ଅଗରତାଲା: ତ୍ରିପୁରା ବିଧାନସଭା ଉପ ନିର୍ବାଚନ ଫଳାଫଳ ସାମ୍ନାକୁ ଆସିଛି । 4 ଆସନରୁ ବିଜେପି 3 ଟିରେ ବାଜିମାତ କରିଥିବା ବେଳେ, କଂଗ୍ରେସ ମାତ୍ର ଗୋଟିଏ ଆସନ ହାତେଇବାରେ ସଫଳ ହୋଇଛି । ଟାଉନ୍ ବର୍ଦ୍ଦୋୱାଲି ଆସନରୁ ନର୍ବାଚନ ଲଢୁଥିବା ବିଜେପି ପ୍ରାର୍ଥୀ ତଥା ମୁଖ୍ୟମନ୍ତ୍ରୀ ମାଣିକ ସାହା ବିଜୟୀ ହୋଇଛନ୍ତି ।
ସେହିପରିି କଂଗ୍ରେସ ପ୍ରାର୍ଥୀ ସୁଦୀପ ରୟ ବର୍ମନ ଅଗରତାଲା ଆସନରୁ ବିଜୟୀ ହୋଇଛନ୍ତି । ବିଜେପି ପ୍ରାର୍ଥୀ ସ୍ବପ୍ନା ଦାସ ସୋରମା ଆସନରୁ ଓ ମଲିନା ଦେବନାଥ ଯୁବରାଜନଗର ବିଧାନସଭା ନିର୍ବାଚନ ମଣ୍ଡଳୀରୁ ଜିତିଛନ୍ତି । ବିଜେପିର ଫଳାଫଳ ନେଇ ମୁଖ୍ୟମନ୍ତ୍ରୀ ସାହାଙ୍କୁ ଅଭିନନ୍ଦନ ଜଣାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ତ୍ରିପୁରାରେ ଚାରିଟି ବିଧାନସଭା ଆସନ ରାଜଧାନୀ ଅଗରତାଲା, ଟାଉନ୍ ବର୍ଦ୍ଦୋୱାଲି, ସୁରମା ଏବଂ ଜୁବରାଜନଗର ଆସନରେ ଗୁରୁବାର (ଜୁନ୍ 23)ରେ ମତଦାନ ହୋଇଥିଲା । 4 ବିଧାନସଭା କ୍ଷେତ୍ରରେ ମୋଟ 1,89,032 ମଧ୍ୟରୁ 78.58 ପ୍ରତିଶତ ମତଦାତା ଭୋଟ ଦେଇଥିଲେ । କିଛି ସ୍ଥାନରେ କାଁଭାଁ ହିଂସା ମଧ୍ୟରେ ଭୋଟିଂ ଶେଷ ହୋଇଥିଲା ।
ଆଜି ଫଳାଫଳ ପ୍ରକାଶ ପାଇଛି । ମୁଖ୍ୟମନ୍ତ୍ରୀ ମାଣିକ ଶାହାଙ୍କ ସମେତ ମୋଟ 3 ବିଜେପି ପ୍ରାର୍ଥୀ ନିର୍ବାଚନ ଜିତିଥିବା ବେଳେ କଂଗ୍ରେସ ପ୍ରାର୍ଥୀ ଗୋଟିଏ ଆସନରେ ବିଜୟ ଲାଭ କରିଛନ୍ତି । ବିପ୍ଳବ ଦେବ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ମାଣିକ ସାହା ମୁଖ୍ୟମନ୍ତ୍ରୀ ହୋଇଥିଲେ । ଦଳ ତାଙ୍କୁ ଚଳିତ ଉପ-ନିର୍ବାଚନରେ ପ୍ରାର୍ଥୀ ଭାବେ ମୈଦାନକୁ ଓହ୍ଲାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
