ନୂଆଦିଲ୍ଲୀ: ବିଶ୍ବର ତୃତୀୟ ସର୍ବଶ୍ରେଷ୍ଠ ଧନୀ ଗୌତମ ଆଦାନୀ । ବିଶ୍ବ ଶ୍ରେଷ୍ଠ ଧନୀ ତାଲିକାରେ ଆଦାନୀ ଗ୍ରୁପ(Adani Group) ମୁଖ୍ୟ ଗୌତମ ଆଦାନୀ ଫ୍ରାନ୍ସର ଶିଳ୍ପପତି ବର୍ନାଡ୍ ଆର୍ଣ୍ଣୋଲ୍ଟଙ୍କୁ(France's Bernard Arnault) ପଛରେ ପକାଇଛନ୍ତି । ଏହାସହିତ ଭାରତୀୟ ଶିଳ୍ପପତି ଆଦାନୀ ବିଶ୍ବର ତୃତୀୟ ଶ୍ରେଷ୍ଠ ଧନୀ ବ୍ୟକ୍ତି ହୋଇଛନ୍ତି । ଗୌତମ ଆଦାନୀ ହେଉଛନ୍ତି ଏସିଆର ପ୍ରଥମ ବ୍ୟକ୍ତି, ଯିଏକି ତୃତୀୟ ସବୁଠୁ ବଡ ଧନୀ ହୋଇପାରିଛନ୍ତି । ବର୍ତ୍ତମାନ ସେ ସବୁଠୁ ବଡ ଧନୀ ଏଲନ ମସ୍କ ଏବଂ ଜେଫ୍ ବେଜୋସ୍ଙ୍କ(Jeff Bezos) ତଳେ ରହିଛନ୍ତି । ବ୍ଲୁମାର୍ଗ ବିଲିୟନାରୀ ଇଣ୍ଡେକ୍ସ(Bloomberg Billionaires Index) ରିପୋର୍ଟରେ ଏହା ପ୍ରକାଶିତ ହୋଇଛି ।
Bloomberg ରିପୋର୍ଟ ଅନୁଯାୟୀ, ଗୁରୁବାର ୬୦ ବର୍ଷୀୟ ବିଜନେସ ଟାଇକୁନ ଆଦାନୀଙ୍କ ସମ୍ପତ୍ତି ୧୩୭.୪ ବିଲିୟନ ଡଲାରରେ ପହଞ୍ଚିଛି । ଦିନକୁ ଦିନ ଆଦାନୀଙ୍କ ସମ୍ପତ୍ତି ବୃଦ୍ଧି ପାଇବାରେ ଲାଗିଛି । ଏହା ସଙ୍ଗେ ସଙ୍ଗେ ସେ ଏସିଆର ସବୁଠୁ ଧନୀ ଭାବେ ସ୍ଥାନ ପାଇଛନ୍ତି । ସେହିପରି Tesla CEO ଏଲନ ମସ୍କଙ୍କ ସମ୍ପତ୍ତି ୨୫୧ ବିଲିୟନ ଡଲାର ରହିଥିବା ବେଳେ ଆମାଜନ ପ୍ରତିଷ୍ଠାତା ଜେଫ୍ ବେଜୋସ(Jeff Bezos)ଙ୍କ ସମ୍ପତ୍ତି ମୂଲ୍ୟ ୧୫୩ ବିଲିୟନ ଡଲାର ରହିଛି । ତେବେ ଆଦାନୀ ଖୁବ୍ଶୀଘ୍ର ଧନୀ ତାଲିକାରେ ବେଜୋସଙ୍କ ସ୍ଥାନ ନେଇପାରନ୍ତି ବୋଲି ଆଶା କରାଯାଉଛି ।