ନୂଆଦିଲ୍ଲୀ: ଗତକାଲି ଲୋକସଭାରେ ପାରିତ ହୋଇସାରିଥିବା ମହିଳା ସଂରକ୍ଷଣ ବିଲ୍ ଆଜି ରାଜ୍ୟସଭାରେ ଆଗତ ହୋଇଛି । ଏହା ଉପରେ ଆଜି ଚର୍ଚ୍ଚା ମଧ୍ୟ ଜାରି ରହିଛି । ତେବେ ଏହି ବହୁଚର୍ଚ୍ଚିତ ବିଲ୍କୁ ନେଇ ଶାସକ ବିରୋଧୀଙ୍କ ମଧ୍ୟରେ ବିତର୍କ କମ ଓ ଶ୍ରେୟ ନେବାର ପ୍ରତିଦ୍ବନ୍ଦ୍ବିତା ଅଧିକ ହେଉଥିବା ପରି ଦେଖିବାକୁ ମିଳିଛି । ଏହି ବିଲକୁ ନିଜର ମୌଳିକ ବିଚାର ଓ ଏକାଧିକ କଂଗ୍ରେସ ପ୍ରଧାନମନ୍ତ୍ରୀଙ୍କ କାର୍ଯ୍ୟକାଳରେ ଲାଗୁ କରିବା ପାଇଁ ପ୍ରୟାସ କରାଯାଇଥିବା କଂଗ୍ରେସ କହିଛି । ଆଜି ରାଜ୍ୟସଭାରେ ଚର୍ଚ୍ଚାରେ ଅଂଶଗ୍ରହଣ କରି ବରିଷ୍ଠ କଂଗ୍ରେସ ନେତା କେ.ସି ବେଣୁଗୋପାଲ କହିଛନ୍ତି, ଏହି ବିଲ କଂଗ୍ରେସର ମୌଳିକ ବିଚାର । ତେଣୁ ଦଳ ଏହାକୁ ଦୃଢ ସମର୍ଥନ କରିଛି । ବିଜେପି ହିଁ ଏହାକୁ କଂଗ୍ରେସ କାର୍ଯ୍ୟକାଳରେ ଏହାକୁ ବିରୋଧ କରିଥିଲା । ହେଲେ ଏବେ ଏହାକୁ ଲାଗୁ କରି ଶ୍ରେୟ ନେବାକୁ ପ୍ରୟାସ କରୁଛି ।
ବେଣୁଗୋପାଲ କହିଛନ୍ତି, କଂଗ୍ରେସ ସମୟରେ ଏହାକୁ ଲାଗୁ କରିବା ପାଇଁ ପ୍ରଥମେ 1989ରେ ପ୍ରକ୍ରିୟା ଗ୍ରହଣ କରାଯାଇଥିଲା । ଲାଲକୃଷ୍ଣ ଆଡଭାନୀ, ଅଟଳ ବିହାରୀ ବାଜପେୟୀଙ୍କ ପରି ଭାରତୀୟ ଜନତା ପାର୍ଟିର ଶୀର୍ଷ ନେତା ଏହି ବିଲ ବିପକ୍ଷରେ ଭୋଟ ଦେଇଥିଲେ । ତେବେ ସେମାନେ 2014ରେ କ୍ଷମତାକୁ ଆସିବା ପରେ ଏହାକୁ ଲାଗୁ କରିବା ପାଇଁ କହିଲେ । ହେଲେ କ୍ଷମତାକୁ ଆସିବାର ସାଢେ 9 ବର୍ଷ ପରେ ଏହାକୁ ଲାଗୁ କରିବା ପାଇଁ ପ୍ରକ୍ରିୟା ଆରମ୍ଭ କଲେ । ସେମାନଙ୍କୁ କି’ଏ ରୋକିଥିଲା । ସେମାନେ କେବଳ ମହିଳା ସଂରକ୍ଷଣ ବିଲର ଶ୍ରେୟ ନେବାକୁ ପ୍ରୟାସ କରୁଛନ୍ତି । ଏହି ବିଲ କଂଗ୍ରେସର ମୌଳିକ ବିଚାର । ସେଥିପାଇଁ ଏହାକୁ କଂଗ୍ରେସ ଦୃଢ ସମର୍ଥନ ଘୋଷଣା କରିସାରିଛି ।
ସେହିପରି କଂଗ୍ରେସର ଲିଙ୍ଗଗତ ସମାନତା ବିଚାରର ଉଦାହରଣ ଦେଇ ବେଣୁଗୋପାଲ କହିଥିଲେ, 1931 ମସିହାରେ ତତ୍କାଳୀନ କଂଗ୍ରେସ ନେତ୍ରୀ ସରୋଜିନୀ ନାଇଡୁ ତତ୍କାଳୀନ ବ୍ରିଟିଶ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଥିଲେ । ସେବେ ଠାରୁ ଏହି ବିଚାର କଂଗ୍ରେସ ମଧ୍ୟରେ ରହିଆସିଛି । ବିଜେପି ମହିଳାଙ୍କ ସଶକ୍ତିକରଣ କଥା କହୁଛି, ହେଲେ ସେମାନଙ୍କ ଦଳ ରାଷ୍ଟ୍ରୀୟ ସ୍ବଂୟସେବକ ସଂଘ ଦ୍ବାରା ପରିଚାଳିତ । ଯେଉଁଠାରେ ମହିଳା ନାହାନ୍ତି । ଯେତେବେଳେ କଂଗ୍ରେସ ଏହି ବିଲ ଆଗତ କରିଥିଲା, ବର୍ତ୍ତମାନର ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ତଥା ତତ୍କାଳୀନ ସାଂସଦ ଯୋଗୀ ଆଦିତ୍ୟନାଥ ଏହି ବିଲକୁ ପାରିପାରିବ ଅବଧାରଣା ତତ୍ତ୍ବ ପ୍ରଭାବିତ ହେବ କହି ବିରୋଧ କରିଥିଲେ । ଯାହାର ଏକ କପି ମଧ୍ୟ ରାଜ୍ୟସଭାରେ ବେଣୁଗୋପାଲ ଦେଖାଇଥିଲେ ।