ଡେରାଡୁନ: ଆଶା କରାଯାଉଥିଲା ଆଜି (ଶୁକ୍ରବାର) ସନ୍ଧ୍ୟା ସୁଦ୍ଧା ମିଳିବ ଖୁସି ଖବର । ଦୀର୍ଘ ୧୩ ଦିନର ଅପରେସନ ସଫଳ ହେବ । ହେଲେ ପୁଣି ଉଦ୍ଧାରକାର୍ଯ୍ୟରେ ଉପୁଜିଛି ବାଧା । ଅଗର ମେସିନରେ ଶୁକ୍ରବାର ସନ୍ଧ୍ୟାରେ ଯାନ୍ତ୍ରିକ ତ୍ରୁଟି ଯୋଗୁଁ ୫୧ ମିଟରରେ ଅଟକିଛି ଡ୍ରିଲିଂ କାମ । ଏହାପରେ ସଙ୍ଗେ ସଙ୍ଗେ ଟନେଲ ମଧ୍ୟରେ ବସିଛି ଗୁରୁତ୍ବପୂର୍ଣ୍ଣ ବୈଠକ । ବାରମ୍ବାର ଅଗର ମେସିନ ଆଗରେ କିଛି ଲୁହା ପଡ଼ିଯାଉଥିବାରୁ ଅପରେସନ କାର୍ଯ୍ୟରେ ବାଧା ଉପୁଜୁଛି । ୪୧ ଜଣ ଶ୍ରମିକ ୬୦ମିଟର ସୁଡଙ୍ଗ ଭିତରେ ଫସି ରହିଛନ୍ତି ।
ସିଲକ୍ୟାରା ଟନେଲରେ ଗତ ନଭେମ୍ବର ୧୨ ତାରିଖରୁ ଆଜକୁ ୧୩ ଦିନ ଧରି ୪୧ ଜଣ ଶ୍ରମିକ ଫସି ରହିଥିବା ବେଳେ ଯୁଦ୍ଧକାଳୀନ ଭିତ୍ତିରେ ଚାଲିଛି ଉଦ୍ଧାର କାର୍ଯ୍ୟ । ଏହି କାର୍ଯ୍ୟରେ ଅନେକ ବାଧା ଆସୁଥିଲେ ସୁଦ୍ଧା ତାହାକୁ ତୁରନ୍ତ ସମାଧାନ କରାଯାଇ ଡ୍ରିଲିଂ ଜାରି ରହିଛି । ଅପରାହ୍ନ ସୁଦ୍ଧା ପ୍ରାୟ ୪୭ ମିଟର ପର୍ଯ୍ୟନ୍ତ ଡ୍ରିଲିଂ ହୋଇଥିଲା । ଏହାପରେ ଗ୍ରାଉଣ୍ଡ ପେନିଟ୍ରେସନ ରାଡାରରୁ ଜଣାପଡ଼ିଥିଲା ଯେ ଆସନ୍ତା ୫ ମିଟର ପର୍ଯ୍ୟନ୍ତ କୌଣସି ଅସୁବିଧା ଉପୁଜିବ ନାହିଁ । ଏହାପରେ ଡ୍ରିଲିଂ ଜାରି ହେବା ପରେ ପାଇପ ୫୧ ମିଟର ପର୍ଯ୍ୟନ୍ତ ପହଞ୍ଚିଥିଲା । ହେଲେ ଏହାପରେ ପୁଣି ଅଗର ମେସିନ ଆଗରେ କିଛି ଲୁହା ଧାତୁ ଫସିଯାଇଛି । ଫଳରେ ଆଗକୁ ଆଉ ଡ୍ରିଲିଂ ହୋଇପାରୁନାହିଁ ।
ଏହା ବି ପଢନ୍ତୁ- ଶେଷ ପର୍ଯ୍ୟାୟରେ ଉତ୍ତରକାଶୀ ଟନେଲ ରେସ୍କ୍ୟୁ, ଆଉ ୧୨ମିଟର ଡ୍ରିଲିଂ ବାକି
ଏହାପରେ ଟନେଲ ମଧ୍ୟରେ ବସିଛି ଗୁରୁତ୍ବପୂର୍ଣ୍ଣ ବୈଠକ । ଅଗର ମେସିନ ଆଗରେ ଅଟକିଥିବା ଧାତୁକୁ କାଢିବା ଲାଗି ଜିଓଫିଜିସିଷ୍ଟଙ୍କୁ ଡକାଯାଇଛି । ଏବେ ଗ୍ରାଉଣ୍ଡ ପେନିଟ୍ରେସନ ରାଡାର (GPR)ର ବ୍ୟବହାର କରାଯିବ ବୋଲି ଜିଓଫିଜିସିଷ୍ଟ କହିଛନ୍ତି । ଏଯାବତ ୫୧ ମିଟର ପର୍ଯ୍ୟନ୍ତ ଡ୍ରିଲିଂ ହୋଇଥିବା ବେଳେ ୬୦ ମିଟର ସୁଡଙ୍ଗ ଭିତରେ ଫସିଛନ୍ତି ୪୧ ଶ୍ରମିକ । ସେପଟେ ଆଜି ଅପରାହ୍ନ ସମୟରେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଟନେଲ ନିକଟରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ ।
ସୂଚନା ଥାଉ କି ଗତକାଲି (ଗୁରୁବାର) ଅଗର ମେସିନରେ ଯାନ୍ତ୍ରିକ ତ୍ରୁଟି ଯୋଗୁଁ କାମ ଅଧାରେ ଅଟକିଥିଲା । ଗ୍ରାଉଣ୍ଡରେ ଉପସ୍ଥିତ ଥିବା ପିଏମଓର ପୂର୍ବତନ ପରାମର୍ଶଦାତା ଭାସ୍କର ଖୁଲବେଙ୍କ କହିବାନୁସାରେ ଗୁରୁବାର ରାତିରେ ଯେତେବେଳେ ଉଦ୍ଧାର କାର୍ଯ୍ୟ ଅଟକି ରହିଥିଲା ସେତେବେଳେ ସେମାନେ ୨ଟି ଜିନିଷ ଉପରେ ଫୋକସ କରିଥିଲେ । ପ୍ରଥମରେ ମେସିନର ପ୍ଲାଟଫର୍ମକୁ ନୂଆ ରୂପ ଦିଆଯାଇଥିବା ବେଳେ ଦ୍ବିତୀୟରେ ଗ୍ରାଉଣ୍ଡ ପେନିଟ୍ରେସନ ରାଡାର ଉପରେ କାମ ହୋଇଥିଲା । ଏହି ଜିପିଆରର ବ୍ୟବହାର ଦ୍ବାରା ବାକି ଥିବା ରାସ୍ତାରେ କୌଣସି ଧାତୁ ରହିଛି କି ନାହିଁ ସେ ସମ୍ପର୍କରେ ବିଶେଷଜ୍ଞ ଟିମ ଅବଗତ ହୋଇପାରୁଥିଲେ । ଏହି ଉଦ୍ଧାର କାର୍ଯ୍ୟରେ ବାରମ୍ବାର ବାଧା ଉପୁଜିଥିବାରୁ ଏହି ଅପରେସନ କେତେବେଳେ ଶେଷ ହେବ ତାହା ସ୍ପଷ୍ଟ ଭାବେ କୁହାଯାଇପାରୁନାହିଁ । ହେଲେ ଫସି ରହିଥିବା ଶ୍ରମିକଙ୍କ ନିକଟରେ ପହଞ୍ଚିବାକୁ ଆଉ କମ ରାସ୍ତା ଥିବାରୁ ଖୁବଶୀଘ୍ର ଦେଶକୁ ଖୁସି ଖବର ମିଳିବ ବୋଲି ଆଶା କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
