ନୂଆଦିଲ୍ଲୀ:ମହାମାରୀ କୋରୋନାର ତୃତୀୟ ଲହରୀକୁ ନେଇ ଆଶଙ୍କା ଘନେଇବାରେ ଲାଗିଛି । ଏହାରି ମଧ୍ୟରେ ଦେଶବାସୀଙ୍କୁ ସତର୍କ ରହିବାକୁ କହିଛି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ । ଆଗାମୀ ୧୦୦ରୁ ୧୨୫ ଦିନ ବେଶ ଗୁରୁତ୍ବପୂର୍ଣ୍ଣ ରହିବ ବୋଲି ସ୍ବାସ୍ଥ୍ୟମନ୍ତ୍ରଣାଳୟ ପକ୍ଷରୁ ଦିଆଯାଇଛି ଚେତାବନୀ ।
ନିକଟରେ ଦେଶରେ କୋରୋନା ସଂକ୍ରମଣ ହାରରେ ଧିରେ ଧିରେ ହ୍ରାସ ପରିଲକ୍ଷିତ ହେଉଛି । ହେଲେ ଏହାକୁ ସମ୍ଭାବିତ ତୃତୀୟ ଲହରୀର ଚେତାବନୀ ଭାବରେ ବୁଝବାକୁ କହିଛି କେନ୍ଦ୍ର ।
ନୀତି ଆୟୋଗ ସଦସ୍ୟ ଡାକ୍ତର ଭି.କେ ପାଲ କହିଛନ୍ତି, କୋରୋନାର ତୃତୀୟ ଲହରୀ ବିଷୟରେ ଆଲୋଚନା ହେଉଛି କାରଣ ଏପର୍ଯ୍ୟନ୍ତ ଶକ୍ତ ରୋଗପ୍ରତିରୋଧକ ଶକ୍ତି ପହଞ୍ଚି ନାହିଁ। ବହୁ ଜନସଂଖ୍ୟା ସଂକ୍ରମଣର ବିପଦରେ ରହିଛନ୍ତି । ମାମଲାର ହ୍ରାସ ଯୋଗୁଁ ସଂକ୍ରମଣ ଗତି ମନ୍ଥର ହୋଇଯାଇଛି ।
ପରିସ୍ଥିତି ଯେଭଳି ଖରାପ ନହେଉ, ଏଥିପାଇଁ କୋଭିଡ ସମ୍ବନ୍ଧୀୟ ନିୟମାବଳୀ ପାଳନ କରିବା ଗୁରୁତ୍ୱପୂର୍ଣ୍ଣ । ଡାକ୍ତର ପାଲ କହିଛନ୍ତି, ଆଗାମୀ ୧୦୦ରୁ ୧୨୫ ଦିନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିବ । ତେଣୁ ସମସ୍ତଙ୍କୁ ସତର୍କ ରହିବାକୁ ପଡ଼ିବ ଏବଂ ଦାୟିତ୍ୱ ଗ୍ରହଣ କରିବାକୁ ପଡ଼ିବ ।
ସେପଟେ କୋରୋନା ନୂଆ ଭ୍ୟାରିଆଣ୍ଟ ସାରା ବିଶ୍ବରେ ବ୍ୟାପିବାର ଆଶଙ୍କା ରହିଥିବା ଚେତାବନୀ ଦେଇଛି ବିଶ୍ବ ସ୍ବାସ୍ଥ୍ୟ ସଂଗଠନର ଜରୁରୀକାଳୀନ କମିଟି । ମହାମାରୀ କେଉଁଠାରେ ବି ଶେଷ ହୋଇନାହିଁ । ନୂତନ ତଥା ସମ୍ଭାବ୍ୟ ରୂପରୁ ବିପଜ୍ଜନକ ସ୍ବରୂପ ବିଶ୍ବବ୍ୟାପୀ କାୟା ବିସ୍ତାର ହେବାର ଦୃଢ ଆଶଙ୍କା ରହିଥିବା କମିଟି କହିଛି । ଏହା ଆହୁରି ଚ୍ୟାଲେଞ୍ଜ ହୋଇପାରେ ବୋଲି କୁହାଯାଉଛି ।
ଟୀକାକରଣ ବିନା ଯାତ୍ରୀମାନଙ୍କ ପ୍ରବେଶକୁ ନିଷେଧ କରୁଥିବା ନିୟମପର ବିତର୍କ ଉପରେ କମିଟି ନିଜର ଆଭିମୁଖ୍ୟ ବଜାୟ ରଖିଛି । ଅନ୍ତର୍ଜାତୀୟ ଯାତ୍ରା ପାଇଁ କୋଭିଡ -19 ଟୀକାକରଣର ପ୍ରମାଣ ଆବଶ୍ୟକ ନୁହେଁ ବୋଲି କହିଛି WHO ।
