ନୂଆଦିଲ୍ଲୀ: ବିବାଦ ମଧ୍ୟରେ ରବିବାର ପ୍ରଧାନମନ୍ତ୍ରୀ ମୋଦିଙ୍କ ଦ୍ବାରା ନୂତନ ସଂସଦ ଭବନ ଉଦଘାଟନ ହୋଇଛି । ଉଦଘାଟନ କାର୍ଯ୍ୟକ୍ରମକୁ ବୟକଟ କରିଥିବା ୨୦ ବିରୋଧୀ ଦଳ କେନ୍ଦ୍ର ସରକାରଙ୍କୁ ଟାର୍ଗେଟ କରିଥିବା ବେଳେ କଂଗ୍ରେସ ଓ ବିଜେପି ମଧ୍ୟରେ ପୋଷ୍ଟର ୱାର ଆରମ୍ଭ ହୋଇଛି । କଂଗ୍ରେସ ଟ୍ବିଟରରେ ଏକ ଚିତ୍ର ସେୟାର କରିଛି, ଯେଉଁଥିରେ ପ୍ରଧାନମନ୍ତ୍ରୀ ମୋଦିଙ୍କ ଏକ 'ଛୋଟିଆ' ଛବିକୁ ଜବାହାରଲାଲ ନେହେରୁଙ୍କ ବଡ଼ ଛବି ସମ୍ମୁଖରେ ଠିଆ ହୋଇଥିବା ଦେଖିବାକୁ ମିଳିଛି । ସେଥିରେ ଲେଖାଯାଇଛି, "ଯେତେ ମଧ୍ୟ ଚେଷ୍ଟା କର" କଂଗ୍ରେସର ଏହି ପୋଷ୍ଟ ପରେ ଉଭୟ ଦଳ ମଧ୍ୟରେ ଆରମ୍ଭ ହୋଇଛି ଟ୍ବିଟର ୱାର ।
କଂଗ୍ରେସର ଏହି ଟ୍ବିଟ ପୋଷ୍ଟର ଜବାବ ଦେଇ ବିଜେପି ମଧ୍ୟ ଏକ ଚିତ୍ର ସେୟାର କରିଛି । ଏହି ଚିତ୍ରରେ କ୍ୟାମେରା ସହିତ ଜବାହାରଲାଲ ନେହେରୁଙ୍କ ପ୍ରତିଛବିକୁ ଦର୍ଶାଯାଇଛି ଏବଂ ଲେଖା ହୋଇଛି, "ନେହେରୁଙ୍କ ସତ" । ଚିତ୍ରରେ ପୂର୍ବତନ ପ୍ରଧାନମନ୍ତ୍ରୀଙ୍କ ଉପରେ କ୍ୟାମେରା ପଡୁଥିବା ଦେଖିବାକୁ ମିଳିଛି । ଏଥିସହ ଫଟୋରେ "ରିଲ ଓ ରିୟଲ" ଲେଖାଯାଇଛି । ତେବେ ନୂତନ ସଂସଦ ଭବନ ଉଦଘାଟନ କାର୍ଯ୍ୟକ୍ରମରେ ରାଷ୍ଟ୍ରପତିଙ୍କୁ ନିମନ୍ତ୍ରଣ କରାନଯିବା ଦେଶର ସର୍ବୋଚ୍ଚ ସାମ୍ବିଧାନିକ ପଦ ପ୍ରତି ଅପମାନ ବୋଲି କହି କଂଗ୍ରେସ ଏହାକୁ ବର୍ଜନ କରିବା ପାଇଁ ନିଷ୍ପତ୍ତି ନେଇଥିଲା । ପରେ ଅନ୍ୟ କିଛି ବିରୋଧୀ ଦଳ ମଧ୍ୟ ଏହି କାର୍ଯ୍ୟକ୍ରମକୁ ବର୍ଜନ କରିବାକୁ ନିଷ୍ପତ୍ତି ନେଇଥିଲେ । ପରେ ମୋଟ ୨୦ ବିରୋଧୀ ରାଜନୈତିକ ଦଳ ଏହାକୁ ବର୍ଜନ କରିଥିଲେ ।