଧ ଜଣଙ୍କ ।
ପୁତ୍ର ସନ୍ତାନଟିଏ ପାଇବା ଲାଗି ବାପାମାଆ ଦିଅଁ ଦେବତାଙ୍କ ନିକଟରେ କାହିଁ କେତେ ଗୁହାରୀ କରିଥାଆନ୍ତି । ଆଉ ସ୍ବପ୍ନ ଦେଖିଥାନ୍ତି ପୁଅ ବଡ ହେବ ଆମ ଦୁଃଖ ଦୂର କରିବ, ହେଲେ ଶ୍ରୀଧରଙ୍କ ସେହି ସ୍ବପ୍ନ ଏବେ ପାଣି ଫଟକା ପରି ପାଣିରେ ମିଳାଇଯାଇଛି । ଜନ୍ମ ଦେଇଥିବା ତିନି ପୁଅଙ୍କୁ ଲାଳନ ପାଳନ ପରେ ବଡ କରି ହାତକୁ ଦିହାତ କରିଥିଲେ, କିନ୍ତୁ ଏବେ ବାପାଙ୍କୁ ବେସାହାରା କରି ଦେଇଛନ୍ତି ଶ୍ରୀଧରଙ୍କ ତିନି ପୁଅ । ଫଳରେ ବୟସର ଅପରାହ୍ନରେ ଭୋକ ଉପାସରେ ଦିନ କାଟୁଛନ୍ତି ଶ୍ରୀଧର । ପୁଅର ସାହାରାରେ ଦିନ କାଟିବାକୁ ସ୍ବପ୍ନ ଦେଖିଥିବା ଶ୍ରୀଧର ଏବେ ଅସହାୟ ହୋଇ ଏଣେ ତେଣେ ବୁଲୁଛନ୍ତି । ଏମିତି ଅସହାୟ ଅବସ୍ଥାରେ ଥିବା ଶ୍ରୀଧର ନିଜର ଦୁଃଖ ଜଣାଇବାକୁ କାନ୍ଦି କାନ୍ଦି କାନ୍ଦି ପହଞ୍ଚିଥିଲେ ପ୍ରଶାସନ ନିକଟରେ ।