ନୂଆଦିଲ୍ଲୀ: ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ବିଦ୍ୟୁତ ବିତରଣ କମ୍ପାନୀଙ୍କ ଋଣ ଭାର ବୃଦ୍ଧି ପାଇ 4.5 ଲକ୍ଷ କୋଟି ଟଙ୍କାରେ ପହଞ୍ଚିବା ଆଶଙ୍କା ରହିଛି । ରେଟିଂ ଏଜେନ୍ସି କ୍ରିସିଲ ଏନେଇ ଆନୁମାନିକ ରିପୋର୍ଟ ପ୍ରକାଶ କରିଛି ।
କ୍ରିସିଲ ଏକ ବିବୃତ୍ତିରେ କହିଛି କି, ଗତ ମାସରେ ସରକାର ବିଦ୍ୟୁତ ବିତରଣ କମ୍ପାନୀଙ୍କ ପାଇଁ 90,000 କୋଟି ଟଙ୍କାର ପ୍ୟାକେଜ ଘୋଷଣା କରିଛନ୍ତି । ଏହା ଦ୍ବାରା କମ୍ପାନୀଙ୍କୁ ରିଲିଫ ମିଳିବ । ହେଲେ ବିତରଣ କମ୍ପାନୀଙ୍କ ସ୍ଥାୟୀ ବିକାଶ ପାଇଁ ଗଠନମୂଳକ ସୁଧାର ଆବଶ୍ୟକ । ଏହି ପ୍ୟାକେଜ ରାଜ୍ୟର ବିତରଣ କମ୍ପାନୀଙ୍କୁ ବିଦ୍ୟୁତ ଉତ୍ପାଦନ କମ୍ପାନୀଙ୍କ ପୁରୁଣା ବକେୟା ପରିଶୋଧ ପାଇଁ ସାହାଯ୍ୟ କରିବ ବୋଲି ଆଶା ରହିଛି ।
କ୍ରିସିଲ କହିଛି କି, କୋଭିଡ-19 ମହାମାରୀ ଯୋଗୁଁ ବିଦ୍ୟୁତ ଚାହିଦା ହ୍ରାସ ପାଇଛି ଓ ନଗଦ କ୍ଷତି ବଢିଛି । ଏପରି ସ୍ଥିତିରେ ବିତରଣ କମ୍ପାନୀଙ୍କ ଉପରେ ଆର୍ଥିକ ସଂସ୍ଥାନର ଋଣ ଭାର ବୃଦ୍ଧି ପାଇ 2020-21 ଶେଷ ସୁଦ୍ଧା 4.5 ଲକ୍ଷ କୋଟି ଟଙ୍କା ହେବ । ଯାହାକି ଗତ ଆର୍ଥିକ ବର୍ଷ ତୁଳନାରେ 30 ପ୍ରତିଶତ ଅଧିକ ହେବା ଆଶଙ୍କା ରହିଛି ।
15 ଟି ରାଜ୍ୟର 34 ଟି ସାର୍ବଜନୀନ କ୍ଷେତ୍ରର ବିତରଣ କମ୍ପାନୀଙ୍କ ଅଧ୍ୟୟନ ଆଧାରରେ ରେଟିଂ ଏଜେନ୍ସି କହିଛି ଯେ ଋଣ ପରିମାଣରେ ଏତେ ମାତ୍ରାରେ ବୃଦ୍ଧି ଦ୍ବାରା ବିତରଣ କମ୍ପାନୀଙ୍କ ଋଣ ପ୍ରୋଫାଇଲ ଦୁର୍ବଳ ହେବ । ଆଉ ଏପରି ସ୍ଥିତିରେ ସେମାନଙ୍କ ବଜାରରେ ସ୍ଥାୟିତ୍ବ ବଜାୟ ରଖିବାକୁ ସୁଧାର ଲୋଡା ରହିଛି । ଦେଶର ମୋଟ ବିଦ୍ୟୁତ ଚାହିଦାରେ ଏହି ବିତରଣ କମ୍ପାନୀଙ୍କ ଅଂଶ 80 ପ୍ରତିଶତରୁ ଅଧିକ ରହିଛି ।
ବିବୃତ୍ତି ଅନୁସାରେ ବର୍ତ୍ତମାନ 5 ବିତରଣ କମ୍ପାନୀଙ୍କ ମଧ୍ୟରୁ କେବଳ ଗୋଟିଏ ନିଜ ନଗଦ ସ୍ଥିତି ବଜେଟ ସବସିଡି ଆଧାରରେ ଋଣ କିସ୍ତି ପରିଶୋଧ ପାଇଁ ସକ୍ଷମ । କୋରୋନା ଭାଇରସ ମହାମାରୀ ରୋକିବା ପାଇଁ ଜାରି ଦେଶବ୍ୟାପି ଲକଡାଉନ ଯୋଗୁଁ ବିଦ୍ୟୁତ ଚାହିଦା କମିଛି । ଏପଟେ ଖର୍ଚ୍ଚ ବୃଦ୍ଧି ଓ କ୍ଷତି ଯୋଗୁଁ ପରିସ୍ଥିତି ଖରାପ ହେବ । ଯେତେବଳେ କି ଚାହିଦା ଦୃଷ୍ଟିରୁ ଗତ ଆର୍ଥିକ ବର୍ଷର ଆଧାରରେ ଦୁର୍ବଳ ଥିଲା।
କ୍ରିସିଲ ରେଟିଂ ର ବରିଷ୍ଠ ନିର୍ଦ୍ଦେଶକ ମନୀଷ ଗୁପ୍ତା କହିଛନ୍ତି ଯେ, ଚାହିଦା ହ୍ରାସ ମଧ୍ୟରେ ଅଧିକ ଖର୍ଚ୍ଚ ଏବଂ ନଗଦ ପ୍ରବାହର ପ୍ରତିବନ୍ଧକ ଯୋଗୁଁ ଚଳିତ ଆର୍ଥିକ ବର୍ଷରେ ବିତରଣ କମ୍ପାନୀଙ୍କ ପ୍ରତି ୟୁନିଟ ଅପରେଟିଂ ପିଛା 83 ପଇସା ବୃଦ୍ଧି ହେବ । ଅନ୍ୟ ଅର୍ଥରେ, ରାଜ୍ୟ ସରକାରଙ୍କ ଅପେକ୍ଷା ଅଧିକ ସବସିଡି ସହାୟତା ସତ୍ତ୍ବେ ଚଳିତ ଆର୍ଥିକ ବର୍ଷରେ ନଗଦ କ୍ଷତି ପୂର୍ବ ଆର୍ଥିକ ତୁଳନାରେ ପ୍ରାୟ ଦ୍ୱିଗୁଣିତ ହୋଇ 58,000 କୋଟି ଟଙ୍କା ହେବ ବୋଲି ଆକଳନ କରାଯାଇଛି।
