ମୁମ୍ବାଇ:ଆପତ୍ତିଜନକ ଇନଷ୍ଟାଗ୍ରାମ ପୋଷ୍ଟକୁ ନେଇ ମହାରାଷ୍ଟ୍ରରେ ଭୟଙ୍କର ଗୋଷ୍ଠୀ ସଂଘର୍ଷ ହୋଇଛି । ଦୁଇ ଗୋଷ୍ଠୀ ମଧ୍ୟରେ ପଥରମାଡ ଓ ବ୍ୟାପକ ଭଙ୍ଗାରୁଜା ଯୋଗୁଁ ଜଣକର ମୃତ୍ୟୁ ହୋଇଛି । ଏଥିରେ ଦୁଇ ଜଣ ପୋଲିସ କର୍ମୀଙ୍କ ସମେତ ୮ ଜଣ ଆହତ ହୋଇଛନ୍ତି । ଗତକାଲି (ଶନିବାର) ରାତିରେ ମହାରାଷ୍ଟ୍ର ଅକୋଲା ଅନ୍ତର୍ଗତ ସିଟି ପୋଲିସ ଷ୍ଟେସନ ନିକଟରେ ଏହି ହିଂସା ଦେଖିବାକୁ ମିଳିଛି । ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଉଗ୍ର ରୂପ ଧାରଣ କରିବା ପରେ ପୋଲିସ ସମଗ୍ର ଅଞ୍ଚଳରେ ୧୪୪ ଧାରା ଜାରି କରିଛି ।
ସଂଘର୍ଷର ସମୟର ଅନେକ ଦୃଶ୍ୟ ସୋସିଆଲ ମିଡିଆରେ ଘୁରି ବୁଲୁଛି । ଯେଉଁଥିରେ ଉତ୍ୟକ୍ତ ଲୋକେ ଭଙ୍ଗାରୁଜା ଓ ପୋଡାଜଳା କରୁଥିବା ଦେଖାଯାଉଛି । ଅକୋଲା ଏସପି କହିବା ଅନୁସାରେ ସାମାନ୍ୟ ଘଟଣାକୁ ନେଇ ଦୁଇ ଗୋଷ୍ଠୀ ମଧ୍ୟରେ ଏହି ସଂଘର୍ଷ ହୋଇଛି । ଉଭୟ ଗୋଷ୍ଠୀ ପରସ୍ପର ଉପରେ ପଥରମାଡ କରିବା ସହ ପୋଡାଜଳା ଓ ଗାଡିମୋଟର ଭଙ୍ଗାରୁଜା କରିଛନ୍ତି । ଗୋଟିଏ ଗୋଷ୍ଠୀର ଲୋକେ ଅନ୍ୟ ଗୋଷ୍ଠୀର ଧାର୍ମିକ ଭାବନକୁ ଆଘାତ ଦେବା ଅଭିଯୋଗରେ ଏପରି ତୁମୁଳକାଣ୍ଡ ଘଟିଥିବା ଜଣାପଡିଛି ।
ସୂତ୍ରରୁ ପ୍ରାପ୍ତ ସୂଚନା ମୁତାବକ, ଗୋଟିଏ ଗୋଷ୍ଠୀ ଜଣେ ଧାର୍ମିକ ନେତାଙ୍କ ସମ୍ପର୍କରେ ଇନଷ୍ଟାଗ୍ରାମରେ ଆପତ୍ତି ଜନକ ପୋଷ୍ଟ କରିଥିଲେ । ଏହାକୁ ନେଇ ଗତ ରାତିରେ କିଛି ଲୋକେ ଅକୋଲା ସ୍ଥିତ ସିଟି ପୋଲିସ ନିକଟରେ ରୁଣ୍ଡ ହୋଇଥିଲେ । ଏତିକି ବେଳେ ଅନ୍ୟ ସମ୍ପ୍ରଦାୟର ଲୋକେ ସେଠାରେ ପହଞ୍ଚିବା ପରେ ତୀବ୍ର ଉତ୍ତେଜନା ସୃଷ୍ଟି ହୋଇଥିଲା । ଉଭୟ ଗୋଷ୍ଠୀ ପରସ୍ପର ଉପରେ ପଥରମାଡ କରିବା ପରେ ଭୀଷଣ ସଂଘର୍ଷ ହୋଇଥିଲା ।