ନୂଆଦିଲ୍ଲୀ: ଚାହୁଁ ଚାହୁଁ ଶେଷ ହୋଇଗଲା ବର୍ଷ 2021। କୋରୋନା ମହାମାରୀ ସହ ଭାରତ ଶତ୍ରୁ ଦେଶଙ୍କୁ କଡ଼ା ଜବାବ ଦେଇଛି ବର୍ଷ ତମାମ । ଏଥିପାଇଁ ଏହି ବର୍ଷ ଦେଶର ସାମରିକ ବାହିନୀକୁ ଅଧିକ ମଜଭୁତ କରିବାକୁ ପଡ଼ିଥିଲା । ଏହି କ୍ରମରେ ନୌସେନା, ସ୍ଥଳସେନା ଓ ବାୟୁସେନାରେ ଅନେକ ଗୁରୁତ୍ବପୂର୍ଣ୍ଣ ପଦକ୍ଷେପ ନିଆଯାଇଛି। ଏଥିପାଇଁ ବିଶ୍ବର 5ଟି ସବୁଠାରୁ ଶକ୍ତିଶାଳୀ ସାମରିକ ବାହିନୀ ଦେଶ ମଧ୍ୟରେ ଭାରତ ସ୍ଥାନ ରହିଛି । ସାମରୀକ ବାହିନୀ ପାଇଁ ଭାରତ ସରକାର ବର୍ଷ 2021ରେ 4,78,196 କୋଟି ବଜେଟରେ ପ୍ରାବଧାନ କରିଥିଲେ । ଋଷିଆ, ଆମେରିକା, ଇସ୍ରାଏଲ ଏବଂ ଫ୍ରାନ୍ସ ଭଳି ଶକ୍ତିଶାଳୀ ଦେଶ ସହ ଅନେକ ଡିଫେନ୍ସ ଚୁକ୍ତି କରିଛି ଭାରତ।
2021 ବର୍ଷରେ ଅନେକ ଗୁରୁତ୍ବପୂର୍ଣ୍ଣ ସାମରୀକ ଚୁକ୍ତି ସ୍ବାକ୍ଷର କରିଛି ଭାରତ। ସେଥିମଧ୍ୟରେ 4ଟି ଚୁକ୍ତି ଗୁରୁତ୍ବପୂର୍ଣ୍ଣ ରହିଥିଲା। ଋଷିଆ ସହ AK203 ରାଇଫଲ ଡିଲ୍ ଏବଂ ମଲିଟାରୀ ଟେକ୍ନୋଲୋଜୀ କୋ-ଅପରେଶନ । ଆମେରିକା ସହ ପ୍ରଡେଟର ଡ୍ରୋନ ଚୁକ୍ତି । ଇସ୍ରାଏଲ ସହ ଆଗାମୀପିଢିର ରୋବୋଟିକ୍ ଡ୍ରୋନ ଚୁକ୍ତି (Next Generation Drones, Robotics) ।
AK-203 ରାଇଫଲ ଚୁକ୍ତି
ଅତ୍ୟାଧୁନିକ AK203 ରାଇଫଲ ତିଆରି ପାଇଁ ଋଷିଆ ସହ ଚୁକ୍ତି କରିଛି ଭାରତ। ଉତ୍ତର ପ୍ରଦେଶର ଅମେଠୀରେ ଋଷିଆ ସହଭାଗିତାରେ ଏହି ରାଇଫଲ ତିଆରି ଫ୍ୟାକ୍ଟ୍ରି ନିର୍ମାଣ ହେବ। ଉଭୟ ଦେଶ ମିଶି ପ୍ରାୟ 6 ଲକ୍ଷ ରାଇଫଲ ତିଆରି କରିବେ । ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଭାରତ ଗସ୍ତ ବେଳେ ଏହି ଚୁକ୍ତି ସ୍ବାକ୍ଷରିତ ହୋଇଥିଲା। ଏହାଦ୍ବାରା ଉତ୍ତରପ୍ରଦେଶ ସାମରିକ ବାହିନୀ ଉପକରଣ ତିଆରିର ହବ୍ ପାଲଟିବ।
ମିଲିଟାରୀ ଟେକ୍ନୋଲୋଜୀ କୋ-ଅପରେସନ
ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଭାରତ ଗସ୍ତ ବେଳେ ସାମରିକ ସୁରକ୍ଷା ଦିଗରେ ଆଉ ଏକ ବୃହତ ପଦକ୍ଷେପ ନେଇଥିଲେ ଭାରତ ସରକାର। ଦୁଇ ଦେଶ ମଧ୍ୟରେ ମିଲିଟାରୀ ଟେକ୍ନୋଲୋଜୀ ଆଦାନପ୍ରଦାନ ନେଇ ଚୁକ୍ତି ସ୍ବାକ୍ଷର ହୋଇଥିଲା। ଆଗାମୀ ଏକ ଦଶନ୍ଧୀ ପର୍ଯ୍ୟନ୍ତ ଏହି ଚୁକ୍ତି ବଳବତ୍ତର ରହିବ। 20ତମ ଋଷିଆ-ଭାରତ ସାମରିକ ଆନ୍ତଃ ସରକାରୀ ମିଲିଟାରୀ କମିଶନ ଅନ୍ତର୍ଗତ ଦୁଇ ଦେଶର ମିଲିଟାରୀ ଟେକ୍ନିକାଲ ସହାୟତା ପାଇଁ ଚୁକ୍ତି ସ୍ବାକ୍ଷରିତ ହୋଇଛି।
ଘାତକ ପ୍ରିଡେଟର ଡ୍ରୋନ
2021ରେ 30ଟି ମଲ୍ଟି ମିଶନ ଡ୍ରୋନ ପାଇଁ ଆମେରିକା ସହ ଚୁକ୍ତି କରିଛି ଭାରତ। ଏଥିପାଇଁ ଭାରତ ଆମେରିକା ସହ 300 କୋଟି ଟଙ୍କାର ଚୁକ୍ତି କରିଛି। ଏହି ଅତ୍ୟାଧୁନିକ ଡ୍ରୋନ ଗୁଡ଼ିକ ପାଇଁ ପ୍ରଥମେ ଭାରତୀୟ ନୌସେନା ପକ୍ଷରୁ ପ୍ରସ୍ତାବ ଦିଆଯାଇଥିଲା। ତେବେ 30ଟି ଡ୍ରୋନ୍ ଆସିଲେ ପ୍ରତ୍ୟେକ ସେନାରେ 10ଟି ଲେଖାଏଁ ଡ୍ରୋନ ସାମିଲ ହେବ।
ଆମେରିକା ସେନା ବିକଶିତ କରିଥିବା ଏହି ମାନବ ରହିତ ପାଇଲଟ୍ ବିହୀନ ଡ୍ରୋନ ରିମୋଟ ଦ୍ବାରା ପରିଚାଳିତ ହୋଇ ପାରିବ। ସବୁଠାରୁ ବଡ଼ କଥା ହେଉଛି 35 ଘଣ୍ଟା କାଳ ନିର୍ଦ୍ବନ୍ଦ୍ବରେ ଏହି ଡ୍ରୋନ ଉଡ଼ି ପାରିବ। ଏହି ଡ୍ରୋନର ସବୁଠାରୁ ଖାସ କଥା ହେଉଛି, ଏହା ସର୍ବେକ୍ଷଣ, ଅନୁସନ୍ଧାନ କରିବା ସହ ଗୁପ୍ତଚର ଭଳି କାର୍ଯ୍ୟ କରିବା। ଶତୃକୁ ଟାର୍ଗେଟ କରି ଧ୍ବଂସ କରିବା କ୍ଷମତା ମଧ୍ୟ ଏହି ଡ୍ରୋନ ପାଖରେ ରହିଛି।
ରବୋବୋଟିକ ନେକ୍ସଟ୍ ଜେନେରେସନ ଡ୍ରୋନ
ଗତ ନଭେମ୍ବର ମାସରେ ଭାରତ ଓ ଇସ୍ରାଏଲ୍ ମଧ୍ୟରେ ସାମରିକ ଶକ୍ତିର ବିକାଶ ପାଇଁ ଏକ ଚୁକ୍ତି ସ୍ବାକ୍ଷରିତ ହୋଇଛି। ଏହି ଚୁକ୍ତି ମୁତାବକ ଭାରତ ଓ ଇସ୍ରାଏଲ ମିଶି ଡ୍ରୋନ୍, ରବୋଟିକ୍ସ, ଆର୍ଟିଫିସିଆଲ ଇଣ୍ଟେଲିଜେନ୍ସ, କ୍ବାଣ୍ଟମ କମ୍ପ୍ୟୁଟିଂ ବିକାଶ କରିବା ଦିଗରେ କାର୍ଯ୍ୟ କରିବେ। ଏହି ଦ୍ବିପାକ୍ଷିକ ଇନୋଭେସନ ଚୁକ୍ତି ଭାରତର ପ୍ରତିରକ୍ଷା ଅନୁସନ୍ଧାନ ଓ ବିକାଶ ସଂଗଠନ ଏବଂ ଇସ୍ରାଏଲର ପ୍ରତିରକ୍ଷା ଅନୁସନ୍ଧାନ ଓ ବିକାଶ ନିର୍ଦ୍ଦେଶାଳୟ ମଧ୍ୟରେ ସ୍ବାକ୍ଷରିତ ହୋଇଛି।
ଏହି ଚୁକ୍ତି ଅନୁଯାୟୀ ଦୁଇ ଦେଶରେ ସାମରିକ ଉପକରଣ ତିଆରି କରୁଥିବା ନୂଆ ଉଦ୍ୟୋଗ ଦିଗରେ ଉଭୟ ଦେଶ ମିଳିତ ଭାବରେ କାର୍ଯ୍ୟ କରିବେ। ଏଥିରେ ମୁଖ୍ୟତଃ ଡ୍ରୋନ୍, ରବୋଟିକ୍ସ, ଆର୍ଟିଫିସିଆଲ ଇଣ୍ଟେଲିଜେନ୍ସ, କ୍ବାଣ୍ଟମ କମ୍ପ୍ୟୁଟିଂ ଟେକ୍ନୋଲୋଜୀ ଫଟୋନିକସ, ବାୟୋସେନ୍ସିଂ, ବ୍ରେନ ମେସିନ ଇଣ୍ଟରଫେସ, ଏନର୍ଜି ଷ୍ଟୋରେଜ, ପରିଧାନ ଯୋଗ୍ୟ ଡିଭାଇସ, ପ୍ରାକୃତିକ ଭାଷା ପ୍ରକ୍ରିୟାକରଣକୁ ଅଗ୍ରାଧିକାର ଦିଆଯିବ। ଏହାକୁ ନେଇ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ଏକ ବିଜ୍ଞପ୍ତି ଜାରି କରି ସୂଚନା ଦିଆଯାଇଛି।
ଏହି ପ୍ରମୁଖ ଚୁକ୍ତିକୁ ଛାଡ଼ି ଭାରତ ସାମରିକ ବାହିନୀକୁ ଶକ୍ତିଶାଳୀ ଓ ଆତ୍ମନିର୍ଭରଶୀଳ କରିବା ପାଇଁ ମେକ୍ ଇନ୍ ଇଣ୍ଡିଆ (Make In India) ଉପରେ ଅଧିକ ଗୁରୁତ୍ବ ଦିଆଯାଇଥିଲା। ତା ସହିତ କେତେକ ଗୁରୁତ୍ବପୂର୍ଣ୍ଣ ଯୁଦ୍ଧାସ୍ତ୍ର, ସବମେରାଇନ ବା ବୁଡ଼ା ଜାହାଜ ମଧ୍ୟ ସେନାରେ ସାମିଲ ହୋଇଛି। ଯାହାଫଳରେ କୌଣସି ଶତ୍ରୁ ଦେଶ ଭାରତ ଉପରେ ଆଖି ପକାଇବା ଆଗରୁ ଭାବିବାକୁ ବାଧ୍ୟ ହେବ ।
INS କରଞ୍ଜ
2021 ମାର୍ଚ୍ଚ ମାସରେ ଭାରତୀୟ ନୌସେନାରେ ସାମିଲ ହେଲା ତୃତୀୟ kalavari-class ସବମେରାଇନ(Third kalavari-class submarine)। ଗୋଟିଏ ନୁହେଁ ଏହଭଳି ଭାବରେ 6ଟି ଭେରାଇଟି ସବମେରାଇନ ଭାରତୀୟ ନୌସେନାରେ ସାମିଲ ହୋଇଛି। ବିଛା ଆକୃତିରେ ତିଆରି ହୋଇଥିବା ଏହି ସବମେରାଇନ ମୁମ୍ବାଇର ନାଭାଲ ଡକୟାର୍ଡରେ ଭାରତୀୟ ନୌସେନାରେ ସାମିଲ ହୋଇଛି। ଏହି ଯାହାଜ ଚାଲିବା ବେଳେ କୌଣସି ଶବ୍ଦ ବାହାରେ ନାହିଁ। ଏହି ବୁଡ଼ା ଯାହାଜର ସ୍ଲୋଗାନ ହେଉଛି ନିତ୍ୟା ନିର୍ଘୋଷ ଓ ନିର୍ଭିକ। ଏହି ବୁଡ଼ା ଯାହାଜ 18 ଟର୍ପେଡୋସକୁ(ସବମେରାଇନ ପ୍ରତିଘାତ କରୁଥିବା ଏକ ବମ୍) ଏକା ସାଙ୍ଗରେ ନେଇ ପାରିବ।