ଥିରୁଅନନ୍ତପୁରମ:ଚାରିପଟେ ଘଞ୍ଚ ଜଙ୍ଗଲ, ପାଦେ ପାଦେ ହିଂସ୍ର ଜଙ୍ଗଲୀ ଜନ୍ତୁର ଭୟ । କେଉଁଠି ପଥୁରିଆ ରାସ୍ତା ତ ଆଉ କେଉଁଠି ସରୁ ଝରଣା । ପାଦ ଖସିଲେ କ୍ଷଣିକରେ ଚାଲିଯାଇପାରେ ଜୀବନ । ହେଲେ ଜୀବନକୁ ବା କେମିତି ଭୟ କରିବେ, କାରଣ ଭୟର ସେପାଖେ ଚାହିଁ ବସିଛନ୍ତି କୁନି କୁନି ଛାତ୍ର । ମିନି ଗୁରୁମା ଆସିବେ ଏବଂ ଆମକୁ ପାଠ ପଢାଇବେ । ତେଣୁ ପିଲାଙ୍କ ଭବିଷ୍ୟତ ପାଇଁ ଦୀର୍ଘ ୮ ବର୍ଷ ହେଲାଣି ଜଙ୍ଗଲ, ଝରଣା ଡେଇଁ ନିତି ୧୬ କିଲୋମିଟର ଯାତ୍ରା କରୁଛନ୍ତି ମିନି ଗୁରୁମା । ଆଜି ଅନ୍ତର୍ଜାତୀୟ ମହିଳା ଦିବସ ଅବସରରେ ଆମେ ଏପରି ଜଣେ ମହାନ୍ ଶିକ୍ଷୟିତ୍ରୀଙ୍କୁ ଭେଟ କରାଇବୁ, ଯିଏ ଆଦିବାସୀ ପିଲାଙ୍କ ଜୀବନ ଗଢିବାକୁ ନିଜ ଜୀବନ ବାଜି ଲଗାଇଛନ୍ତି ।
କେରଳ କୋଜହିକୋଡେ ଜିଲ୍ଲାର ଭେନ୍ଦାଥୁ ପୋୟିଲ ଅଞ୍ଚଳର ବାସିନ୍ଦା ଅଟନ୍ତି ମିନି । ସେ ଅମ୍ବୁମାଳା ସରକାରୀ ପ୍ରାଥମିକ ବିଦ୍ୟାଳୟରେ ଏକମାତ୍ର ଶିକ୍ଷୟିତ୍ରୀ ଭାବେ କାର୍ଯ୍ୟରତ । ୨୦୧୫ ମସିହାରେ ଅମ୍ବୁମାଳା ବିଦ୍ୟାଳୟର ପୂର୍ବତନ ଶିକ୍ଷକ ଇସ୍ତଫା ଦେବା ପରେ ମିନି ଶିକ୍ଷୟିତ୍ରୀ ଭାବେ ଯୋଗ ଦେଇଥିଲେ । ମିନି ସୂର୍ଯ୍ୟ ଉଇଁଲେ ଘର କାମ ସାରି ସ୍କୁଲ ଅଭିମୁଖେ ବାହାରି ଯାଆନ୍ତି । ପୁଣି ସୂର୍ଯ୍ୟ ନଇଁଲେ ଘଞ୍ଚ ଜଙ୍ଗଲ ଦେଇ ଘରକୁ ଫେରନ୍ତି । ତାଙ୍କ ଘର ଠାରୁ ଦୀର୍ଘ ୮ କିଲୋମିଟର ଦୂରରେ ପଡେ ଅମ୍ବୁମାଳା ବିଦ୍ୟାଳୟ । ବିଦ୍ୟାଳୟ ବାଟରେ ଘଞ୍ଚ ଜଙ୍ଗଲ ଓ ଝରଣା ପଡେ । ହେଲେ ୭ ବର୍ଷ ହେଲାଣି ମିନି ଗୁରୁମା ପ୍ରତିଦିନ ୧୬ କିଲୋମିଟର ବାଟ ଚାଲି ସ୍କୁଲକୁ ଯାତାୟତ କରୁଛନ୍ତି ।
ମିନି ଗୁରୁମାଙ୍କ ସ୍କୁଲରେ ୬ରୁ ୧୦ ବର୍ଷର ୧୦ଟି ଆଦାବାସୀ ପିଲା ପାଠ ପଢୁଛନ୍ତି । ଆଦିବାସୀ ଆଧ୍ୟୁଷିତ ଅଞ୍ଚଳରେ ଥିବା ଏହି ସ୍କୁଲରେ ସେ ଏକମାତ୍ର ଶିକ୍ଷୟିତ୍ରୀ ଅଟନ୍ତି । ତେଣୁ ପିଲାଙ୍କ ଠାରୁ ନେଇ ତାଙ୍କ ଅଭିଭାବକ ପର୍ଯ୍ୟନ୍ତ ପ୍ରତିଦିନ ମିନି ଗୁରୁମାଙ୍କ ବାଟକୁ ଚାତକ ଭଳି ଚାହିଁ ରହିଥାନ୍ତି । ହେଲେ ବଡ କଥା ହେଉଛି, ଆଜକୁ ୫ ମାସ ହେଲାଣି ମିନି ଦରମା ପାଇନାହାନ୍ତି । କିଛି ମାସ ହେଲା ସ୍କୁଲକୁ ପିଲାଙ୍କ ମଧ୍ୟାହ୍ନ ଭୋଜନ ବାବଦ ଟଙ୍କା ମଧ୍ୟ ଆସୁନି । ତା' ଉପରେ ପୁଣି ସ୍କୁଲରେ ପହଞ୍ଚିବା ପାଇଁ ଦୁର୍ଗମ ରାସ୍ତା ଓ ବନ୍ୟଜନ୍ତୁଙ୍କ ଆତଙ୍କ । ଏସବୁ ବାଧାବିଘ୍ନ ସତ୍ତ୍ବେ ବି କେବେ ଅଟକି ନାହାନ୍ତି ମିନି ଗୁରୁମା । ଆଦିବାସୀ ପିଲାଙ୍କ ଉଜ୍ଜଳ ଭବିଷ୍ୟତ ପାଇଁ ସେ ନିତିଦିନ ୧୬ କିଲୋମିଟର ଚାଲୁଛନ୍ତି । ଶିକ୍ଷୟିତ୍ରୀ ରୂପେ କର୍ତ୍ତବ୍ୟ ସମ୍ପାଦନ କରିବା ପରେ ପୁଣି ମାଇଲ ମାଇଲ ବାଟ ପାର୍ କରି ଗୃହିଣୀ ରୂପେ ଘର କାମ କରନ୍ତି ।