ହାଇଦ୍ରାବାଦ:କର୍ଣ୍ଣାଟକ ବିଧାନସଭା ନିର୍ବାଚନରେ ଐତିହାସିକ ବିଜୟ ପରେ କଂଗ୍ରେସ ନେତା ରାହୁଲ ଗାନ୍ଧୀ ଭିନ୍ନ ଢଙ୍ଗରେ ବିଜେପିକୁ ଟାର୍ଗେଟ କରିଥିଲେ । ରାଜ୍ୟରେ ଘୃଣାର ବଜାର ବନ୍ଦ ହୋଇଛି । ପ୍ରେମର ଦୋକାନ (ମହବୋତ୍ କି ଦୁକାନ) ଖୋଲିଛି ବୋଲି କହି ବିଜେପିକୁ ପରୋକ୍ଷରେ ଘୃଣା ସୃଷ୍ଟିକାରୀ ବୋଲି ସମାଲୋଚନା କରିଥିଲେ ରାହୁଲ ଗାନ୍ଧୀ । ଏବେ ରାହୁଲଙ୍କ ସେହି ଉପାଖ୍ୟାନକୁ ନେଇ ବିଜେପିର ବରିଷ୍ଠ ନେତ୍ରୀ ତଥା କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ଟାର୍ଗେଟ କରିଛନ୍ତି । ଏକାଧିକ ପ୍ରସଙ୍ଗରେ ସେ କଂଗ୍ରେସକୁ ଟାର୍ଗେଟ କରି କ’ଣ ଏହା ‘ମହବତ କୀ ଦୁକାନ’ ବୋଲି ପ୍ରଶ୍ନ କରିଛନ୍ତି ।
ନୂଆ ସଂସଦ ଲୋକାର୍ପଣକୁ ବର୍ଜନ କରିବା କ’ଣ ମହବତ କି ଦୁକାନ କି ବୋଲି ପ୍ରଶ୍ନ କରିଛନ୍ତି ଇରାନୀ । କେବଳ ଗୋଟିଏ ପ୍ରସଙ୍ଗ ନୁହେଁ, କଂଗ୍ରେସ ମହବତ କି ଦୁକାନର କଥା କହୁଥିବା ବେଳେ ଶିଖ୍ ଗଣହତ୍ୟା କଥା କାହିଁକି କହୁନାହିଁ । ଯେଉଁମାନେ କୋଇଲା ଓ ଚାରା ଦୁର୍ନୀତିରେ ସମ୍ପୃକ୍ତ, କଂଗ୍ରେସ ସେମାନଙ୍କୁ ସମର୍ଥନ ଦେଇଛି । କଂଗ୍ରେସ ସେଙ୍ଗୋଲକୁ ମଧ୍ୟ ସମ୍ମାନ ଦେଇନି । ‘କେରଳ ଷ୍ଚୋରୀ’ ପ୍ରସଙ୍ଗରେ ନୀରବତା ଧାରଣ କରିଛି । କଂଗ୍ରେସ ଶାସିତ ରାଜସ୍ଥାନରେ ଦୁଷ୍କର୍ମ ମାମଲା ବଢିବାରେ ଲାଗିଛି । ତେବେ ଏହା କେଉଁ ପ୍ରକାର ମହବତ କି ଦୁକାନ ବୋଲି ଇରାନୀ କଡ଼ା ଭାଷାରେ ପ୍ରଶ୍ନ କରିଛନ୍ତି ।
ସେହିପରି ଭାରତୀୟ ଜନତା ପାର୍ଟି ଏକ ମୁସଲିମ ବିରୋଧୀ ଦଳ ବୋଲି ବିରୋଧୀ କରୁଥିବା ଅଭିଯୋଗ ନେଇ ଜଣେ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନରେ ଇରାନୀ କହିଛନ୍ତି, ଦେଶରେ ସମସ୍ତଙ୍କ ବିକାଶକୁ ନିଶ୍ଚିତ କରିବା ସରକାରଙ୍କ ପ୍ରାଥମିକ କାର୍ଯ୍ୟ । କଂଗ୍ରେସ ଶାସନ ସମୟରେ ମୁସଲିମ ସମ୍ପ୍ରଦାୟର ବିକାଶ ଲାଗି ଯେତିକି ଅର୍ଥ ବରାଦ ହୋଇଥିଲା ମୋଦି ସରକାରରେ ତାହା ଯଥେଷ୍ଟ ବୃଦ୍ଧି ପାଇଛି ।