ଅଗରତାଲା: ଆଜି ଠାରୁ ଦୁଇ ଦିନିଆ ଆସାମ ଓ ତ୍ରିପୁରା ଗସ୍ତରେ ଆସିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ( President of India Droupadi Murmu) । ଆଜି ତ୍ରିପୁରା ରାଜଧାନୀ ଅଗରତାଲାରେ ରାଷ୍ଟ୍ରପତି ପହଞ୍ଚିବା ପରେ ଅଗରତାଲାର ନରସିଂଗଡରେ ପ୍ରଥମେ ତ୍ରିପୁରା ଷ୍ଟେଟ ଜୁଡିସିଆଲ ଏକାଡେମୀ (Tripura State Judicial Academy) କୁ ଉଦଘାଟନ କରିଥିଲେ । ପରେ ତ୍ରିପୁରା ଆଇନ ବିଶ୍ବବିଦ୍ୟାଳୟର ଭିତ୍ତିପ୍ରସ୍ତର ସ୍ଥାପନ କରିଥିଲେ । ଏହାପରେ ତ୍ରିପୁରା ବିଧାୟକଙ୍କ ପାଇଁ ନିର୍ମାଣ ହୋଇଥିବା ବିଧାୟକ କଲୋନୀର ଉଦଘାଟନ କରିଥିଲେ । ଯାହା ଅଗରତାଲା କ୍ୟାପିଟାଲ କମ୍ପ୍ଲେକ୍ସରେ ନିର୍ମାଣ ହୋଇଛି ।
ଏତଦ ବ୍ୟତୀତ ରାଷ୍ଚ୍ରପତି ରାଜ୍ୟ ସରକାରଙ୍କ ଏକାଧିକ ପ୍ରକଳ୍ପର ଶିଳାନ୍ୟାସ କରିଥିଲେ । ଯେଉଁଥିରେ ରହିଛି ଭିତ୍ତିଭୂମି, ସ୍କୁଲ, ରାସ୍ତା, କଲେଜ, ମ୍ୟୁଜିୟମ, ସାଂସ୍କୃତିକ ସଂଗ୍ରାହାଳୟ । ଏହାସହ ଆଇଆଇଆଇଟି ଅଗରତାଲାର ମଧ୍ୟ ଭିତ୍ତିପ୍ରସ୍ତର ରଖିଛନ୍ତି ରାଷ୍ଟ୍ରପତି ।
ଏହି ଅବସରରେ ରାଷ୍ଟ୍ରପତି ସମ୍ବୋଧିତ କରି କହିଛନ୍ତି, "ଆଜି ତ୍ରିପୁରା ଆଇନ ବିଶ୍ବବିଦ୍ୟାଳୟର ଭିତ୍ତିପ୍ରସ୍ତର ରଖି ସେ ବହୁତ ଖୁସି ଅନୁଭବ କରୁଛନ୍ତି । ଏହି ବିଶ୍ବବିଦ୍ୟାଳୟ ଖାଲି ନର୍ଥଇଷ୍ଟ ନୁହେଁ ପୁରା ଦେଶକୁ ନୂଆ ଦିଶା ଦେବ । ଆଜିର ଭାରତ ହେଉଛି ଯୁବକଙ୍କ ଦେଶ । ଯୁବକଙ୍କ ଶକ୍ତି ସାମର୍ଥ୍ୟରେ ଦେଶ ଦୃତ ବିକାଶ ଅଗ୍ରସର ହେଉଛି । ଯୁବକଙ୍କ ସାମର୍ଥ୍ୟକୁ ନେଇ ଭାରତ ଆତ୍ମନିର୍ଭର ଅଭିମୁଖେ ଅଗ୍ରସର ହେଉଛି । ଭାରତର ବିକାଶ ଯାତ୍ରାରେ ଆଇଆଇଟି ଅଗରତାଲା ବଡ ଭୂମିକା ନେବ ।"
ରାଷ୍ଟ୍ରପତି ଆହୁରି କହିଥିଲେ ଯେ ଆଜି ଆର୍ଥିକ ସ୍ତରରେ, ସାମାଜିକ ସ୍ତରରେ ଆଇନ ସ୍ତରରେ ବ୍ୟାପକ ପରିବର୍ତ୍ତନ ହେଉଛି । ସମାଜର ଅନ୍ତିମ ବ୍ଯକ୍ତି ପର୍ଯ୍ୟନ୍ତ ଶାସନ ପ୍ରଶାସନ ପହଞ୍ଚିଛି । ସମ୍ପୂର୍ଣ୍ଣ ଭାରତର ବିକାଶ ଚାଲିଛି । ରାଷ୍ଟ୍ରପତି ଆହୁରି କହିଥିଲେ ସମୃଦ୍ଧ ଭାରତ ପାଇଁ ନର୍ଥଇଷ୍ଟ (ଉତ୍ତରପୂର୍ବ)ର ଅବଦାନ ବିଶେଷ ଭାବେ ରହିଛି । ନର୍ଥଇଷ୍ଟର ଅବଦାନ ବିକାଶ ବଳରେ ଭାରତ ଲକ୍ଷ୍ୟ ରଖିଥିବା 5 ଟ୍ରିଲିୟନ ଡଲାର ଅର୍ଥନୀତି ହାସଲ କରିପାରିବ । ସେହିପରି ରାଷ୍ଟ୍ରପତି ଭାବେ ମୁଁ ତ୍ରିପୁରା ଆସି ବହୁତ ଖୁସି । ମୋର ବିଶ୍ବାସ ଭାରତର ବିକାଶରେ ତ୍ରିପୁରାର ଅବଦାନ ସର୍ବଦା ଗୁରୁତ୍ବ ରହିବ ।
