ରାମେଶ୍ବରମ/ଚେନ୍ନାଇ : ତାଲିମନାଡୁ ବିଜେପି ଆଜି(ଶୁକ୍ରବାର) ଠାରୁ ଛ’ ମାସିଆ ଲମ୍ବା ପଦଯାତ୍ରା ‘ଏନ ମନ ଏନ ମକ୍କଲ’ ( ମୋ ମାଟି ମୋର ଲୋକ) ଆରମ୍ଭ କରିଛି । କେନ୍ଦ୍ର ଗୃହମନ୍ତ୍ରୀ ଅମିତ ଶାହ ରାମେଶ୍ବରମ ଠାରୁ ଏହି ପଦଯାତ୍ରାର ଶୁଭାରମ୍ଭ କରିଛନ୍ତି ।
ପଦଯାତ୍ରାର ଲକ୍ଷ୍ୟ: ପଦଯାତ୍ରାର ଶୁଭାରମ୍ଭ କରି ଅମିତ ଶାହ କହିଛନ୍ତି, ‘‘ଏହି ପଦଯାତ୍ରାର ଲକ୍ଷ୍ୟ ତାମିଲନାଡୁ ଶାସନକୁ ପରିବାରବାଦ ମୁକ୍ତ କରିବା, ଦୁର୍ନୀତି ହଟାଇବା, ମହାନ ତାମିଲ ଭାଷାକୁ ସାରା ବିଶ୍ବରେ ପହଞ୍ଚାଇବା ସହିତ ରାଜ୍ୟର ଆଇନ ବ୍ୟବସ୍ଥାକୁ ସୁଦୃଢ କରିବା ।’’
ଏହାବି ପଢନ୍ତୁ- ‘ଗେହଲଟ୍ ସରକାର ସ୍ୱତନ୍ତ୍ର କୋର୍ଟ ବସାଇଥିଲେ, କହ୍ନେୟାଲାଲ ହତ୍ୟାକାରୀଙ୍କୁ ଫାଶୀ ହୋଇସାରନ୍ତାଣି’
ସାରା ବିଶ୍ବରେ ପହଞ୍ଚିବ ତାମିଲ ଭାଷା:ସେହିପରି ଶାହ କହିଛନ୍ତ ଏହି ଯାତ୍ରା ଏକ ରାଜନୈତିକ ଯାତ୍ରା ଖାଲି ନୁହେଁ... ଏହି ଯାତ୍ରା ଜରିଆରେ ତାମିଲନାଡୁର ସ୍ବାଭିମାନ, ବିକାଶକୁ ଶୀର୍ଷକୁ ନେବା ସହିତ, ତାମିଲ ଭାଷାକୁ ସାରା ବିଶ୍ବରେ ପହଞ୍ଚାଇବା ପାଇଁ ଉଦ୍ୟମ । ଏହି ଯାତ୍ରାର ଲକ୍ଷ୍ୟ ଦୁର୍ନୀତିକୁ ପୂର୍ଣ୍ଣଛେଦ ପକାଇ ବିକାଶ କାମକୁ ତ୍ବରାନ୍ବିତ କରିବା । ଆମର ଏହି ଲକ୍ଷ୍ୟ ଆମର କାର୍ଯ୍ୟକର୍ତ୍ତା ତାମିଲନାଡୁର ଗାଁ ଗାଁରେ ପହଞ୍ଚାଇବେ ।
ମତ୍ସ୍ୟଜୀବୀଙ୍କ ଦୁର୍ଦ୍ଦଶା ପାଇଁ ଦାୟୀ କିଏ: ତାମିଲନାଡୁ ରାମେଶ୍ବରମରୁ ଶାସକ ଡିଏମକେ ବିରୋଧରେ ଗର୍ଜିଛନ୍ତି ଗୃହମନ୍ତ୍ରୀ ଅମିତ ଶାହ । ଶାହ କହିଛନ୍ତି ମୁଁ କଂଗ୍ରେସ ପାର୍ଟି ଓ ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କୁ କହିବାକୁ ଚାହେଁ... ନା ପରିବର୍ତ୍ତନ କରିଦେଲେ କିଛି ହେବ ନାହିଁ । ଆପଣ ଯେତେବେଳେ ଲୋକଙ୍କ ପାଖକୁ ଯିବେ ଲୋକଙ୍କୁ ଆପଣଙ୍କର 2ଜି ଦୁର୍ନୀତି , କମନୱେଲଥ, କୋଇଲା, ବୋଫର୍ସ, ଇସ୍ରୋ, ଭଳି ଦୁର୍ନୀତି ମନେ ପଡିବ । କଣ ଜବାବ ଦେବେ ।’’ ଶ୍ରୀଲଙ୍କାରେ ତାମିଲ ମାନଙ୍କ ନରସଂହାର ଏହି କଂଗ୍ରେସ ସରକାର ସମୟରେ ହୋଇଥିଲା । ତାମିଲ ମତ୍ସ୍ୟଜୀବୀଙ୍କ ଦୁର୍ଦ୍ଦଶା ପାଇଁ ଡିଏମକେ- କଂଗ୍ରେସ ମିଳିତ ଭାବେ ଦାୟୀ । ନିଜ ପରିବାର ସ୍ବାର୍ଥ ବ୍ୟତୀତ ଏମାନଙ୍କୁ ଆଉ କିଛି ଦେଖାଯାଉନାହିଁ ।
ଏହାବି ପଢନ୍ତୁ- ଅମିତ ଶାହଙ୍କ ସୁରକ୍ଷାରେ ତ୍ରୁଟି: ଚେନ୍ନାଇ ଗସ୍ତ ସମୟରେ ରାସ୍ତାରେ ବନ୍ଦ ହୋଇଗଲା ଷ୍ଟ୍ରିଟ ଲାଇଟ
ଦୁର୍ନୀତିଗ୍ରସ୍ତ ପାର୍ଟି DMK: ଡିଏମକେ ଉପରେ କଡା ପ୍ରହାର କରି ଶାହ କହିଛନ୍ତି ଦେଶର ସବଠାରୁ ଦୂର୍ନୀତିଗ୍ରସ୍ତ ଦଳ ହେଉଛି ଡିଏମକେ । ଡିଏମକେର ମନ୍ତ୍ରୀ ଦୁର୍ନୀତି କରି ଇଡି ଦ୍ବାରା ଗିରଫ ହୋଇ ଏବେ ଜେଲରେ । ତଥାପି ମୁଖ୍ୟମନ୍ତ୍ରୀ ତାଙ୍କୁ ବରଖାସ୍ତ କରୁନାହାଁନ୍ତି । କାରଣ ଜେଲରେ ଥିବା ମନ୍ତ୍ରୀଙ୍କୁ ଷ୍ଟାଲିନଙ୍କ ସବୁ ଦୁର୍ନୀତି ପେଡି ଜଣା ଅଛି ।
ଲୋକଙ୍କ ସମର୍ଥନ ଲୋଡିବ ବିଜେପି: ତାମିଲନାଡୁ ବିଜେପି ଅଧ୍ୟକ୍ଷ ତଥା ଚର୍ଚିତ ରାଜନେତା କେ ଆନ୍ନାମଲ୍ଲାଇଙ୍କ ନେତୃତ୍ବରେ ରାଜ୍ୟ ବିଜେପି ଶାଖା ଏହି ଲମ୍ବା ପଦଯାତ୍ରା ଆୟୋଜନ କରୁଛି । ଏହା ଆସନ୍ତା 6 ମାସ ପର୍ଯ୍ୟନ୍ତ ଚାଲିବ । ପଦଯାତ୍ରା ରାଜ୍ୟର ମୋଟ 234 ବିଧାନସଭାରେ ପହଞ୍ଚିବ । ଯାତ୍ରା କାଳରେ ଲୋକଙ୍କ ସମସ୍ୟା, ଦାବି ଆପତ୍ତି ସଂଗ୍ରହ କରିବା ସହିତ କେନ୍ଦ୍ର ସରକାରଙ୍କ ସମସ୍ତ କଲ୍ୟାଣକାରୀ ଯୋଜନା ସମ୍ପର୍କରେ ଅବଗତ କରାଇବ । ଏତତ ବ୍ୟତୀତ ରାଜ୍ୟ ସରକାରଙ୍କ ଦୁର୍ନୀତି ଓ ବିଭିନ୍ନ ଜନବିରୋଧୀ କାର୍ଯ୍ୟକ୍ରମକୁ ବିଜେପି ଲୋକଙ୍କୁ ବୁଝାଇବ । ଏହାସହ ଏହି ପଦଯାତ୍ରା ସମୟରେ ଛୋଟ ବଡ ସଭା ସମିତି ଆୟୋଜନ ହେବ । ଏତତ ବ୍ୟତୀତ ପଦଯାତ୍ରା କାଳରେ ବିଜେପି 10 ଟି ବଡ ସମାବେଶ ଆୟୋଜନ କରିବ । ପ୍ରତି ସମାବେଶରେ କେନ୍ଦ୍ରମନ୍ତ୍ରୀଙ୍କ ସମେତ ବରିଷ୍ଠ ଦଳୀୟ ନେତା ସାମିଲ ହେବେ । ଯାତ୍ରାର ଉଦଯାପନୀ ସମାବେଶରେ ପ୍ରଧାନମନ୍ତ୍ରୀ ସାମିଲ ହେବେ ।
