କୋରାପୁଟ: ସ୍ବାମୀ ସହ ସୁଖର ସଂସାର କରିବା ବଦଳରେ କରୁଛନ୍ତି ଦିବ୍ୟାଙ୍ଗ ଶାଶୁ ଓ ଦିଅରର ସେବା । ଆଉ ନିଜ ପରିବାର ଚଳାଇବାକୁ ବାହାରେ ଦାଦନ ଖଟୁଛନ୍ତି ସ୍ବାମୀ । ଏଦୃଶ୍ୟ ହେଉଛି କୋରାପୁଟ ଜିଲ୍ଲା ପାନ୍ତାଲୁଙ୍ଗ ପଞ୍ଚାୟତ ଅନ୍ତର୍ଗତ ସିଡିପୁଟ ଗାଁର । 10 ବର୍ଷ ପୂର୍ବେ ଦିଅର କ୍ରୀଷ୍ଣାରୀ ପାଲାସୀ ଏକ ଅଜଣା ରୋଗରେ କବଳିତ ହେବାରୁ ତାଙ୍କର ଗୋଡ 2ଟି ଅକାମୀ ହୋଇଯାଇଛି । ସେହିପରି 5 ବର୍ଷ ପୂର୍ବେ ଶାଶୁ ମଧ୍ୟ ଖଟିଆ ଧରିଥିଲେ । ଏଭଳି ସ୍ଥିତିରେ ପାଲାସୀ ମାଙ୍ଗାମାଙ୍କ ପାଇଁ ଘର ସମ୍ଭାଳିବା କଷ୍ଟ ହୋଇପଡିଥିଲା । ଆଉ ଏଥିରେ ତାଙ୍କୁ ବେଶୀ କଷ୍ଟ ଦେଇଥିଲା ଅର୍ଥ ।
ସେପଟେ ନିଜ ପରିବାରର ଭାର ଉଠାଇବାକୁ ରାଜ୍ୟରେ କାମ ନ ମିଳିବାରୁ ବିଶାଖାପାଟଣା ଦାଦନ ଖଟିବାକୁ ଯାଇଛନ୍ତି ବଡ ପୁଅ ପାଲାସୀ ନଗେଶ । ସ୍ବାମୀ ବାହାରକୁ ଯିବା ପରେ ଆନ୍ଧ୍ରପ୍ରଦେଶର ଏକ ଅଖ୍ୟାତ ଗାଁର ସଦ୍ୟବିବାହିତ ଝିଅ ପାଲାସୀ ମାଙ୍ଗାମା ଉଠେଇଥିଲେ ଶାଶୁ ଓ ଦିଅରଙ୍କ ଭାର । ଏକୁଟିଆ ଏତେ ବଡ ଦାୟିତ୍ୱ ସମ୍ଭାଳିବା ତାଙ୍କ ପାଇଁ କଷ୍ଟଦାୟୀ ଥିଲା । କିନ୍ତୁ ମାଙ୍ଗାମା ଏଥିରେ ଭାଙ୍ଗି ନପଡି ଗତ 5 ବର୍ଷ ହେବ ନିଜ ବୋହୂର ଦାୟିତ୍ବ ଉଠାଇଥିଲେ ।