ନୂଆଦିଲ୍ଲୀ:ବିଏସଏଫ(Border Security Force) ଗୁଳିରେ ଟଳିରେ ଦୁଇ ବାଂଲାଦେଶୀ ଅନୁପ୍ରବେଶକାରୀ । ପଶ୍ଚିମବଙ୍ଗର କୁଚବେହାର ଜିଲ୍ଲାର ଭାରତ-ବାଂଲାଦେଶ ସୀମା ଦେଇ ଦୁଇ ଅନୁପ୍ରବେଶକାରୀ ବାଉଁଶ ପୋଲ କରି ଗୋରୁ ମୁଣ୍ଡ ଚୋରା ଚାଲାଣ କରୁଥିଲେ । ଏହି ସମୟରେ ସୀମା ସୁରକ୍ଷା ବଳ (ବିଏସଏଫ) ଅଧିକାରୀ ସେମାନଙ୍କ ଉପରକୁ ଗୁଳି ଚଳାଇଥିଲେ । ଫଳରେ ଦୁଇଜଣଙ୍କ ମୃତ୍ୟୁ ହୋଇଛି । ଭୋର ପ୍ରାୟ 3 ଟା ସମୟରେ ଏହି ଘଟଣା ଘଟିଛି ।
ବିଏସଏଫ ଜାରି କରିଥିବା ବିବୃତ୍ତି ଅନୁସାରେ, ବାଂଲାଦେଶରୁ ଦୁଇ ଦୁର୍ବୃତ୍ତ ଭାରତରେ ପ୍ରବେଶ କରି ଏଠାରେ ଗୋରୁ ମୁଣ୍ଡ ଚୋରାଚାଲାଣ କରିବାକୁ ଚେଷ୍ଟା କରୁଥିଲେ । ଏହି ସମୟରେ ବିଏସଏଫ (BSF) ସେମାନଙ୍କୁ ଫେରିବାକୁ ଚେତାବନୀ ଦେଇଥିଲେ । କିନ୍ତୁ ସେମାନେ ବିଏସଏଫ ଚେତାବନୀକୁ ବେଖାତିର କରି ଆଗକୁ ବଢିଥିଲେ । ଯେଉଁଥିପାଇଁ ବିଏସଏଫ ଅଧିକାରୀ ସେମାନଙ୍କ ଉପରକୁ ଗୁଳି ଚଳାଇଥିଲେ । ଉଭୟପଟୁ କିଛି ସମୟ ଧରି ଗୁଳିବିନିମୟ ଜାରି ରହିଥିଲା ।