ଲକ୍ଷ୍ନୌ:ଜ୍ଞାନବ୍ୟାପୀ ମସଜିଦ କମ୍ପଲେକ୍ସରେ ଭାରତୀୟ ପ୍ରତ୍ନତାତ୍ବିକ ବିଭାଗ ସର୍ଭେ କରିବ କି ନାହିଁ, ତାହା ଆସନ୍ତା ମାସ 3 ତାରିଖରେ ଆହ୍ଲାବାଦ କୋର୍ଟଙ୍କ ରାୟ ଉପରେ ନିର୍ଭର କରୁଛି । ହେଲେ ଏହା ପୂର୍ବରୁ ଏହି ପ୍ରସଙ୍ଗରେ ଏକ ବଡ ବୟାନ ଦେଇଛନ୍ତି ଉତ୍ତର ପ୍ରଦେଶ ମୁଖ୍ଯମନ୍ତ୍ରୀ ଯୋଗୀ ଆଦିତ୍ଯନାଥ । ମୁସଲିମ ପକ୍ଷ ଐତିହାସିକ ଭୁଲକୁ ସ୍ବୀକାର କରିବା ଆବଶ୍ୟକ । ନିଜେ ଏହି ଭୁଲର ସମାଧାନ କରିବା ପାଇଁ ସେମାନଙ୍କ ପକ୍ଷରୁ ପ୍ରସ୍ତାବ ଆସିବା ଆବଶ୍ୟକ । ଯଦି ଏହାକୁ ମସଜିଦ ବୋଲି କୁହାଯିବ, ତେବେ ବିବାଦ ହେବ ବୋଲି କହିଛନ୍ତି ଯୋଗୀ ।
ଆଜି ଜାତୀୟ ଖବର ସରବରାହ ସଂସ୍ଥା ANIକୁ ଦେଇଥିବା ସାକ୍ଷାତକାରରେ ମୁଖ୍ଯମନ୍ତ୍ରୀ ଯୋଗୀ ଏହି ବହୁଚର୍ଚ୍ଚିତ ପ୍ରସଙ୍ଗରେ ରୋକଠୋକ ଏହି ବଡ ବୟାନ ଦେଇଛନ୍ତି । କହିଛନ୍ତି,‘‘ମସଜିଦ ବୋଲି କହିଲେ ହିଁ ବିବାଦ ହେବ । ଯଦି ମସଜିଦ କୁହାଯିବ ତେବେ ଏହା ଭିତରେ ତ୍ରିଶୂଳ କେଉଁଠୁ ଆସିଲା । ଏହା ତ ଆମ ଦ୍ବାରା ରଖାଯାଇନି । କମ୍ପେଲେକ୍ସର କାନ୍ଥରେ ଦେବୀ ଦେବତାଙ୍କ ପ୍ରତିମା ରହିଛି । ପୁରା କମ୍ପଲେକ୍ସ ଚିତ୍କାର କରି ସତ କଣ କହୁଛି । ଯେଉଁ ଐତିହାସିକ ଭୁଲ ହୋଇଛି, ସେ ନେଇ ମୁସଲିମ ପକ୍ଷ ସ୍ବୀକାର କରିବା ଦରକାର ଓ ସମାଧାନ ପାଇଁ ନିଜ ଆଡୁ ପ୍ରସ୍ତାବ ରଖିବା ଆବଶ୍ୟକ ।’’
ତେବେ ଯୋଗୀଙ୍କ ମନ୍ତବ୍ୟ ଆସିବା ପରେ ଏଆଇଏମଆଇଏମ ସାଂସଦ ଅସଦୁଦ୍ଦିନ ଓବେସୀ କହିଛନ୍ତି, କୋର୍ଟରେ ଏହି ରାୟ ପ୍ରକାଶ ପାଇବା ପୂର୍ବରୁ ମୁଖ୍ୟମନ୍ତ୍ରୀ ଯୋଗୀ ଏପରି ମନ୍ତବ୍ୟ ଦେବା ଉଚିତ ନୁହେଁ । ସେମାନେ ନିୟମର ପାଳନ କରିବା ଉଚିତ । ସେଠାରେ 4 ଶହ ବର୍ଷ ପୂର୍ବରୁ ମସଜିଦ ରହିଛି । କୋର୍ଟଙ୍କ ରାୟକୁ ଅପେକ୍ଷା କରିବା ଉଚିତ ।