ନୂଆଦିଲ୍ଲୀ: ଚୀନକୁ ମିଳିବ ଯେସାକୁ ତେସା ଜବାବ । ସୀମା ସୁରକ୍ଷା ପାଇଁ ପ୍ରସ୍ତୁତ ହୋଇସାରିଛି ବଜ୍ର, ତ୍ରିଶୂଳ, ଭଦ୍ର ଓ ଦଣ୍ଡ । ଏଣିକି ଡ୍ରାଗନକୁ ଏହି ସବୁ ଅସ୍ତ୍ରଶସ୍ତ୍ରରେ ଦୃଢ ଜବାବ ଦେବ ଭାରତୀୟ ସେନା । 2020, ଲଦାଖର ଗଲୱାନ ଘାଟିରେ ରକ୍ତ ସଂଘର୍ଷ ସମୟରେ ଭାରତୀୟ ଯବାନଙ୍କ ବିରୁଦ୍ଧରେ କଣ୍ଟା ତାର ଲାଗିଥିବା ଦଣ୍ଡା ଓ ପଥର ବ୍ୟବହାର କରିଥିଲା ଚୀନ ସେନା । ପୋଙ୍ଗୟାଙ୍ଗ ହ୍ରଦ ନିକଟକୁ ହାତରେ ଲାଠି, ଦଣ୍ଡା ଓ କଣ୍ଟା ତାର ଏବଂ ପଥର ଧରି ପହଁଞ୍ଚିଥିଲେ ଚୀନର ପିଏଲଏ ସୈନିକ ।
ବିନା ଗୁଳିଗୋଳା ବ୍ୟବହାରରେ ହୋଇଥିବା ଏହି ସଂଘର୍ଷରେ ପରାକ୍ରମ ସହ ଛିଡା ହୋଇ ଚୀନର ସାମ୍ନା କରିଥିଲେ ଭାରତୀୟ ବୀର ଯବାନ । ଗତ ବର୍ଷ ଜୁନରେ ହୋଇଥିବା ଏହି ସଂଘର୍ଷରେ ଭାରତର 20 ଯବାନ ହୋଇଥିଲେ ଶହୀଦ । ଆଉ ଏବେ ଭାରତୀୟ ସୁରକ୍ଷାକର୍ମୀ ଚୀନକୁ ଯେସାକୁ ତେସା ଜବାବ ଦେବାକୁ ନୂଆ କୌଶଳ ଆପଣାଇଛି ।
ଚୀନ ସହ ମୁକାବିଲା ପାଇଁ ଭାରତୀୟ ସୁରକ୍ଷାବଳକୁ ମିଳିବ ନୂଆ ଅସ୍ତ୍ର । ମେକ୍ ଇନ ଇଣ୍ଡିଆ ଜରିଆରେ ନୋଏଡା ସ୍ଥିତ କମ୍ପାନୀକୁ ଅସ୍ତ୍ରଶସ୍ତ୍ର ତିଆରି ପାଇଁ ମିଳିଛି କଣ୍ଟ୍ରାକ୍ଟ । ଏହି ଅଣପାରମ୍ପରିକ ଅସ୍ତ୍ର ଅଧିକ ଘାତକ ହୋଇନଥିଲେ ସୁଦ୍ଧା କିଛି କ୍ଷଣ ପାଇଁ ଶତୃକୁ ଚେତାଶୂନ୍ୟ କରିବାରେ ସକ୍ଷମ ହେବ ।