ବେଙ୍ଗାଲୁରୁ: ଚନ୍ଦ୍ରଯାନ 3 ଉତକ୍ଷେପଣ ବେଳେ ସେହି ସ୍ବର କାନରେ ବାଜୁଥାଏ । 10,9,8...1,0ର ସେହି କାଉନଡାଉନ ସହ 140 କୋଟି ଭାରତୀୟଙ୍କ ନଜର ଟିଭି ପରଦାରେ ଥାଏ । ଗୋଟିଏ ପଟେ ସେହି ସ୍ବର ଆଗକୁ ବଢୁଥାଏ ତ ଭାରତବାସୀଙ୍କ ହୃଦସ୍ପନ୍ଦର ବଢୁଥାଏ । ହେଲେ ଆଜି ସେହି ସ୍ବର ନୀରବି ଯାଇଛି । ଚନ୍ଦ୍ରଯାନ 3 ଲଞ୍ଚର କାଉଣ୍ଟଡାଉନ କରିଥିବା ସ୍ବର ଆଉ ଶୁଣିବାକୁ ମିଳିବ ନାହିଁ । ଚନ୍ଦ୍ରଯାନ 3 ସମେତ ଅନେକ ସାଟେଇଲାଇଟ ଲଞ୍ଚ କାଉନଡାଉନ ସମୟରେ ସ୍ବର ଦେଇଥିବା ସେହି ଇସ୍ରୋ ମହିଳା ବୈଜ୍ଞାନିକ ଏନ ଭଲରମଥିଙ୍କ ପରଲୋକ ହୋଇଛି । ହୃଦଘାତରେ ତାଙ୍କର ଦେହାନ୍ତ ହୋଇଥିବା ସୂଚନା ମିଳିଛି । ଶେଷ ଥର ପାଇଁ ସେ ଇସ୍ରୋର ତୃତୀୟ ମୁନ ମିଶନ ଚନ୍ଦ୍ରଯାନ-3 ଉତକ୍ଷେପଣରେ କାଉଣ୍ଟଡାଉନ ସ୍ବର ଦେଇଥିଲେ ।
ତାମିଲନାଡୁର ଅରିୟାଲୁର ନିବାସୀ ଏନ ଭଲରମଥି ଅଚାନକ ଛାତିରେ ଯନ୍ତ୍ରଣା ଅନୁଭବ କରିଥିଲେ । ତାଙ୍କୁ ତୁରନ୍ତ ପରିବାର ଲୋକ ଡାକ୍ତରଖାନାରେ ଭର୍ତ୍ତି କରିଥିଲେ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତାଙ୍କ ବିୟୋଗରେ ପୂର୍ବତନ ଇସ୍ରୋ ନିର୍ଦ୍ଦେଶକ ପିଭି ଭେଙ୍କଟକ୍ରିଷ୍ଣା ଶୋକ ପ୍ରକାଶ କରି ଚନ୍ଦ୍ରଯାନ-3 ଉତକ୍ଷେପଣ କାଉଣ୍ଟଡାଉନ ତାଙ୍କ ଶେଷ ଘୋଷଣା ଥିଲା । ତାଙ୍କ ବିୟୋଗକୁ ସହଜରେ ଗ୍ରହଣ କରି ହେଉନାହିଁ ବୋଲି କହିଛନ୍ତି । ଅନେକ ସୋସିଆଲ ମିଡିଆ ବ୍ୟବହାରକାରୀ ଇସ୍ରୋ ବୈଜ୍ଞାନିକ ଏନ ଭଲରମଥିଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି ।
ପିଲାଦିନୁ ବୈଜ୍ଞାନିକ ହେବାର ସ୍ବପ୍ନ ଦେଖୁଥିବା ଏନ ଭଲରମଥି ଇଞ୍ଜିନିୟରିଂ ପାଠପଢା ପରେ ଇସ୍ରୋରେ ବୈଜ୍ଞାନିକ ଭାବେ ଯୋଗ ଦେଇଥିଲେ । ଅନେକ ରିସର୍ଚ୍ଚ ଓ ସାଟେଲାଇଟ ଉତକ୍ଷେପଣରେ ସାମିଲ ହୋଇ ଉତକ୍ଷେପଣରେ ଓଲଟା ଗଣତିରେ ନିଜର ଦମଦାର ସ୍ବର ଦେଇ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ । ସବୁ ଲଞ୍ଚିଂ ସମୟରେ ତାଙ୍କୁ ଖୋଜା ପଡୁଥିଲା । ତାଙ୍କର ସେହି ସ୍ବର ଲଞ୍ଚଂ ସମୟରେ ଅଧିକ ରୋମାଞ୍ଚ ଭରି ଦେଉଥିଲା ହେଲେ ଆଉ ସେ ସ୍ବର ଶୁଭିବ ନାହିଁ । ସବୁ ଦିନ ପାଇଁ ସ୍ବର ନୀରବି ଯାଇଛି ।