ହିମାଚଳ ପ୍ରଦେଶରେ ଅକ୍ସିଜେନ ଅଭାବରୁ ଦୁଇ ପର୍ଯ୍ୟଟକଙ୍କ ମୃତ୍ୟୁ ଅଭିଯୋଗ

ହିମାଚଳ ପ୍ରଦେଶରେ ଅକ୍ସିଜେନ ଅଭାବରୁ ଦୁଇ ପର୍ଯ୍ୟଟକଙ୍କ ମୃତ୍ୟୁ ଅଭିଯୋଗ । ମନାଲି-ଲେହ ଜାତୀୟ ରାଜପଥରେ ଘଟିଛି ଅଘଟଣ । ବ୍ୟବଚ୍ଛେଦ ପରେ ମୃତ୍ୟୁର କାରଣ ସ୍ପଷ୍ଟ ହେବା ନେଇ କହିଲା ସ୍ଥାନୀୟ ପ୍ରଶାସନ । ଅଧିକ ପଢନ୍ତୁ

ଶିମଲା: ହିମାଚଳ ପ୍ରଦେଶର ମନାଲି-ଲେହ ଜାତୀୟ ରାଜପଥରେ ଦୁଇ ପର୍ଯ୍ୟଟକଙ୍କ ମୃତ୍ୟୁ ଘଟିଛି । ଅମ୍ଳଜାନ ଅଭାବରୁ ଉଭୟ ପର୍ଯ୍ୟଟକଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି । ସ୍ଥାନୀୟ ଲାହଲ ପୋଲିସ ଏ ସମ୍ପର୍କରେ ସୂଚନା ପାଇ ଘଟଣାସ୍ଥଳରେ ପହଞ୍ଚିଥିଲା । ଉଭୟ ମୃତଦେହକୁ ଜବତ କରି ପୋଲିସ ବ୍ଯବଚ୍ଛେଦ ପାଇଁ ନିକଟସ୍ଥ କିଲୋଙ୍ଗ ହସ୍ପିଟାଲକୁ ପଠାଇଥିଲା । ତେବେ ଉଭୟଙ୍କ ମୃତ୍ୟୁ ଅକ୍ସିଜେନ ଅଭାବରୁ କିମ୍ବା ଅନ୍ୟ କୌଣସି ସ୍ବାସ୍ଥ୍ୟଗତ ସମସ୍ୟାରୁ ହୋଇଛି, ସେନେଇ ଔପଚାରିକ ଭାବେ କିଛି ସ୍ପଷ୍ଟ ହୋଇନି । ତଦନ୍ତ ଓ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁ ସମ୍ପର୍କିତ ପ୍ରକୃତ କାରଣ ସ୍ପଷ୍ଟ ହେବା ନେଇ ସ୍ଥାନୀୟ ପ୍ରଶାସନ କହିଛି ।

ଦୁଇ ମୃତକଙ୍କ ନାମ ଆଦିତ୍ୟ ଏବଂ କବାଲା ସିଂ ବୋଲି ଜଣାପଡିଛି । 32 ବର୍ଷୀୟ ଆଦିତ୍ୟ ହରିୟାଣାର ଫତେହାବାଦ ଜିଲ୍ଲାର ବାସିନ୍ଦା । ସାରଚୁ ନିକଟ ପାଙ୍ଗ ନାମକ ସ୍ଥାନରେ ଆଦିତ୍ୟଙ୍କ ଆକସ୍ମିକ ମୃତ୍ୟୁ ହୋଇଥିଲା । ଅନ୍ୟପକ୍ଷରେ, 48 ବର୍ଷିୟ କବାଲା ସିଂ ଜମ୍ମୁର ସାରିକା ବିହାର ଲୋୟର ରୁପ ନାଗରର ବାସିନ୍ଦା ଥିଲେ । ଜିଙ୍ଗଜିଙ୍ଗର ଅଞ୍ଚଳରେ ତାଙ୍କର ମୃତ୍ୟୁ ଘଟିଛି । ମୃତଦେହ ବ୍ୟବଚ୍ଛେଦ ପରେ ପରିବାର ସଦସ୍ୟଙ୍କୁ ହସ୍ତାନ୍ତର କରାଯିବା ନେଇ ପୋଲିସ କହିଛି ।

ଲାହଲ ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, 21- 22 ତାରିଖ ରାତିରେ ମନାଲି-ଲେହରେ ଦୁଇଜଣ ପର୍ଯ୍ୟଟକଙ୍କ ମୃତ୍ୟୁ ଘଟିଥିବା ସୂଚନା ମିଳିଥିଲା । ସ୍ଥାନୀୟ ଲୋକଙ୍କ କହିବା ଅନୁଯାୟୀ ହଠାତ୍ ନିଶ୍ୱାସ ନେବାରେ ସମସ୍ୟା ହେବା ପରେ ଉଭୟ ଅଚେତ ହୋଇପଡିଥିଲେ । ପରେ ସେମାନଙ୍କ ମୃତ୍ୟୁ ହୋଇସାରିଥିବା ଜଣାପଡିଥିଲା । ପୋଲିସ ତଦନ୍ତ ଆରମ୍ଭ କରିଛି । ବ୍ୟବଚ୍ଛେଦ ରିପୋର୍ଟରେ ମୃତ୍ୟୁର ପ୍ରକୃତ କାରଣ ଜଣାପଡିବା ନେଇ ମଧ୍ଯ ଅପେକ୍ଷା କରାଯାଇଛି ।

ହିମାଚଳ ପ୍ରଦେଶର ମନାଲି-ଲେହ ଜାତୀୟ ରାଜପଥ ହେଉଛି ସମୁଦ୍ରପତନ ଠାରୁ ସର୍ବାଧିକ ଉଚ୍ଚତାରେ ଥିବା ରାଜପଥ । ଏହା ଯାହା ଲାହଲ୍-ସ୍ପିଟି ଜିଲ୍ଲା ଦେଇ ଅତିକ୍ରମ କରିଛି । ଏହା ପ୍ରାୟ ସମୁଦ୍ରପତନରୁ 15 ହଜାର ଫୁଟରୁ ଅଧିକ ଉଚ୍ଚରେ ରହିଛି । ତେଣୁ ଏଠାରେ ସ୍ବାଭାବିକ ମାତ୍ରା ଠାରୁ କମ ପରିମାମରେ ଅକ୍ସିଜେନ ଉପଲବ୍ଧ ରହିଥାଏ । ଏଠାରେ ଯାତାୟତ କରିବା ବେଳେ ଶ୍ବାସକ୍ରିୟାରେ ସମସ୍ୟା ଅନୁଭବ ହୋଇଥାଏ । ତେଣୁ ବୟସାଧିକ ବର୍ଗ ଓ କିଛି ସ୍ବାସ୍ଥ୍ୟଗତ ସମସ୍ୟାରେ ପୀଡିତ ଥିବା ପର୍ଯ୍ୟଟକଙ୍କ ଏହି ରାଜପଥରେ ଯାତ୍ରା କରିବା ଅତ୍ୟନ୍ତ ଆହ୍ବାନପୂର୍ଣ୍ଣ ।

ବ୍ୟୁରୋ ରିପୋର୍ଟ, ଇଟିଭି ଭାରତ