ଅହମ୍ମଦାବାଦ: ଦେଶରେ କ୍ରୀଡ଼ା ଇକୋସିଷ୍ଟମ ବିକଶିତ କରିବା ଏବଂ ଭାରତକୁ ବିଶ୍ବର ୧୦ଟି ଶ୍ରେଷ୍ଠ କ୍ରୀଡ଼ା ରାଷ୍ଟ୍ର ମଧ୍ୟରେ ସାମିଲ କରିବା ଲାଗି କେନ୍ଦ୍ର ଏବଂ ରାଜ୍ୟ ସରକାରଙ୍କ ମଧ୍ୟରେ ମିଳିତ ପ୍ରୟାସର ଆବଶ୍ୟକତା ରହିଛି ବୋଲି କହିଛନ୍ତି କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର । ଗୁଜରାଟର କେୱଡ଼ିଆ ଠାରେ ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶର ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀମାନଙ୍କର ଜାତୀୟ ସମ୍ମିଳନୀର ଉଦଘାଟନୀ ଅଧିବେଶନରେ ଅଧ୍ୟକ୍ଷତା କରି ମନ୍ତ୍ରୀ ଠାକୁର ଏହା କହିଛନ୍ତି ।
ମନ୍ତ୍ରୀ କହିଥିଲେ ରାଜ୍ୟ ଓ କେନ୍ଦ୍ର ସରକାର ମିଶି ଯୋଜନା ଓ ଭିତ୍ତିଭୂମି ବ୍ୟବସ୍ଥା କରିବା ସହିତ ମିଳିତ ଭାବେ ପ୍ରତିଯୋଗିତା ଓ କ୍ରୀଡ଼ା କାର୍ଯ୍ୟକ୍ରମ ଆୟୋଜନ କଲେ ଖେଳ ଓ ଖେଳାଳୀମାନେ ଆଗେଇ ପାରିବେ । ଏଥିପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ଟିମ ଇଣ୍ଡିଆ ଭାବନା ନେଇ କାର୍ଯ୍ୟ କରିବା ଉଚିତ । ଏଥିପାଇଁ ରାଜ୍ୟର ସୀମା ଠାରୁ ଊର୍ଦ୍ଧ୍ବକୁ ଯାଇ ଏକ ଜାତୀୟ ଭାବନା ତଥା ଦୃଷ୍ଟିକୋଣ ନେଇ ପଦକ୍ଷେପ ନେବାର ଆବଶ୍ୟକତା ରହିଛି ।
ଏହି ଜାତୀୟ ସମ୍ମିଳନୀକୁ ଜ୍ଞାନର ଆଦାନପ୍ରଦାନ ପାଇଁ ଏକ ମଞ୍ଚ ଭାବେ ବ୍ୟବହାର କରିବା ଲାଗି କେନ୍ଦ୍ର ମନ୍ତ୍ରୀ ବିଭିନ୍ନ ରାଜ୍ୟର କ୍ରୀଡ଼ା ମନ୍ତ୍ରୀ ଓ ଅଧିକାରୀମାନଙ୍କୁ ଆହ୍ବାନ ଦେଇଛନ୍ତି । ମନ୍ତ୍ରୀ ଆହୁରି କହିଥିଲେ ଯେ, ଦେଶରେ କ୍ରୀଡ଼ା ଇକୋସିଷ୍ଟମ ବିକଶିତ କରିବା ଲାଗି ବିଭିନ୍ନ ରାଜ୍ୟର ଶ୍ରେଷ୍ଠ କ୍ରୀଡ଼ା ପଦ୍ଧତିକୁ ପରସ୍ପର ସହ ବିନିମୟ କରିବାକୁ ହେବ । ଏଥିପାଇଁ ଏକ ମିଳିତ ଦୃଷ୍ଟିକୋଣ ଆପଣାଇବାର ଆବଶ୍ୟକତା ରହିଛି । କେନ୍ଦ୍ରମନ୍ତ୍ରୀ ଏହି ଅବସରରେ କହିଥିଲେ ଯେ, କ୍ରୀଡ଼ା ବିକାଶ ପାଇଁ ପ୍ରୟାସ ଆରମ୍ଭ କରିବା ସମୟରେ ସବୁ ରାଜ୍ୟ ପ୍ରାୟତଃ କେତେକ ସମାନ ସମସ୍ୟାର ସମ୍ମୁଖିନ ହୋଇଥାନ୍ତି । ପରସ୍ପର ମଧ୍ୟରେ ଆଲୋଚନା କରାଯାଇ ଏସବୁ ସମସ୍ୟାର ଏକପ୍ରକାର ସମାଧାନ ଆଣିବାର ଆବଶ୍ୟକତା ରହିଛି ।
ଖେଲୋ ଇଣ୍ଡିଆ କ୍ରୀଡ଼ାର ପରିଧି ବଢ଼ାଇବ ଏବଂ ଖେଲୋ ଇଣ୍ଡିଆ ଜନଜାତି କ୍ରୀଡ଼ା ଆୟୋଜନ ସମ୍ପର୍କରେ ଆଲୋଚନା କରିବା ଆଦି ପ୍ରସଙ୍ଗ ଉପରେ ଏହି ସମ୍ମିଳନୀରେ ରାଜ୍ୟମାନେ ଆଲୋଚନା କରିବାର ଆବଶ୍ୟକତା ରହିଛି । ଖେଲୋ ଇଣ୍ଡିଆ ଲିଗ୍ ଗେମ୍ସକୁ ତୀରନ୍ଦାଜ ଲିଗ୍, ହକି ଲିଗ୍ ଆଦି ଅନ୍ୟ କ୍ରୀଡ଼ା ଅନୁରୂପ ସମ୍ପ୍ରସାରଣ କରିବା ଲାଗି ପ୍ରସ୍ତାବ ରହିଛି । ଅଧିକ କ୍ରୀଡ଼ା ସମାରୋହ ଆୟୋଜନ କରାଗଲେ, ଖେଳାଳିମାନେ ସେମାନଙ୍କର ପ୍ରତିଭା ପ୍ରଦର୍ଶନ କରିବାର ଅଧିକ ସୁଯୋଗ ପାଇବେ ଏବଂ ଆଗକୁ ବଢ଼ିପାରିବେ ବୋଲି କେନ୍ଦ୍ର ମନ୍ତ୍ରୀ ଠାକୁର କହିଥିଲେ ।
ସମ୍ମିଳନୀରେ ୧୫ଟି ରାଜ୍ୟର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀଙ୍କ ସମେତ ଭାରତ ସରକାରଙ୍କ କ୍ରୀଡ଼ା ସଚିବ ସୁଜାତା ଚତୁର୍ବେଦୀ, ଯୁବ ବ୍ୟାପାର ସଚିବ ସଞ୍ଜୟ କୁମାରଙ୍କ ସମେତ ୩୩ ଟି ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶର କ୍ରୀଡ଼ା ଅଧିକାରୀମାନେ ଅଂଶଗ୍ରହଣ କରିଛନ୍ତି ।
