ବେଙ୍ଗାଲୁରୁ:କର୍ଣ୍ଣାଟକର ମହିଶୂର ନିକଟବର୍ତ୍ତୀ କବିନି ଡ୍ୟାମର ଜଳଭଣ୍ଡାରରୁ ଉଦ୍ଧାର ହେଲା 2 ଟନ ଓଜନର ପ୍ଲାଷ୍ଟିକ ବର୍ଜ୍ୟବସ୍ତୁ । ଜଙ୍ଗଲ ବିଭାଗ କର୍ମଚାରୀ ଓ ସ୍ଥାନୀୟ ବାସିନ୍ଦା ମିଳିତ ଭାବେ ଜଳଭଣ୍ଡାରରୁ ବିପୁଳ ପରିମାଣର ପ୍ଲାଷ୍ଟିକ ଉଦ୍ଧାର କିରବାରେ ସଫଳ ହୋଇଛନ୍ତି । ଏହି ପ୍ଲାଷ୍ଟିକ ଗୁଡିକୁ ଉଦ୍ଧାର କରିବା ପାଇଁ ବନ ବିଭାଗ ଏକ ଦିବସୀୟ ସ୍ବତନ୍ତ୍ର ଡ୍ରାଇଭ ଆରମ୍ଭ କରିଥିଲା ।
ପ୍ରାୟ 6 କିଲୋମିଟର ପରିଧି ମଧ୍ୟରେ ଏହି ମେଗା ସଫେଇ କାର୍ଯ୍ୟକ୍ରମ ହାତକୁ ନେଇଥିଲା ବନ ବିଭାଗ । ଏଥିରେ ସ୍ଥାନୀୟ ବାସିନ୍ଦାଙ୍କ ସମ୍ପୂର୍ଣ୍ଣ ସହଯୋଗ ମିଳିଥିଲା । ଏହି ସ୍ଥାନରେ ଗତ ବନ୍ୟାରେ ଏହି ସବୁ ଆବର୍ଜନା ଆସି ଜମା ହୋଇଥିଲା । ଏହା ଏକ ଓ୍ବାଲ୍ଡ ଲାଇଫ ଜୋନ ହୋଇଥିବାରୁ ବନ୍ୟଜନ୍ତୁ ଓ ପରିବେଶ ଉପରେ କୁପ୍ରଭାବ ପକାଇବାର ଯଥେଷ୍ଟ ଆଶଙ୍କା ପ୍ରକାଶ କରିଥିଲେ ପରିବେଶବିତ । ପ୍ଲାଷ୍ଟିକ ସମ୍ପର୍କିୟ ପଦାର୍ଥ, ବାଇ ମେଡିକାଲ ସରଞ୍ଜାମ ଓ ଅନେକ ପରିବେଶ ପ୍ରତିକୂଳ ବର୍ଜ୍ୟବସ୍ତୁ ଜମା ହୋଇ ସ୍ଥାନୀୟ ଅଞ୍ଚଳର ପ୍ରାକୃତିକ ସନ୍ତୁଳନ ପ୍ରତି ପ୍ରମୁଖ ସମସ୍ୟା ସୃଷ୍ଟି କରିବାକୁ ଯାଉଥିବାବେଳେ ଏହାର ସଫେଇ ନେଇ ଏକ ସ୍ବତନ୍ତ୍ର ଡ୍ରାଇଭ ଆରମ୍ଭ କରିଥିଲା ବନ ବିଭାଗ ।