ନୂଆଦିଲ୍ଲୀ: ଉପସ୍ଥାପିତ ହେଲା ଶତାବ୍ଦୀର ପ୍ରଥମ ସାଧାରଣ ବଜେଟ୍ । ମହାମାରୀ କାଳରେ ଅର୍ଥନୀତିକୁ ବଳ ଦେବାକୁ ଆସିଲା ଇକୋନୋମିକ୍ ଭ୍ୟାକ୍ସିନ୍ । ମେଡ୍ ଇନ୍ ଇଣ୍ଡିଆ ଟ୍ୟାବଲେଟ ମାଧ୍ୟମରେ 2021-22 ଆର୍ଥିକ ବର୍ଷର ଆୟବ୍ୟୟ ବ୍ଲୁପ୍ରିଣ୍ଟ ବିଛାଇଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । 6ଟି ସ୍ତମ୍ବ ଉପରେ ଆଧାରିତ ପରବର୍ତ୍ତୀ ଆର୍ଥିକ ବର୍ଷର ବଜେଟ ଅଟକଳ । ଏଥର ଆତ୍ମନିର୍ଭର ଭାରତ ଭିଜନ ସହ ସ୍ବାସ୍ଥ୍ୟସେବା, ଭିତ୍ତିଭୂମି ଓ ପ୍ରତିରକ୍ଷା ବ୍ୟୟବରାଦ ବଢାଇ ଦୁଃସ୍ଥ ଅର୍ଥନୀତିକୁ ଗତିଶୀଳ ପାଇଁ ଦିଆଯାଇଛି ଗୁରୁତ୍ବ । ଏଥର ବଜେଟ ଅଟକଳ 34.5 ଲକ୍ଷ କୋଟି ଟଙ୍କା ରହିଛି ।
ଏଥରର ପେପରଲେସ ବଜେଟରେ ନିଯୁକ୍ତି ଓ ଗ୍ରାମୀଣ ବିକାଶ, ପ୍ରବାସୀ ଶ୍ରମିକଙ୍କ ସାମାଜିକ ସୁରକ୍ଷାକୁ ଦିଆଯାଇଛି ପ୍ରାଥମିକତା । କିନ୍ତୁ 108 ମିନିଟର ବଜେଟ ଭାଷଣରେ 48 ଥର ଟିକସ ଶବ୍ଦ ବ୍ୟବହାର କରିଥିବା ବେଳେ ଆଇଟି ସ୍ଲାବରେ ସାଧାରଣ ଲୋକଙ୍କୁ ମିଳିନି କୌଣସି ଉପଶମ । ଏପରିକି ବହୁ ଆଶା ବାନ୍ଧି ରଖିଥିବା ମଧ୍ୟବିତ୍ତଙ୍କୁ ମଧ୍ୟ ଏତେଟା କିଛି ପ୍ରଫିଟ ମିଳିନି । ହେଲେ ସୁପର ସିନିୟର ସିଟିଜନଙ୍କୁ ରିଲିଫ ଦେଇ ଆଇଟିଆର ରିଟର୍ଣ୍ଣ ଛାଡ ହୋଇଛି ।
ସେପଟେ ସରକାରୀ ଖର୍ଚ୍ଚ ପରିସର ବଢିଥିବାରୁ ଆର୍ଥିକ ନିଅଣ୍ଟ ସ୍ତର ବୃଦ୍ଧି ହୋଇଛି ବୋଲି ଦାବି କରିଛନ୍ତି ସୀତାରମଣ । ଆଉ ଏଥିପାଇଁ ପୁଞ୍ଜି ପ୍ରତ୍ୟାହାରକୁ ଅଧିକ ଗୁରୁତ୍ବ ସହ ସରକାରୀ ବ୍ୟାଙ୍କ ଓ ବୀମା କମ୍ପାନୀରେ କରାଯିବ ବିନିବେଶ । ଏହାଦ୍ବାରା 1.75 ଲକ୍ଷ କୋଟି ଟଙ୍କା ସଞ୍ଚୟ ଲକ୍ଷ୍ୟ ରହିଛି । ଏସବୁ ବାଦ ସ୍ବଦେଶୀ ସାମଗ୍ରୀକୁ ପ୍ରୋତ୍ସାହନ ଦେବା ପାଇଁ ସରକାର ବିଦେଶରୁ ଆସୁଥିବା ବହୁତ ସାମଗ୍ରୀ ଦାମ ବଢାଇଛନ୍ତି । ହେଲେ ସୁନା ଓ ରୂପା ଦାମ କମିବ ।
ଏହାସହ ଇଲେକଟ୍ରୋନିକ ସାମଗ୍ରୀ, ମୋବାଇଲ ଫୋନ, ଚାର୍ଜର, ଚମଡା ଜୋତା ମହଙ୍ଗା ହୋଇଛି । ସେହିପରି ଡାଲି ଓ ୟୁରିଆ ଶସ୍ତା ହୋଇଥିବା ବେଳେ ଅଟୋମୋବାଇଲ ପାର୍ଟ ମହଙ୍ଗା ହୋଇଛି । ରତ୍ନପଥର , ପେଟ୍ରୋଲ ଓ ଡିଜେଲ ମଧ୍ୟ ମହଙ୍ଗା ହେବ । ଲୁହା, ଷ୍ଟିଲ, ଆଇରନ, ନାଇଲନ କପଡା, ତମ୍ବା ସାମଗ୍ରୀ, ଇନ୍ସୁରାନ୍ସ ,ବିଜୁଳି, ଡ୍ରାଏକ୍ଲିନ, ଷ୍ଟିଲ ଓ କଂସା ବାସନ ଓ କୃଷି ଉପକରଣ ଶସ୍ତା ହେବ ।
ସେହିପରି ଡିଜିଟାଲ ପେମେଣ୍ଟକୁ ତ୍ବରାନ୍ବିତ ସହ ଆଫର୍ଡେବଲ ହାଉସିଂ ସ୍କିମ ଅବଧି ବର୍ଷେ ବଢିଛି । ଷ୍ଟାର୍ଟଅପ ପାଇଁ ଟିକସ ରିହାତି 1 ବର୍ଷ ଲମ୍ବିଛି । କୋରୋନା କାଳରେ ବଡ ଚ୍ୟାଲେଞ୍ଜିଂ ସାଜିଥିବା ହେଲଥ ସେକ୍ଟର ପାଇଁ ବଜେଟରେ 137 ପ୍ରତିଶତ ଅଧିକ ବରାଦ ସହ 2.23 ଲକ୍ଷ କୋଟିର ଆବଣ୍ଟନ ହୋଇଛି । ଲିଟର ପିଛା ପେଟ୍ରୋଲ ଓ ଡିଜେଲରେ ଯଥାକ୍ରମେ ଅଢେଇ ଓ 4 ଟଙ୍କା ଲାଗିବ ସେସ । କୃଷି ଋଣ ଟାର୍ଗେଟ 16.5 କୋଟିକୁ ବଢିଛି । ସେହିପରି ଶିକ୍ଷା କ୍ଷେତ୍ରର ମାନ ବଢାଇବାକୁ ଗଠନ ହେବ ଉଚ୍ଚଶିକ୍ଷା କମିଶନ । 100 ନୂଆ ସୈନିକ ସ୍କୁଲ , 15 ହଜାର ସ୍କୁଲର ଗୁଣାତ୍ମକ ବିକାଶ, ଲଦାଖର ଲେହରେ ହେବ ବିଶ୍ବ ବିଦ୍ୟାଳୟ । ଏପଟେ ଐତିହାସିକ ପଦକ୍ଷେପ ସ୍ବରୂପ ପ୍ରତିରକ୍ଷା ବଜେଟ୍ 19 ପ୍ରତିଶତ ବଢି 15 ବର୍ଷର ସର୍ବାଧିକ ବ୍ୟୟ ଅଟକଳ ହୋଇଛି । ଏଥର ସରକାର ସୀମାରେ ଅଶାନ୍ତି ଭିତରେ ସାମରିକ ଶକ୍ତି ବୃଦ୍ଧି ପାଇଁ 4 ଲକ୍ଷ 78 ହଜାର କୋଟିରୁ ଉର୍ଦ୍ଧ୍ବ ବ୍ୟୟ ବରାଦ ହୋଇଛି ।
ଏପଟେ ବଜେଟ ଭାଷଣ ପରେ ବଜାରରେ ଜବରଦସ୍ତ ବୃଦ୍ଧି ଦେଖିବାକୁ ମିଳିଛି । ଲଗାତାର ହ୍ରାସରେ ବନ୍ଦ ହେଉଥିବା ସେନସେକ୍ସ ଆଜି 2,315 ପଏଣ୍ଟ ଉଛୁଳିଛି ।
ଅନ୍ୟପଟେ କୋରୋନା କାଳର ଏହି ଐତିହାସିକ ବଜେଟକୁ ନେଇ ମିଶ୍ର ପ୍ରତିକ୍ରିୟା ଆସିଛି । ପିଏମ ମୋଦି ନୂଆ ଭାରତର ଆତ୍ମବିଶ୍ବାସକୁ ଜାଗ୍ରତ କରିବା ଭଳି ବଜେଟ କହିଥିଲା ବେଳେ ନୀତି ଆୟୋଗ CEO ଏହାକୁ ପ୍ରଂଶସା କରିଛନ୍ତି । କୃଷି ସେସ୍ ଦ୍ବାରା 30 ହଜାର କୋଟି ଆୟ ହେବ ବୋଲି ଅର୍ଥ ସଚିବ ଜଣାଇଛନ୍ତି । ହେଲେ ରାହୁଲ ଗାନ୍ଧୀ ଏହାକୁ ସମାଲୋଚନା ସହ ମୋଦି ଉଦ୍ୟୋଗପତି ବନ୍ଧୁଙ୍କ ହାତରେ ଭାରତର ସମ୍ପତ୍ତି ହସ୍ତାନ୍ତର କରୁଥିବା କହିଛନ୍ତି ।
ତେବେ ଜାଣନ୍ତୁ ଏହି ବଜେଟରେ କାହାକୁ ମିଳିଲା କେତେ
ସ୍ବାସ୍ଥ୍ୟ-
- ଭ୍ୟାକ୍ସିନ -35 ହଜାର କୋଟି
- ରେଳବାଇ -1.10 ଲକ୍ଷ କୋଟି
- ସଡକ- 1.18 ଲକ୍ଷ କୋଟି
- ଜାତୀୟ ରାଜପଥ- 65 ହଜାର କୋଟି
- ମନରେଗାକୁ 2021-22 ପାଇଁ 73 ହଜାର କୋଟି
- ଜାତୀୟ ଶିକ୍ଷା ମିଶନକୁ 34300 କୋଟି
- ସରକାରୀ ବ୍ୟାଙ୍କକୁ 20 ହଜାର କୋଟି ଟଙ୍କା
- ସ୍ବାସ୍ଥ୍ୟକୁ ସୁଦୃଢ କରିବା ପାଇଁ 2.23 ଲକ୍ଷ କୋଟିର ଘୋଷଣା
କୃଷି-
- 2022 ସୁଦ୍ଧା ଡବଲ ହେବ ଚାଷୀଙ୍କ ଆୟ
- କୃଷି ଋଣ ଟାର୍ଗେଟ 16.5 କୋଟିକୁ ବଢିଛି
- ଏମଏସପି ପାଇଁ 75 ହଜାର କୋଟି ଟଙ୍କା ଆବଣ୍ଟନ
- ଏମଏସପି ସିଷ୍ଟମରେ ହେବ ବଡ ପରିବର୍ତ୍ତନ
- ଖର୍ଚ୍ଚର ଦେଢ ଗୁଣା ଅଧିକା ଏମଏସପି ମିଳିବ
- ପଶୁପାଳନ ଡାଏରୀ ପାଇଁ 40 ହଜାର କୋଟି
- ଡାଲି ଚାଷୀଙ୍କ ପାଇଁ 10 ହଜାର କୋଟି
- ଦେଶରେ 5 ନୂଆ ବଡ କୃଷି ହବ ହେବ
- 1 ହଜାରରୁ ଅଧିକ ମଣ୍ଡିକୁ ଅନଲାଇନରେ ଯୋଡାଯିବ
- ଚା’ ଶ୍ରମିକଙ୍କ ପାଇଁ 1 ହଜାର କୋଟି
- ସର୍ବନିମ୍ନ ମଜୁରୀ ସବୁ ବର୍ଗ ପାଇଁ ହେବ ଲାଗୁ । ମହିଳା ମଧ୍ୟ ଏହି ଶ୍ରେଣୀରେ ରହିବେ ସାମିଲ ।
ସ୍ବାସ୍ଥ୍ୟ
- ସ୍ବାସ୍ଥ୍ୟ ଓ କଲ୍ୟାଣ ବଜେଟ 137 ପ୍ରତିଶତର ବୃଦ୍ଧି
- ହେଲଥ ବଜେଟ 2.38 ଲକ୍ଷ କୋଟି
- ପିଏମ ଆତ୍ମନିର୍ଭର ସ୍ବାସ୍ଥ୍ୟ ଭାରତ ଯୋଜନା ହେବ ଲଞ୍ଚ
- ସହରୀ ସ୍ବଚ୍ଛ ଭାରତ ମିଶନ 2.0କୁ 2021-26 ରୁ 5 ବର୍ଷର ଅବଧିରେ 1,41,678 କୋଟି ଟଙ୍କାର ମୋଟ ଆର୍ଥିକ ଆବଣ୍ଟନ କାର୍ଯ୍ୟକାରୀ କରାଯିବ ।
- ପ୍ରଧାନମନ୍ତ୍ରୀ ଆତ୍ମନିର୍ଭର ସ୍ବାସ୍ଥ୍ୟ ଭାରତ ଯୋଜନାର ଖର୍ଚ୍ଚ କେନ୍ଦ୍ର ବହନ କରିବ ।
- ପବ୍ଲିକ ହେଲଥ ସୂଚନା ପାଇଁ ୱେବସାଇଟ ହେବ ଲଞ୍ଚ
- ନୂଆ ସ୍ବାସ୍ଥ୍ୟ ଯୋଜନା ପାଇଁ ଆସନ୍ତା 6 ବର୍ଷ ପାଇଁ 64,180 କୋଟି ଖର୍ଚ୍ଚ କରିବାକୁ ଘୋଷଣା
- 15 ସ୍ବାସ୍ଥ୍ୟ ଜରୁରୀକାଳୀନ ଅପରେସନ କେନ୍ଦ୍ର
- ମିଶନ ପୋଷଣ 2.o ଶୁଭାରମ୍ଭ ହେବ