ନୂଆଦିଲ୍ଲୀ: ଆଜି ସାରା ଦେଶ ଆନନ୍ଦ ଉଲ୍ଲାସ ସହ ଆଲୋକର ପର୍ବ ଦୀପାବଳି ପାଳନ କରୁଛି । ଏଥିରୁ ମଧ୍ୟ ବାଦ ପଡିନାହାନ୍ତି ସୀମା ସୁରକ୍ଷାରେ ଥିବା ଭାରତୀୟ ସେନା (Deepawali with troops in forward locations) । ଅନ୍ତର୍ଜାତୀୟ ସୀମାରେ ଥିବା ସେନାର ଫରଓ୍ବାର୍ଡ ପୋଷ୍ଟରେ ଯବାନଙ୍କ ସହ ଦୀପାବଳି ପାଳନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଠାରୁ ଆରମ୍ଭ କରି ସିଡିଏସ ଅନିଲ ଚୌହନ, ସ୍ଥଳସେନା ଓ ବାୟୁସେନା ମୁଖ୍ୟ । ଏକାଧିକ ଫରଓ୍ବାର୍ଡ ପୋଷ୍ଟରେ ପ୍ରଧାନମନ୍ତ୍ରୀଙ୍କ ସମେତ ଏହି ତ୍ରୀସେବା ସର୍ବୋଚ୍ଚ ଅଧିକାରୀ ଯବାନଙ୍କ ସହ ଦୀପାବଳି ପାଳନ କରିବା ସହ ସେମାନଙ୍କ ମନୋବଳକୁ ବୃଦ୍ଧି କରିଛନ୍ତି ।
ପ୍ରଧାନମନ୍ତ୍ରୀ ମୋଦି ମଧ୍ୟ ପୂର୍ବ ବର୍ଷଗୁଡିକ ପରି ଚଳିତ ଥର ମଧ୍ୟ ସେନା କ୍ୟାମ୍ପରେ ଦୀପାବଳି ପାଳନ କରିଛନ୍ତି । ୧୯୯୯ ଭାରତ-ପାକିସ୍ତାନ ଯୁଦ୍ଧରେ ଭାରତୀୟ ସୁରକ୍ଷା ବଳର ସାମର୍ଥ୍ୟର ସାକ୍ଷୀ ଥିବା ଜମ୍ମୁ କାଶ୍ମୀର କାର୍ଗିଲ ଫରଓ୍ବାର୍ଡ ପୋଷ୍ଟରେ ସେନା ସହ ଦୀପାବଳି ପାଳନ କରିଛନ୍ତି ପ୍ରଧାନମନ୍ତ୍ରୀ ମୋଦି । ଯବାନଙ୍କୁ ମିଠା ଖୁଆଇବା ସହିତ ଦେଶର ଅଖଣ୍ଡତା ପ୍ରତି ସେମାନଙ୍କ ସର୍ବୋଚ୍ଚ ଅବଦାନକୁ ପ୍ରଧାନମନ୍ତ୍ରୀ ପ୍ରଶଂସା କରିଛନ୍ତି । ଏହା ସହିତ ଯବାନଙ୍କୁ ମିଠା ଖୁଆଇ ଦୀପାବଳିର ଶୁଭେଚ୍ଛା ଦେବା ସହ ବନ୍ଦେ ମାତରମ ଗୀତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଝୁମିଥିବାର ମଧ୍ୟ ଦେଖିବାକୁ ମିଳିଥିଲା ।