ଭୁବେନଶ୍ବର: ଓଡିଶାରେ ଶିଳ୍ପ ପ୍ରତିଷ୍ଠା କରିବା ସହ ସ୍ଥାନୀୟ ଲୋକଙ୍କୁ ନିଯୁକ୍ତି ପ୍ରଦାନ ଓ ଅର୍ଥନୀତିର ଅଭିବୃଦ୍ଧି ପାଇଁ ସରକାର ବିଭିନ୍ନ ପ୍ରକାର ପ୍ରୟାସ ଜାରି ରଖିଛନ୍ତି । ରାଜ୍ୟର ଅନୁନ୍ନତ ଜିଲ୍ଲା ମାନଙ୍କରେ ଶିଳ୍ପ ପ୍ରତିଷ୍ଠା କରିବା ପାଇଁ ଗୁରୁତ୍ବ ଦିଆଯାଉଛି । ଏଥିସହ ରାଜ୍ୟରେ ବୃହତ ଓ କ୍ଷୁଦ୍ର ଶିଳ୍ପ ସହିତ ସହଯୋଗୀ ଶିଳ୍ପ ପ୍ରସାର ପାଇଁ ବାତାବରଣ ତିଆରି କରାଯାଉଥିବା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ସ୍ଥାନୀୟ ପ୍ରଦର୍ଶନୀ ପଡିଆ ଠାରେ ଆୟୋଜିତ 22 ତମ ଏଣ୍ଟର ପ୍ରାଇଜ ଉଦଘାଟନ ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, 2030 ସୁଦ୍ଧା ଏହି କ୍ଷେତ୍ର(ଶିଳ୍ପ)ରେ ପ୍ରଚୁର ନିଯୁକ୍ତି ସୁଯୋଗ ସୃଷ୍ଟି ହେବ । ସେହିପରି ଷ୍ଟାର୍ଟଅପ ଓଡିଶା ମାଧ୍ୟମରେ ନୂଆ ଓ ଯୁବ ଉଦ୍ୟୋଗୀଙ୍କୁ ସୁଯୋଗ ଦେବାକୁ ଲକ୍ଷ୍ୟ ରହିଛି । ଏହିପରି ଭାବେ ଓଡିଶା 2020 ସୁଦ୍ଧା ସମଗ୍ର ଦେଶରେ ଶ୍ରେଷ୍ଠ ତୃତୀୟ ଷ୍ଟାର୍ଟଅପ ହବ ହେବା ନେଇ ଲକ୍ଷ୍ୟ ରହିଛି ।
ଏସବୁ କ୍ଷେତ୍ରରେ 5ଟି କୁ ପ୍ରୟୋଗ କରି ସ୍ଵଛତା ଆଣାଯିବ । ଏହି ଧାରାରେ ‘ସ୍କିଲ ଇନ ଓଡିଶା’ ଦ୍ବାରା ରାଜ୍ୟର ଯୁବପୀଢିଙ୍କୁ ପ୍ରଶିକ୍ଷିତ କରିବାରେ ଓଡିଶା ଅନ୍ୟ ମାନଙ୍କ ପାଇଁ ପ୍ରେରଣା ପାଲଟିଛି । ଗତବର୍ଷ ମେକ ଇନ ଓଡିଶା ମାଧ୍ୟମରେ ରାଜ୍ୟରେ 4 ଲକ୍ଷ କୋଟି ଟଙ୍କାର ପୁଞ୍ଜିନିବେଶ ପାଇଁ ପ୍ରସ୍ତାବ ଆସିଥିବାବେଳେ ବର୍ତ୍ତମାନ ସୁଦ୍ଧା 91 ଟି ପ୍ରସ୍ତାବ ଅନୁମୋଦିତ ହୋଇ କାର୍ଯ୍ୟକାରୀ ହେବାକୁ ଯାଉଛି । ଏହାକୁ ଦେଖିବାକୁ ଗଲେ ଖୁବ ଶୀଘ୍ର ଓଡିଶା ଏକ ମଜବୁତ ଅର୍ଥନୀତିରେ ପରିଣତ ହେବାକୁ ଯାଉଛି । ତେବେ ସରକାର ଦେଉଥିବା ବିଭିନ୍ନ ପ୍ରୋତ୍ସାହନର ଲାଭ ଯୁବ ଉଦ୍ୟୋଗୀମାନେ ନେବାକୁ ମୁଖ୍ୟମନ୍ତ୍ରୀ ଆହ୍ବାନ ଦେଇଛନ୍ତି । ସେହିପରି ଆସନ୍ତାବର୍ଷ ହେବାକୁ ଥିବା ମେକ ଇନ ଓଡିଶା କାର୍ଯ୍ୟକ୍ରମରେ ଅଧିକ ମାତ୍ରାରେ ଭାଗ ନେବାକୁ ସେ ଉଦ୍ୟୋଗମାନଙ୍କୁ ପରାମର୍ଶ ଦେଇଛନ୍ତି।