ନୂଆଦିଲ୍ଲୀ: ଦେଶରେ କୋରୋନା ସଂକ୍ରମଣର ଦ୍ବିତୀୟ ଲହରୀ ସହ କିଛି ସ୍ଥାନରେ ପୁଣି ଫେରିଲାଣି ଲକଡାଉନ କଟକଣା । ଦିଲ୍ଲୀ ସମେତ ଅନେକ ରାଜ୍ୟରେ ନାଇଟ କର୍ଫ୍ୟୁ ବି ଲାଗୁ ହେଲାଣି । ଆଉ ଏହି କଟକଣାକୁ ବିରୋଧ କରି ଟ୍ବିଟରରେ ଅସନ୍ତୋଷ ଜାହିର କରିଛନ୍ତି ଶିଳ୍ପପତି ଅନୀଲ ଅମ୍ବାନୀଙ୍କ ବଡ ପୁଅ ଅନମୋଲ ଅମ୍ବାନୀ ।
ଅନମୋଲ ଟ୍ବିଟରରେ ଲକଡାଉନ କଟକଣା ବିରୋଧରେ ବର୍ଷିଛନ୍ତି । ସେ କହିଛନ୍ତି କି ଏଭଳି ପ୍ରତିବନ୍ଧକ ଜମା ସ୍ବାସ୍ଥ୍ୟ ସମ୍ବନ୍ଧୀୟ ନୁହେଁ ହେଲେ ସମାଜ ଓ ଅର୍ଥନୀତିର ମେରୁଦଣ୍ଡ ଭାଙ୍ଗିଦେଲାଣି ।
ଟ୍ବିଟର ଏକ ସିରିଜରେ, ରିଲାଏନ୍ସ କ୍ୟାପିଟାଲ୍ ଲିମିଟେଡର ପୂର୍ବତନ କାର୍ଯ୍ୟନିର୍ବାହୀ ନିର୍ଦ୍ଦେଶକ 29 ବର୍ଷୀୟ ଅନମୋଲ କହିଛନ୍ତି କି ନୂଆ ସେମି-ଲକଡାଉନ କଟକଣା କ୍ଷୁଦ୍ର ବ୍ୟବସାୟୀ ଓ ଦିନ ମଜୁରିଆଙ୍କ ଆୟକୁ ଗଭୀର ଭାବେ ପ୍ରଭାବିତ କରୁଛି । ଏହି ଲକଡାଉନ ଗୁଡିକ କେବେ ସ୍ବାସ୍ଥ୍ୟ ସହ ସମ୍ବନ୍ଧିତ ନୁହେଁ ।
ଜିମ୍, କ୍ରୀଡା କମ୍ପ୍ଲେକ୍ସ ଏବଂ ଖେଳ ପଡିଆ ବନ୍ଦ କରି ଲକଡାଉନ୍ ସ୍ବାସ୍ଥ୍ୟକୁ ହାନି ପହଞ୍ଚାଉଛି । କାରଣ ବ୍ୟାୟାମ, ସୂର୍ଯ୍ୟ କିରଣ ଏବଂ ସତେଜ ବାୟୁ ଉତ୍ତମ ସ୍ବାସ୍ଥଛ୍ୟ ଏବଂ ଦୃଢ ଇମ୍ୟୁନିଟିର କେତେକ ବଳିଷ୍ଠ ସ୍ତମ୍ଭ ଅଟେ । ଏହା ବାଦ ଏହି ଲକଡାଉନ ପିଲାଙ୍କ ଅଭିବୃଦ୍ଧିରେ ମଧ୍ୟ ବାଧକ ସାଜି ସେମାନଙ୍କ ମାନସିକ ଦୁଶ୍ଚିତା ବଢାଉଛି ।
ଏଥିସହ ସେ ପ୍ରଶ୍ନ ପଚାରିଛନ୍ତି କି, ଯେବେ ଫିଲ୍ମ ଅଭିନେତା ସୁଟିଂ କରିପାରୁଛନ୍ତି, କ୍ରିକେଟର ବିଳମ୍ବିତ ରାତି ଯାଏଁ ଖେଳି ପାରୁଛନ୍ତି, ନେତା ପ୍ରବଳ ଜନସମାଗମ ସହ ରାଲି କରୁଛନ୍ତି , ତେବେ ବେପାରୀଙ୍କ ଉପରେ ରୋକ କାହିଁକି ? ସେ ଆହୁରୀ ବି କହିଛନ୍ତି ଯେ, ପ୍ରତିଟି ଲୋକ କାମ ତା ପାଇଁ ଗୁରୁତ୍ବପୂର୍ଣ୍ଣ ।