ଲକ୍ଷ୍ନୌ:ବର୍ତ୍ତମାନ ଚାଲିଛି ବିବାହ ଋତୁ । ମନ୍ଦିର ହେଉ ଅବା ଘରେ ବା ମଣ୍ଡପରେ ଏବେ ସବୁଠି ବିବାହର ଆୟୋଜନ ଜାରି ରହିଛି । ଏମିତିକି ସୋସିଆଲ ମିଡିଆରେ ଦିନ ପ୍ରତିଦିନ ଏବେ ବର କନ୍ୟାଙ୍କ ବିବାହ ଫଟୋ ମଧ୍ୟ ଅପଲୋଡ ହେଉଥିବା ଦେଖିବାକୁ ମିଳିଛି । ତେବେ ଏହି ବିବାହ ଋତୁରେ ବାଦ ପଡିନାହାନ୍ତି ପଶୁ । ଉତ୍ତର ପ୍ରଦେଶର ଆଲିଗଡରେ ଦୁଇ ପୋଷା କୁକୁରଙ୍କ ବିବାହ ଅନୁଷ୍ଠିତ ହୋଇଛି । ପୋଷା କୁକୁର ଟମି ସହ ଜେଲିର ବିବାହ ଅନୁଷ୍ଠିତ ହୋଇଯାଇଛି । ବର ବେଶରେ ଟମି ସଜ ହୋଇଥିବା ଦେଖିବାକୁ ମିଳିଥିବା ବେଳେ କନ୍ୟା ବେଶରେ ସଜେଇ ହୋଇଥିଲା ଜେଲି । ଉଭୟଙ୍କ ବିବାହ ସରିବା ପରେ ନିଜ ମାଲିକ ଠାରୁ ବିଦାୟ ନେଇ ଟମି ଘରକୁ ଯାଇଥିଲା ଜେଲି ।
ବୈଦିକ ରୀତିନୀତି ଅନୁଯାୟୀ ଏହି ବିବାହ ହୋଇଥିବା ବେଳେ ଢୋଲର ତାଳେ ନାଚି ଉଠିଥିଲେ ବରଯାତ୍ରୀ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଭାଇରାଲ ହୋଇଥିବା ଭିଡିଓରେ ଦେଖିବାକୁ ମିଳିଛି ଯେ, ବିବାହ ପାଇଁ କନ୍ୟା ସାଜିଥିବା ଜେଲିର ଘର ପୁରା ଟେଣ୍ଟରେ ସାଜସଜ୍ଜା ହୋଇଛି । ସେଠାରେ ଉପସ୍ଥିତ ଥିବା ଜଣେ ବ୍ୟକ୍ତି ଢୋଲ ବଜାଉଥିବା ବେଳେ କିଛି ଯୁବତୀ ଡ୍ୟାନ୍ସ କରୁଛନ୍ତି । ଏହାପରେ ଜଣେ ବ୍ୟକ୍ତି ତଳେ ବସିଥିବା ବେଳେ ଟମି ଓ ଜେଲିକୁ ନିଜ ସାଇଡରେ ଧରିଛନ୍ତି । ଟମି ବେକରେ ନାଲି ରଙ୍ଗର ଫୁଲ ମାଳ ପିନ୍ଧିଥିବା ବେଳେ ଜେଲି ଏକ ଧଳା ମାଳ ପିନ୍ଧିବା ସହ ତାର ଉପରେ ଏକ ନାଲି ରଙ୍ଗର ଓଢଣୀ ପଡିଥିବା ଦେଖିବାକୁ ମିଳିଛି ।