ନୂଆଦିଲ୍ଲୀ: ସୁଧୁରିଛି 8 ପ୍ରମୁଖ ଉଦ୍ୟୋଗ(କୋର ସେକ୍ଟର)ର ଅଭିବୃଦ୍ଧି ହାର । ଫେବୃଆରୀରେ ଶିଳ୍ପଗୁଡିକର ଉତ୍ପାଦନ 5.5 ପ୍ରତିଶତକୁ ବଢିଛି । ଯାହାକି 11 ମାସର ସର୍ବୋଚ୍ଚ ରେକର୍ଡ । ମଙ୍ଗଳବାର ଏନେଇ ସରକାରୀ ରିପୋର୍ଟ ପ୍ରକାଶ ପାଇଛି ।
ବିଶେଷ କରି କୋଇଲା, ରିଫାଇନେରୀ ଓ ବିଦ୍ୟୁତ ଉତ୍ପାଦନରେ ଭଲ ପ୍ରଦର୍ଶନ ଯୋଗୁଁ କୋର ସେକ୍ଟର ସୁଦୃଢ ହୋଇଛି । କୋରୋନା ସଙ୍କଟ ମଧ୍ୟରେ ଏହି ରିପୋର୍ଟ ଉଦ୍ୟୋଗ ଜଗତକୁ ଉପଶମ ଦେଇଛି ।
ଗତ ବର୍ଷ ଏହି ସମୟ(ଫେବୃଆରୀ)ରେ ଏହି ଅଭିବୃଦ୍ଧି ହାର 2.2. ପ୍ରତିଶତ ରହିଥିଲା । ଏହା ପୂର୍ବରୁ 2019 ମାର୍ଚ୍ଚରେ 8 ଉଦ୍ୟୋଗ ବୃଦ୍ଧି ଦର 5.8 ପ୍ରତିଶତ ରେକର୍ଡ ହୋଇଛି । ଏ ବର୍ଷ ଜାନୁଆରୀରେ ଏଥିରେ 1.4 ପ୍ରତିଶତ ବୃଦ୍ଧି ହୋଇଛି । ଉଦ୍ୟୋଗ ଉତ୍ପାଦନ ସୂଚକାଙ୍କ (ଆଇଆଇପି)ରେ ଏହି ଉଦ୍ୟୋଗର ଅଂଶ 40.27 ପ୍ରତିଶତ ରହିଛି ।
ଏହି 8ଟି କୋର ସେକ୍ଟର ମଧ୍ୟରେ କୋଇଲା, ଅଶୋଧିତ ତୈଳ, ପ୍ରାକୃତିକ ଗ୍ୟାସ, ରିଫାଇନାରୀ ଉତ୍ପାଦ, ଫର୍ଟିଲାଇଜର୍ସ, ଷ୍ଟିଲ୍, ସିମେଣ୍ଟ ଓ ଇଲେକ୍ଟ୍ରିସିଟି ଉତ୍ପାଦ ସାମିଲ ରହିଛି।