ନୂଆଦିଲ୍ଲୀ: ଆସନ୍ତା 19ରେ ବସିବ ଜିଏସଟି ପରିଷଦର 34ତମ ବୈଠକ । ତେବେ ନିର୍ବାଚନ ଆଚରଣ ବିଧି ଲାଗୁ ହୋଇଥିବା ଯୋଗୁଁ ଏହି ବୈଠକରେ ସେପରି କୌଣସି ଆଖିଦୃଷ୍ଟିଆ ନିଷ୍ପତ୍ତି ନିଆଯିବ ନାହିଁ । କିନ୍ତୁ ଗତ ବୈଠକରେ ନିର୍ମାଣଧୀନ ଘର ଶସ୍ତା ହେବା ନେଇ ନିଆଯାଇଥିବା ନିଷ୍ପତ୍ତି ନେଇ ଗାଇଡଲାଇନ ପ୍ରସ୍ତୁତ ହେବ ।
ଏପ୍ରିଲ 11ରୁ ଆରମ୍ଭ ଲୋକସଭା ନିର୍ବାଚନ ପ୍ରକ୍ରିୟା । ଏଥିଯୋଗୁଁ ରବିବାର ନିର୍ବାଚନ ଆୟୋଗ ଲାଗୁ କରିଦେଇଛନ୍ତି ସମସ୍ତ ଆଦର୍ଶ ଆଚରଣ ବିଧି । ନିର୍ମାଣଧୀନ ପ୍ରପର୍ଟି ଉପରେ ଜିଏସଟି ହ୍ରାସ ହେବା ଦ୍ବାରା କଣ ଲାଭ ହେବ । ରାଜକୋଷକୁ କେତେ ପରିମାଣର କ୍ଷତି ସହିବାକୁ ପଡିବ । ଆଉ ଏ ନେଇ କଣ ସବୁ ସର୍ତ୍ତ ରହିବ, ସେ ନେଇ ଏହି ବୈଠକରେ ଆଲୋଚନା କରାଯିବ ।
ଫେବୃଆରୀ 20ରେ ଅନୁଷ୍ଠିତ 33ତମ ଜିଏସଟି ବୈଠକରେ ଫ୍ଲାଟ ଉପରେ କର ବ୍ୟବସ୍ଥାକୁ ନେଇ କୌଣସି ନିଷ୍ପତ୍ତି ନିଆଯାଇ ପାରିଲାନି । ଏଣୁ ଏନେଇ 24ରେ ପୁଣି ଥରେ ବୈଠକ ବସିଥିଲା । ଏଥିରେ ନିର୍ମାଣାଧୀନ ଘର ଉପରେ ଜିଏସଟି ସ୍ଲାବ 12%ରୁ ହ୍ରାସ କରି 5% କରାଯାଇଥିଲା । ଏପ୍ରିଲରୁ ଏହି ନୂଆ ନିୟମକୁ କାର୍ଯ୍ୟକାରୀ କରାଯିବା ନେଇ ଘୋଷଣା କରାଯାଇଥିଲା ।
ଏଥିସହ ଏହି ବୈଠକରେ ଇନପୁଟ ଟ୍ୟାକ୍ସ କ୍ରେଡିଟକୁ ହଟାଇ ଦିଆଯାଇଛି । ଏହା ବ୍ୟତୀତ ଆପର୍ଡେଲେବଲ ହାଉସିଙ୍ଗ ପ୍ରୋଜେକ୍ଟ ପାଇଁ ଟିକସ ହାର 8% ରୁ 1% କୁ ହ୍ରାସ କରାଯାଇଛି । ଟିକସ ହ୍ରାସ ଯୋଗୁଁ ରିଅଲ ଇଷ୍ଟେଟ ବ୍ୟବସାୟଙ୍କୁ ପ୍ରୋତ୍ସାହନ ମିଳିବା ସହ ଲୋକେ ଘର କିଣିବାକୁ ଆଗ୍ରହ ହେବେ । ଯାହା ଫଳରେ 2022 ସୁଦ୍ଧା ସମସ୍ତ ଭାରତୀୟଙ୍କ ପାଖରେ ନିଜସ୍ବ ଘର ରହିପାରିବ ବୋଲି ବୈଠକ ପରେ ଅର୍ଥମନ୍ତ୍ରୀ ଅରୁଣ ଜେଟଲୀ ଦର୍ଶାଇଥିଲେ ।
