ଶ୍ରୀନଗର:ମହାପୁରୁଷ ମହମ୍ମଦଙ୍କ ସମ୍ପର୍କରେ ଆପତ୍ତିଜନକ ମନ୍ତବ୍ୟ ଦେଇ ଅଡୁଆରେ ଥିବା ନିଲମ୍ବିତ ବିଜେପି ନେତ୍ରୀ ନୁପୂର ଶର୍ମାଙ୍କ ମୁଣ୍ଡକାଟ ଧମକ ଦେଇ ଭିଡିଓ ପ୍ରସ୍ତୁତ କରିଥିବା ୟୁଟ୍ଯୁବର ଗିରଫ । କାଶ୍ମୀରର ୟୁଟ୍ୟୁବର ଫୈଜଲ ଓ୍ବାନୀଙ୍କୁ ଆଜି (ଶନିବାର) କାଶ୍ମୀର ପୋଲିସ ଗିରଫ କରିଥିବା ସୂଚନା ରହିଛି । ନୂପୁରଙ୍କ ମୁଣ୍ଡକାଟ କରାଯିବା ନେଇ ଭିଡିଓରେ ଦର୍ଶାଯାଇଥିଲା । ଏହି ଭିଡିଓକୁ ନିଜ ୟୁଟ୍ୟୁବ ଚାନେଲରେ ଅପଲୋଡ କରିଥିଲେ ଫୈଜଲ ।
ଅବଶ୍ୟ ପରେ ଭିଡିଓକୁ ନେଇ ଫୈଜଲ କ୍ଷମା ମଧ୍ୟ ପ୍ରାର୍ଥନା କରିଥିଲେ । ତାଙ୍କର ହିଂସାକୁ ପ୍ରତ୍ସାହିତ କରିବା ଭଳି କୌଣସି ଉଦ୍ଦେଶ୍ୟ ନଥିବା ସଫେଇ ଦେବା ସହ ସେ ପୋଷ୍ଟ କରିଥିବା ଭିଡିଓ ମଧ୍ୟ ଡିଟିଲ କରିଦେଇଥିବା କହିଥିଲେ । ଏହି ଭିଡିଓରେ ଓ୍ବାନି ଖାଲି ଦେହରେ ଥିବାବେଳେ ହାତରେ ଏକ ଖଣ୍ଡା ମଧ୍ୟ ଧରିଥିଲେ । ଗ୍ରାଫିକ୍ସ ବ୍ୟବହାର କରି ସେ ନୁପୂରଙ୍କ ଫଟୋ ମଧ୍ୟ ଭିଡିଓରେ ସାମିଲ କରିଥିଲେ । ନୁପୂରଙ୍କ ମୁଣ୍ଡକାଟ କରାଯିବା ନେଇ ବଡ ହିଂସକ ଓ ଉତ୍ତେଜିତ ଢଙ୍ଗରେ ଉପସ୍ଥାପନ କରିଥିଲେ ଫୈଜଲ । ତେବେ ଏପରି ଘଟଣାକୁ ଗମ୍ଭୀରତାର ସହ ନେଇଛି ପୋଲିସ । ଆଜି ତାଙ୍କୁ ଗିରଫ କରାଯାଇଛି ।