ନୂଆଦିଲ୍ଲୀ: ହଜରତ ନିଜାମୁଦ୍ଦିନ ପୋଲିସ ଷ୍ଟେସନ ଅଞ୍ଚଳର ଜଙ୍ଗପୁରା ଅଞ୍ଚଳରେ ଥିବା ଏକ ଗହଣା ଶୋ’ରୁମକୁ ବ୍ୟାପକ ଗହଣା ଚୋରି ହୋଇଛି । ଗତକାଲି (ସୋମବାର) ରାତିରେ ଦୁର୍ବୃତ୍ତମାନେ ଶୋ’ ରୁମର କଂକ୍ରିଟ ଛାତ ଓ କାନ୍ଥ ଭାଙ୍ଗି ସୁନା ଗହଣା ଓ ଟଙ୍କା ନେଇଯାଇଛନ୍ତି । ଶୋ’ରୁମର କାନ୍ଥ ଓ କଂକ୍ରିଟ୍ ଛାତକୁ ଡ୍ରିଲ କିମ୍ବା ଅନ୍ୟ କୌଣସି ମେସିନରେ ଭଙ୍ଗା ଯାଇଛି । ଭିତରେ ଲାଗିଥିବା ସିସିଟିଭିକୁ ଭାଙ୍ଗିବା ପରେ ଦୁର୍ବୃତ୍ତମାନେ ଚୋରି କରି ଫେରାର ହୋଇଯାଇଛନ୍ତି । ଚୋରି ଗହଣା ସମେତ ପ୍ରାୟ 7 ରୁ 8 ଲକ୍ଷ ଟଙ୍କାର ନଗଦ ଟଙ୍କା ମିଶାଇ ପ୍ରାୟ 25 କୋଟି ଟଙ୍କାର ସାମଗ୍ରୀ ଚୋରି ହୋଇଥିବା ଶୋ’ ରୁମ କର୍ତ୍ତୃପକ୍ଷ ଅଭିଯୋଗ କରିଛନ୍ତି ।
ଗତକାଲି ରାତିରେ ଏହି ଚୋରି ହୋଇଥିବା ବେଳେ ଆଜି ସକାଳେ ଶୋ’ ରୁମ ମାଲିକ ପହଞ୍ଚିବା ପରେ ଜାଣିବାକୁ ପାଇଥିଲେ । ତୁରନ୍ତ ପୋଲିସକୁ ସୂଚନା ଦିଆଯାଇଥିଲା । ପୋଲିସ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଶୋ’ ରୁମର ସମସ୍ତ କର୍ମଚାରୀଙ୍କୁ ମଧ୍ଯ ଜେରା ପାଇଁ ପୋଲିସ ଡାକିଛି । ଶୋ’ ରୁମ ଭିତରେ ଲାଗିଥିବା ସମସ୍ତ ସିସିଟିଭି ଅଚଳ କରିଦେଇଛନ୍ତି ଦୁର୍ବୃତ୍ତ । ଶୋ’ରୁମର ଆଖପାଖ ସିସିଟିଭି ଯାଞ୍ଚ କରାଯାଉଛି । ଫୁଟେଜ ସଂଗ୍ରହ ପରେ କେତେ ସଂଖ୍ୟକ ଦୁର୍ବୃତ୍ତ ଏଥିରେ ସମ୍ପୃକ୍ତ ସେନେଇ ପୋଲିସ ସ୍ପଷ୍ଟ କରିବ । ସେହିପରି ଚୋରି ସାମଗ୍ରୀର ପରିମାଣ ସମ୍ପର୍କରେ ପୋଲିସ କିଛି କହିନଥିବା ବେଳେ ଶୋ’ ରୁମ ମାଲିକଙ୍କ ଅଭିଯୋଗ ଅନୁସାରେ, ସୁନା ଗହଣା ଓ ନଗଦ ଟଙ୍କାକୁ ମିଶାଇ ଏହି ରାଶି ପ୍ରାୟ 25 କୋଟି ପାଖାପାଖି ହେବ ।
ଦୋକାନ ମାଲିକ କହିଛନ୍ତି, ‘‘ଆମେ ରବିବାର ରାତିରେ ଶୋ’ ରୁମ ବନ୍ଦ କରି ଯାଇଥିଲୁ । ଆଜି (ମଙ୍ଗଳବାର) ସକାଳେ ଶୋ’ ରୁମ ଖୋଲିବା ପରେ ଦୋକାନରେ ଧୂଳି ଦେଖିବାକୁ ମିଳିଥିଲା । ପରେ ଆମେ ଜାଣିବାକୁ ପାଇଲୁ ଯେ କାନ୍ଥ ଓ ଛାତ କାଟି ଚୋରି ହୋଇଛି । ଗହଣା ଓ ଟଙ୍କା ମିଶାଇ 20-25 କୋଟି ଟଙ୍କା ମୂଲ୍ୟର ସାମଗ୍ରୀ ଚୋରି ହୋଇଛି । ଚୋରମାନେ ଶୋ’ ରୁମରେ ଲାଗିଥିବା ସବୁ ସିସିଟିଭି କ୍ୟାମେରାକୁ ମଧ୍ୟ ନଷ୍ଟ କରି ଦେଇଛନ୍ତି । ପୋଲିସରେ ଅଭିଯୋଗ କରିଛୁ ।’’