ପାଟନା: ବିହାରର ବୋଧଗୟା ସ୍ଥିତ ପ୍ରସିଦ୍ଧ ମହାବୋଧି ମନ୍ଦିର ପ୍ରଶାସନ ବିରୋଧରେ 80 ଲକ୍ଷ ଟଙ୍କା ଜରିମାନା ଲଗାଇଛି କେନ୍ଦ୍ର ଗୃହ ମନ୍ତ୍ରଣାଳୟ । ମହାବୋଧି ମନ୍ଦିର ପରିଚାଳନା କମିଟି (BTMC) ବିରୋଧରେ ବିଦେଶୀ ମୁଦ୍ରା ରେଗୁଲେଟରି ଆକ୍ଟ ଖିଲାପ ଅଭିଯୋଗରେ ଏହି ଜରିମାନା ଲଗାଯାଇଛି । ନିର୍ଦ୍ଧାରିତ ସମୟ ମଧ୍ୟରେ 80ଲକ୍ଷ ଟଙ୍କା ଜରିମାନା ଭରିବାକୁ କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ମନ୍ଦିର ପ୍ରଶାସନକୁ ନୋଟିସ ଜାରି କରାଯାଇଛି । ମନ୍ଦିର ପ୍ରଶାସନ ପକ୍ଷରୁ ଫରେନ କରେନ୍ସି ରେଗୁଲେଟରୀ ଆକ୍ଟର ପଞ୍ଜୀକରଣରେ ନବୀକରଣ କରାଯାଇନଥିବାରୁ ଏହି ନୋଟିସ ଜାରି କରାଯାଇଛି ।
ଦାନରେ ଅଧିକ ମିଳିଥାଏ ବିଦେଶୀ ମୁଦ୍ରା:ସମଗ୍ର ବିଶ୍ବରେ ବୌଦ୍ଧ ଶ୍ରଦ୍ଧାଳୁମାନଙ୍କ ଆସ୍ଥାର କେନ୍ଦ୍ରସ୍ଥଳୀ ଭାବେ ଏହି ବୋଧଗୟା ମହାବୋଧି ମନ୍ଦିର ପ୍ରସିଦ୍ଧି ଲାଭ କରିଛି । ବିଶେଷ ଭାବେ ନଭେମ୍ୱରରୁ ବୋଧଗୟାକୁ ପର୍ଯ୍ୟଟକମାନଙ୍କ ଆଗମନ ଆରମ୍ଭ ହୋଇଥାଏ । ଯେଉଁଥିପାଇଁ ଏହି ମନ୍ଦିରକୁ ବିଦେଶୀ ବୌଦ୍ଧ ଧର୍ମାବଲମ୍ବୀଙ୍କ ଆଗମନ ସହ ଅଧିକ ବିଦେଶୀ ମୁଦ୍ରା ମଧ୍ୟ ଦାନ ଆକାରରେ ମିଳିଥାଏ । ଯେଉଥିପାଇଁ ପ୍ରତିବର୍ଷ କୋଟିକୋଟି ଟଙ୍କାର ବିଦେଶୀ ମୁଦ୍ରା ଦାନ ଆକାରରେ ପାଇଥାଏ ଏହି ମନ୍ଦିର ପ୍ରଶାସନ ।
2022ରେ ବି ପଠାଯାଇଥିଲା ନୋଟିସ:-ସୂଚନା ଅନୁଯାୟୀ, ଗତବର୍ଷ (2022) ମସିହାରେ ବି ସମାନ ମାମଲାରେ ମନ୍ଦିର ପ୍ରଶାସନକୁ ନୋଟିସ ଜାରି କରାଯାଇଥିଲା । କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଏହି ନୋଟିସ ଜାରି କରାଯାଇଥିଲା । କିନ୍ତୁ ଏହି ନୋଟିସକୁ ବିଟିଏମସି ଗମ୍ଭୀରତାର ସହ ନେଇନଥିବା ଅଭିଯୋଗ ହୋଇଥିଲା । ତେବେ 2017 ମସିହାରୁ 2022 ପର୍ଯ୍ୟନ୍ତ ଦାନ କରାଯାଇଥିବା ବିଦେଶୀ ମୁଦ୍ରାର ରିଟର୍ଣ୍ଣ ଭରାଯାଇ ନଥିବାରୁ ଏହି ନୋଟିସ ପଠାଯାଇଥିଲା ।