ହାଇଦ୍ରାବାଦ: ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ କାରକେଡ୍ ପାଇଁ ଅଟକି ରହିଲା ଟ୍ରେନ । ମୁଖ୍ୟମନ୍ତ୍ରୀ ନୀତିଶ ଏକ କାର୍ଯ୍ୟକ୍ରମରେ ଯାଉଥିବା ବେଳେ ବକ୍ସରରେ ପାଟନା-ବକ୍ସର ପାସେଞ୍ଜର ଟ୍ରେନ୍ ଏବଂ କାମାକ୍ଷା-ଦିଲ୍ଲୀ ଏକ୍ସପ୍ରେସ ପ୍ରାୟ 15 ମିନିଟ୍ ପର୍ଯ୍ୟନ୍ତ ଅଟକି ରହିଥିବା ଖବର ସାମ୍ନାକୁ ଆସିଛି । ମୁଖ୍ୟମନ୍ତ୍ରୀଙ୍କ କନଭୟ ଅତିିକ୍ରମ କରିବା ପର୍ଯ୍ୟନ୍ତ ଉଭୟ ଟ୍ରେନ ଅଟକି ରହିଥିଲେ । ଏହି ଘଟଣା ବକ୍ସର ରେଳ ଷ୍ଟେସନ ଅଧୀନରେ ଘଟିଛି । ଅଭିଯୋଗକୁ ରେଳବାଇ କର୍ତ୍ତୃପକ୍ଷ କିନ୍ତୁ ସ୍ବୀକାର କରିନାହାନ୍ତି । ମୁଖ୍ୟମନ୍ତ୍ରୀ କିମ୍ବା କୌଣସି ରାଜନେତାଙ୍କ ଯାତ୍ରା ପାଇଁ ଟ୍ରେନକୁ ଅଟକିବାକୁ ନିର୍ଦ୍ଦେଶ ମିଳିଥିବା କଥାକୁ ରେଳବାଇ ଅସ୍ବୀକାର କରିଛି ।
ବକ୍ସର ଷ୍ଟେସନର ପୂର୍ବ ଇଟାଡି ରେଲୱେ ଲେଭଲ କ୍ରସିଂ ପ୍ରାୟ 15 ମିନିଟ୍ ପର୍ଯ୍ୟନ୍ତ ଖୋଲା ରଖାଯାଇଥିଲା । ଯେଉଁଥିରେ ମୁଖ୍ୟମନ୍ତ୍ରୀ ନୀତିଶଙ୍କ କନଭୟ ଅତିକ୍ରମ କରିଥିଲା । ଲେଭଲ କ୍ରସିଂ ଖୋଲାଥିବା କାରଣରୁ ଉଭୟ ଟ୍ରେନ ପ୍ରାୟ 15 ମିନିଟ ପର୍ଯ୍ୟନ୍ତ ଅଟକି ରହିଥିଲେ । ଲେଭଲ କ୍ରସିଂ ଦାୟିତ୍ବରେ ଥିବା ଗେଟମ୍ୟାନ ସନ୍ତୋଷ କୁମାରଙ୍କୁ ଏସମ୍ପର୍କରେ ପଚରାଯିବାରୁ ସେ ମୁଖ୍ୟମନ୍ତ୍ରୀଙ୍କ କାରକେଡ୍ ଅତିକ୍ରମ କରିବା ପର୍ଯ୍ୟନ୍ତ ଟ୍ରେନ ରୋକାଯିବା ସହ ଲେଭଲକ୍ରିସିଂ ଖୋଲାଯାଇଥିବା କହିଥିଲେ । ଯାହାକୁ ନେଇ କିଛି ଟ୍ରେନ ଯାତ୍ରୀ ଅସନ୍ତୋଷ ମଧ୍ୟ ପ୍ରକାଶ କରିଥିଲେ । କିଛି ଯାତ୍ରୀ ଅଟକି ଥିା ଟ୍ରେନରୁ ଓହ୍ଲାଇ ବକ୍ସର ଷ୍ଟେସନ ପର୍ଯ୍ୟନ୍ତ ପାଦରେ ଚାଲି ଚାଲି ଯାଇଥିବା ମଧ୍ୟ ଦେଖିବାକୁ ମିଳିଥିଲା ।