ନୂଆଦିଲ୍ଲୀ: ସଙ୍ଗୀନ ସ୍ଥିତିରେ ୟେସ ବ୍ୟାଙ୍କ । ବ୍ୟାଙ୍କରୁ ଟଙ୍କା ଉଠାଣରେ ପ୍ରତିବନ୍ଧକ ଲାଗିବା ପରେ ମୁଣ୍ଡରେ ହାତ ଦେଲେଣି ଜମାକର୍ତ୍ତା । ଏପଟେ ଟଙ୍କା ଉଠାଇବାକୁ ଏଟିଏମ ବାହାରେ ଲାଗିଛି ଲମ୍ବା ଲାଇନ । ସେପଟେ ମେସିନରୁ ଟଙ୍କା ବି ଖାଲି ହେଉଛି । ଏପରିକି ଅନଲାଇନରେ ଟଙ୍କା ଟ୍ରାଞ୍ଜାକ୍ସନ ମଧ୍ୟ କଷ୍ଟକର ହୋଇପଡିଛି । ଏନେଇ ନାନା ସମସ୍ୟାର ସାମ୍ନା କରୁଛନ୍ତି ଜମାକର୍ତ୍ତା ।
ଦେଶର ପ୍ରମୁଖ ଲୋକପ୍ରିୟ ଡିଜିଟାଲ ସେବା ପ୍ରଭାବିତ ହୋଇଛି । ଫୋନପେ ପେମେଣ୍ଟ ଆପ କାମ କରୁନାହିଁ । ଏହି ଆପକୁ ଖୋଲିବା ବେଳେ ‘We are temporary unavailable’ ଏକ ମେସେଜ ଦେଖାଉଛି । ଏହାକୁ ଦେଖି ଗ୍ରାହକଙ୍କ ଭିତରେ ଭାଳେଣି ପଡିଯାଇଛି ।