ନୂଆଦିଲ୍ଲୀ: ପ୍ରକାଶ ପାଇଛି ଅର୍ଥନୈତିକ ସର୍ଭେ ରିପୋର୍ଟ 2020 । ଏହି ପ୍ରାକ ବଜେଟ ଡାଟା ଅର୍ଥନୀତିର ବିଭିନ୍ନ ଦିଗ ଉପରେ ଦୃଷ୍ଟି ଦିଆଯିବା ସହ ବର୍ତ୍ତମାନ ଓ ଭବିଷ୍ୟତର ଚିତ୍ରକୁ ଦର୍ଶାଇଛି । ତେବେ ଏଥିରେ ନିରାମିଷ ଓ ଆମିଷ ଥାଳି ଉପରେ ଦାମ ହ୍ରାସ ନେଇ ମଧ୍ୟ କୁହାଯାଇଛି ।
ସର୍ଭେରେ କୁହାଯାଇଛି ଯେ, 2015-16 ତୁଳନାରେ ଏ ସମୟରେ ଶାକାହାରୀ ଥାଳି ଦାମ କମିଛି । ଯଦିଓ ଡାଲି ଏବଂ ପନିପରିବା ଦାମ ବୃଦ୍ଧି ଯୋଗୁଁ 2019 ଏପ୍ରିଲ-ଅକ୍ଟୋବରରେ ଏହାର ଦାମ ସାମାନ୍ୟ ବଢିଥିଲା । ତେବେ ଏହି ଆର୍ଥିକ ସମୀକ୍ଷା ରିପୋର୍ଟରେ ଦର୍ଶାଯାଇଛି କି, ଏବେ ଉଦ୍ୟୋଗ କ୍ଷେତ୍ରର ଶ୍ରମିକଙ୍କ ଦୈନିକ ଆମଦାନୀ ତୁଳନାରେ ଖାଇବା ଥାଳି ଶସ୍ତା ହୋଇଥିଲା ।
2006-2007 ତୁଳନାରେ 2019-20 ରେ ଶାକାହାରୀ ଭୋଜନ ଥାଳି 29 ପ୍ରତିଶତ ଓ ମାଂସାହାରୀ ଭୋଜନ ଥାଳି 18 ପ୍ରତିଶତ ଶସ୍ତା ହୋଇଛି ବୋଲି ରିପୋର୍ଟ ପ୍ରକାଶ କରି ଅର୍ଥମନ୍ତ୍ରୀ କହିଛନ୍ତି ।
ଭାରତରେ ଭୋଜନ ଥାଳିର ଅର୍ଥଶାସ୍ତ୍ର (Thalinomics) ଆଧାରରେ କରାଯାଇଥିବା ସମୀକ୍ଷାରୁ ଜଣାପଡିଛି ଯେ, ଲଗାତାର ହ୍ରାସ ପାଉଥିବା ଦାମକୁ ନେଇ ଏହି ନିଷ୍କର୍ଷ ମିଲିଛି । Thalinomics ଜରିଆରେ ଭାରତରେ ଜଣେ ସାମାନ୍ୟ ବ୍ୟକ୍ତି ଗୋଟିଏ ଥାଲି ପିଛା କରୁଥିବା ଖର୍ଚ୍ଚର ଆକଳନ ପାଇଁ ଚେଷ୍ଟା କରାଯାଇଛି । ସାଧାରଣ ଲୋକଙ୍କ ଦୈନିକ ଆହାର ସହ ଜଡିତ ଦିଶାନିର୍ଦ୍ଦେଶ ସହାୟତାରେ ଥାଳିର ମୁଲ୍ୟ ଆକଳନ କରାଯାଇଛି । ଏଥିପାଇଁ 2006 ଏପ୍ରିଲରୁ 2019 ଅକ୍ଟୋବର ପର୍ଯ୍ୟନ୍ତ 25 ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ପାଖାପାଖୀ 80 କେନ୍ଦ୍ରରୁ ଉଦ୍ୟୋଗ ଶ୍ରମିକଙ୍କ ପାଇଁ ଉପଭୋକ୍ତା ମୁଲ୍ୟ ସୂଚକାଙ୍କରୁ ଏକତ୍ର ଟଙ୍କାକୁ ବ୍ୟବହାର କରାଯାଇଛି ।
ଫଳରେ ହାରାହାରି 5 ସଦସ୍ୟ ଥିବା ପରିବାରର 2 ପୁଷ୍ଟିକର ଭୋଜନ ଥାଳିରେ ବାର୍ଷିକ ପାଖାପାଖୀ 10,887 ଟଙ୍କା ବଞ୍ଚିଛି । ସେହିପରି ମାଂସହାରୀ ଭୋଜନ କରୁଥିବା 5 ସଦସ୍ୟ ଥିବା ପରିବାରର ବାର୍ଷିକ 11,787 ଟଙ୍କା ଲାଭ ହୋଇଛି । ହେଲେ 2019ରେ ଦାମ ବଢିଥିବାରୁ ଏତେଟା ସଞ୍ଚୟ ହୋଇନଥିବା ଜମାପଡିଛି ।
