ସ୍ମାର୍ଟ ସିଟିକୁ ସବୁଜ ସୁନ୍ଦର କରିବ 'ମିଶନ ଗ୍ରୀନ ଭୁବନେଶ୍ବର'

ସ୍ମାର୍ଟ ସିଟିକୁ ସବୁଜ ସୁନ୍ଦର କରିବାକୁ ଆଗେଇ ଆସିଛି 'ମିଶନ ଗ୍ରୀନ ଭୁବନେଶ୍ୱର' । ବୁଧବାର ରାଜଧାନୀର ଡମ୍ପିଂୟାର୍ଡ଼ ନିକଟସ୍ଥ ବିଶେଶ୍ବର ବସ୍ତିରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।

ଭୁବନେଶ୍ୱର: ସାମୁଦ୍ରିକ ଝଡ ଫନିରେ ଭୁବନେଶ୍ୱରରେ ପାଖାପାଖି ୧୦ ହଜାରରୁ ଊର୍ଦ୍ଧ୍ବ ଗଛ ଉପୁଡିଛି । ଯାହାଫଳରେ ରାଜଧାନୀରେ ଅସହ୍ୟ ଗୁଳୁଗୁଳି ହେଉଛି । ଏହି ସମସ୍ୟାରୁ ମୁକୁଳିବା ପାଇଁ 'ମିଶନ ଗ୍ରୀନ ଭୁବନେଶ୍ୱର' ପକ୍ଷରୁ ଏକ ନିଆରା କାର୍ଯ୍ୟକ୍ରମ ହାତକୁ ନିଆଯାଇଛି । ତେବେ ସ୍ମାର୍ଟସିଟିର ସବୁଜିମା ଫେରାଇ ଆଣିବାର ପ୍ରଚେଷ୍ଠାରେ ଭୁବନେଶ୍ୱରର ଏକ ସ୍ୱେଚ୍ଛାସେବୀ ସଂଗଠନ "ମିଶନ ଗ୍ରୀନ ଭୁବନେଶ୍ୱର" ସେମାନଙ୍କ ପ୍ରଥମ ପର୍ଯ୍ୟାୟ ବୃକ୍ଷରୋପଣ କାର୍ଯ୍ୟକ୍ରମ 19 ଜୁନ 2019ରେ ସମାପନ କରିଛନ୍ତି । ମୁଖ୍ୟତଃ ଭୁବନେଶ୍ୱରରେ ଥିବା ଶିକ୍ଷାନୁଷ୍ଠାନ ଓ ଜନବସତି ଅଞ୍ଚଳରେ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜନ କରିଛି 'ମିଶନ ଗ୍ରୀନ୍ ଭୁବନେଶ୍ୱର' ।

ଏହି କାର୍ଯ୍ୟକ୍ରମ ପାଇଁ ଭୁବନେଶ୍ବରର ପ୍ରମୁଖ ସ୍ଥାନମାନଙ୍କରେ ସଚେତନତା ତଥା କ୍ରାଉଡ଼ ଫଣ୍ଡିଙ୍ଗ କରାଯାଇଥିଲା । ଯୁବଗୋଷ୍ଠୀ ଆଉ କିଶୋର କିଶୋରୀ ମାନଙ୍କ ମଧ୍ୟରେ ପରିବେଶ ସଚେତନତା କରେଇବା ଏହି କାର୍ଯ୍ୟକ୍ରମର ପ୍ରମୁଖ ଉଦ୍ଦେଶ୍ୟ । ଏନେଇ ବୁଧବାର ଭୁବନେଶ୍ୱର ଡ଼ମ୍ପିଂ ୟାର୍ଡ଼ ନିକଟସ୍ଥ ବିଶେଶ୍ବର ବସ୍ତିରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । କାର୍ଯ୍ୟକ୍ରମରେ ଯୋଗଦେଇଥିବା କିଶୋର-କିଶୋରୀଙ୍କୁ ବୃକ୍ଷରୋପଣର ଆବଶ୍ୟକତା ସମ୍ବନ୍ଧୀୟ କର୍ମଶାଳାର ଆୟୋଜନ ସହ ଜଳପାନର ବ୍ୟବସ୍ଥା କରାଯାଇଥିଲା ।

ଏହି କାର୍ଯ୍ୟକ୍ରମର ଆବାହକ ତଥା ପାଣିପାଗ ବୈଜ୍ଞାନିକ ଆଶୁତୋଷ ଆଚାର୍ଯ୍ୟ କହନ୍ତି ଯେ ଏପରି କାର୍ଯ୍ୟକ୍ରମ ଦ୍ୱାରା ଛାତ୍ରଛାତ୍ରୀଙ୍କ ଭିତରେ ପରିବେଶ ପ୍ରତି ସଚେତନତା ବଢିବ ଆଉ ପରବର୍ତ୍ତୀ ପିଢ଼ି ଏଥିରେ ଉପକୃତ ହୋଇପାରିବେ । ଉକ୍ତ କାର୍ଯ୍ୟକ୍ରମରେ ଓଡ଼ିଶାର କିଛି ଉତ୍ସାହିତ ଶିକ୍ଷିତ ଯୁବକ ଯୁବତୀ ଇତ୍ୟାଦି ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ ମଣ୍ଡିତ କରିଥଲେ । ଏହି କାର୍ଯ୍ୟକ୍ରମଟି ଦୁଇ ପ୍ରମୁଖ ସଂସ୍ଥା,"ଫାଉଣ୍ଡେସନ ଫର୍ ସୋସାଇଟି ଆଣ୍ଡ ଏନଭାରନମେଣ୍ଟ" ତଥା "ରବିନ ହୁଡ଼ ଆର୍ମି ଭୁବନେଶ୍ୱର"ର ସହଯୋଗ ଆଉ ସହଭାଗିତାରେ ସମ୍ପୂର୍ଣ୍ଣ ହୋଇଛି ।

ଆଗାମୀ ଦିନରେ ଏ ସମାଜ ସେବାର ଧାରାକୁ ଓଡିଶା ବ୍ୟାପି କରାଯିବାର ପ୍ରସ୍ତାବ ରହିଛି ବୋଲି ଆବାହକ ଆଶୁତୋଷ ତଥା ସଂସ୍ଥାର ଅନ୍ୟାନ୍ୟ ସଦସ୍ୟ ମତବ୍ୟକ୍ତ କରିଥିଲେ ।

ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ