ହାଇଦ୍ରାବାଦ:'ଗଣମାଧ୍ୟମ' ଏକ ଶବ୍ଦ ନୁହେଁ। ଏହା ଏକ କର୍ତ୍ତବ୍ୟ ଯାହା ଗଣତନ୍ତ୍ରର ଚତୁର୍ଥ ସ୍ତମ୍ଭ ହୋଇ ଦେଶବାସୀଙ୍କ ଦାୟିତ୍ବ ବହନ କରିଥାଏ । ଗଣମାଧ୍ୟମ ଆମର ଗଣତାନ୍ତ୍ରିକ ମୂଳଦୁଆକୁ ମଜବୁତ କରିଛି । ତାର ଭୂମିକା ଅତ୍ୟନ୍ତ ସୁଦୂରପ୍ରଚାରୀ ଏବଂ ପ୍ରଭାବଶାଳୀ । କଳୁଷିତ ସମାଜରେ ନିର୍ଭୟ କଲମ ମୁନରେ ନିଷ୍ଠାପରତାର ଗାଥା ଲେଖିଯାଏ । ଆଜି ଗଣମାଧ୍ୟମର ସ୍ବାଧିନତା ପାଇଁ ଦିନଟିଏ ଅର୍ଥାତ ବିଶ୍ବ ପ୍ରେସ ସ୍ବାଧିନତା ଦିବସ । ପ୍ରତି ବର୍ଷ ମେ 3 ତାରିଖକୁ ବିଶ୍ବ ପ୍ରେସ ସ୍ବାଧିନତା ଦିବସ ଭାବେ ପାଳନ କରାଯାଏ ।
ପ୍ରଗତିଶୀଳ ବିଶ୍ବର ସାମାଜିକ, ସାଂସ୍କୃତିକ, ରାଜନୈତିକ, ଅର୍ଥନୈତିକ ତଥା ବୈଜ୍ଞାନିକ ସ୍ଥିତି ସମ୍ପର୍କରେ ଜ୍ଞାତ ପାଇଁ ଗଣମାଧ୍ୟମ ହିଁ ସର୍ବଶ୍ରେଷ୍ଠ । ତାହାର ଗୁରୁତ୍ବ ବୃଦ୍ଧି ହୋଇଥାଏ ସାମ୍ବାଦିକଙ୍କ ନିଷ୍ଠା, ପ୍ରଚେଷ୍ଠା, ନିର୍ଭୀକତା, ନିରପେକ୍ଷତା ଓ ନ୍ୟାୟ ପନ୍ଥା ଦ୍ବାରା । ହେଲେ ଏବେ ଗଣତନ୍ତ୍ରର ଚତୁର୍ଥ ସ୍ତମ୍ଭ ଖଣ୍ଡାର ତୀକ୍ଷ୍ମ ଧାରରେ ପରିଚାଳିତ ହେଉଛି । ସତ୍ୟତାର ପରିବେଷଣ ବେଳେ ହିଂସା, ବର୍ବରୋଚିତ କାଣ୍ଡରେ ନିଷ୍ପେଷିତର ଶିକାର ହେବାକୁ ପଡୁଛି । ବାରମ୍ବାର ଚତୁର୍ଥସ୍ତମ୍ଭର ସ୍ବାଧିନତା ଉପରେ ଆକ୍ରମଣ ହେଉଛି । ଗଣମାଧ୍ୟମ ଓ ସାମ୍ବାଦିକଙ୍କ ସୁରକ୍ଷାକୁ ନେଇ ଅନେକ ନିୟମ ପ୍ରଣୟନ ହୋଇଥିଲେ ମଧ୍ୟ ଆଜି ମଧ୍ୟ ମୂଳ ସ୍ବାଧିନତା ବାଟକୁ ଚାହିଁ ବସିଛି ।