ପିଛା ଛାଡୁନି ଅନ୍ଧବିଶ୍ବାସ: ମୃତ ମହିଳାଙ୍କୁ ଜୀବିତ କରିବାକୁ ଡାକ୍ତରଖାନାରେ ଝଡାଫୁଙ୍କା

ବରଗଡ ଜିଲ୍ଲା ପଦ୍ମପୁର ଡାକ୍ତରଖାନାରେ ସାପ କାମୁଡାରେ ଜଣେ ମହିଳାଙ୍କୁ ଡାକ୍ତର ମୃତ ଘୋଷଣା କରିଥିବାବେଳେ 3 ଦିନ ଭିତରେ ମହିଳାଙ୍କ ଜୀବନ ଫେରିଆସିବ ବୋଲି କହି ତାଙ୍କ ମୃତଦେହକୁ ଝଡାଫୁଙ୍କା କରାଯିବା ଜିଲ୍ଲାରେ ଚାଞ୍ଚଲ୍ୟ ସୃଷ୍ଟି କରିଛି ।

ବରଗଡ: ବିଜ୍ଞାନ ଓ ଅନ୍ଧବିଶ୍ଵାସ ମଧ୍ୟରେ ସର୍ବଦା ଯୁଦ୍ଧ ଚାଲୁଥିବାବେଳେ ଆଧୁନିକ ଯୁଗରେ ବି କିଛି ଲୋକ ଅନ୍ଧବିଶ୍ବାସ ଅନ୍ଧଗଳିରେ ବାନ୍ଧି ହୋଇ ରହିଛନ୍ତି । ଏମିତି କିଛି ଘଟଣା ବରଗଡ ଜିଲ୍ଲା ପଦ୍ମପୁର ଡାକ୍ତରଖାନାରେ ଦେଖିବାକୁ ମିଳିଛି । ସାପ କାମୁଡାରେ ଜଣେ ମହିଳାଙ୍କୁ ଡାକ୍ତର ମୃତ ଘୋଷଣା କରିଥିବାବେଳେ 3 ଦିନ ଭିତରେ ମହିଳାଙ୍କ ଜୀବନ ଫେରିଆସିବ ବୋଲି କହି ତାଙ୍କ ମୃତଦେହକୁ ଝଡାଫୁଙ୍କା କରାଯିବା ଘଟଣା ସାରା ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି ।

ସୂଚନାନୁଯାୟୀ, ଗାଇସିଲେଟ ବ୍ଲକ ଅନ୍ତର୍ଗତ ତାଳପାଳି ପଞ୍ଚାୟତର ଚଙ୍ଗାରିଆ ଗ୍ରାମର ସପ୍ତଶିଳା ଭୋଇ ନାମକ ଜଣେ ମହିଳାଙ୍କୁ ଶୋଇଥିବା ଅବସ୍ଥାରେ ଏକ ବିଷଧର ସାପ କାମୁଡି ଦେଇଥିଲା । ପରିବାର ଲୋକେ ତୁରନ୍ତ ସପ୍ତଶିଳାଙ୍କୁ ଚିକିତ୍ସା ପାଇଁ ପଦ୍ମପୁର ଡାକ୍ତରଖାନାକୁ ଆଣିଥିଲେ । ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।

ତେବେ ଘଟଣାସମ୍ପର୍କରେ ପୋଲିସକୁ ଖବର ଦିଆଯାଇ ମୃତଦେହ ବ୍ୟବଚ୍ଛେଦ ପାଇଁ ପଠାଇ ଦିଆଯାଇଥିଲା । କିନ୍ତୁ ପରିବାର ଲୋକେ ଅନ୍ଧବିଶ୍ବାସର ଜାଲରେ ପଡି ଜଣେ ଗୁଣିଆଙ୍କୁ ଡାକି ଆଣିଥିଲେ । ଯିଏକି ଜଣେ ମୃତ ମହିଳାଙ୍କୁ ଜୀବିତ କରାଇବାକୁ ନାନା ପ୍ରୟାସ କରିଥିଲେ । ମନ୍ତ୍ର ଉଚ୍ଚାରଣ କରି ଝଡାଫୁଙ୍କା କରିବା ପରେ ମଧ୍ୟ ତାଙ୍କୁ କୌଣସି ସୁଫଳ ମିଳିନଥିଲା । ମାତ୍ର ଉକ୍ତ ଗୁଣିଆ ଜଣକ ତିନିଦିନ ମଧ୍ୟରେ ମହିଳାଙ୍କ ଜୀବନ ଫେରି ଆସିବ କହି ଏକ ଅପ୍ରୀତିକର ପରିସ୍ଥିତି ସୃଷ୍ଟି କରି ଚାଲିଯାଇଥିଲା । ବର୍ତ୍ତମାନ ଆଧୁନିକ ସମୟରେ ବିଜ୍ଞାନ ଅଗ୍ରଗତି କରୁଥିଲେ ମଧ୍ୟ ଲୋକେ ଅନ୍ଧବିଶ୍ଵାସକୁ ନିଜ ମାନସିକତାରୁ ଦୂରେଇ ରଖିପାରୁନାହାଁନ୍ତି ।

ବରଗଡରୁ ରାଜେଶ ସରାପ, ଇଟିଭି ଭାରତ