ନୂଆଦିଲ୍ଲୀ: ଦେଶର ନାଁ 'ଭାରତ'କୁ ନେଇ ରାଜନୀତି ହଟଚମଟ ଜାରି ରହିଥିବା ବେଳେ ଏହା ମଧ୍ୟରେ ଆଉ ଏକ ତଥ୍ୟ ସାମ୍ନାକୁ ଆସିଛି । ଏସିଆନ- ଇଣ୍ଡିଆ ଶିଖର ସମ୍ମିଳନୀରେ ଯୋଗ ଦେବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ଇଣ୍ଡୋନେସିଆ ଗସ୍ତ କରିବେ । ଏହାକୁ ନେଇ ବିଜେପି ରାଷ୍ଟ୍ରିୟ ମୁଖପାତ୍ର ସମ୍ୱିତ ପାତ୍ର ମଙ୍ଗଳବାର ଏକ ସରକାରୀ ତଥ୍ୟ ସାମ୍ନାକୁ ଆଣିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଇଣ୍ଡୋନେସିଆ ଗସ୍ତକୁ ନେଇ ଥିବା ନିମନ୍ତ୍ରଣ ପତ୍ରରେ "ପ୍ରାଇମ୍ ମିନିଷ୍ଟର ଅଫ୍ ଭାରତ" ଲେଖାଯାଇଥିବା ଦେଖାଇଛନ୍ତି ବିଜେପି ମୁଖପାତ୍ର ।
ତେବେ ପ୍ରଧାନମନ୍ତ୍ରୀ ମୋଦି ଆଜି(ବୁଧବାର) ରାତିରେ ଇଣ୍ଡୋନେସିଆ ଗସ୍ତ କରିବେ । 2 ଦିବସୀୟ ଏହି ଗସ୍ତରେ 20ତମ ଏସିଆନ-ଇଣ୍ଡିଆ ସମ୍ମିଳନୀ ଓ 18ତମ ପୂର୍ବ ଏସିଆ ଶିଖର ସମ୍ମିଳନୀରେ ଯୋଗ ଦେବାର କାର୍ଯ୍ୟକ୍ରମ ରହିଛି ।
ଅନ୍ୟପଟେ ଜି-20 ସମ୍ମିଳନୀ ରାଇସିନା ହିଲ୍ ରାତ୍ରିଭୋଜନ ନିମନ୍ତ୍ରଣ ପତ୍ରରେ "ପ୍ରେସିଡେଣ୍ଡ୍ ଅଫ୍ ଇଣ୍ଡିଆ" ବଦଳରେ "ପ୍ରେସିଡେଣ୍ଡ ଅଫ ଭାରତ" ଅର୍ଥାତ "ଭାରତର ରାଷ୍ଟ୍ରପତି" ଲେଖାଯାଇଥିଲା । ପୂର୍ବରୁ ସମସ୍ତ ସରକାରୀ ତଥ୍ୟ "ପ୍ରେସିଡେଣ୍ଡ ଅଫ ଇଣ୍ଡିଆ" ଲେଖାଯାଉଥିବା ବେଳେ ଏହି ପରିବର୍ତ୍ତନକୁ ନେଇ ରାଜନୀତି ଜୋର ଧରିଛି ।
ସେପ୍ଚେମ୍ୱର 9ରେ ଏହି ନିମନ୍ତ୍ରଣ ପତ୍ର ସାଧାରଣରେ ପ୍ରକାଶିତ ହେବା ପରେ ଚର୍ଚ୍ଚା ଜୋର ଧରିଥିଲା । ଦେଶର ନାଁ "ଇଣ୍ଡିଆ" ବଦଳରେ କେବଳ "ଭାରତ" ଲେଖାଯିବା ନେଇ ସରକାର ଯୋଜନା ପ୍ରସ୍ତୁତ କରୁଥିବା ଦାବି କରିଥିଲେ ବିରୋଧି ମେଣ୍ଟ । ବିରୋଧୀ ମେଣ୍ଟର ନାଁ "ଇଣ୍ଡିଆ" ରଖାଯିବା ଯୋଗୁ ଦେଶର ନାଁ ପରିବର୍ତ୍ତନ କରିବାକୁ ସରକାର ଏଭଳି ହୀନ ରାଜନୀତିକ ଚାଲ ଖେଳୁଥିବା ବିପକ୍ଷ ନେତା ଅଭିଯୋଗ ଆଣିଥିଲେ ।
ଆଉ ମଧ୍ୟ ପଢନ୍ତୁ...20th ASEAN summit: ଆଜି ଇଣ୍ଡୋନେସିଆ ଯିବେ ପ୍ରଧାନମନ୍ତ୍ରୀ, ଦିନିକିଆ ଗସ୍ତ ଉପରେ ସଭିଙ୍କ ନଜର
ଅନ୍ୟପଟେ ବିପକ୍ଷ ନେତାଙ୍କ ଅଭିଯୋଗକୁ ଖଣ୍ଡନ କରିଥିଲା ସରକାରୀ ଦଳ । ଦେଶର ନାଁ ଇଣ୍ଡିଆ ବ୍ରିଟିଶ ଶାସନ ସମୟରେ ରଖାଯାଇଥିବା ବେଳେ ଏହା ଇଂରାଜୀ ଶବ୍ଦ ଅଟେ ଓ ଏଥିରେ ପରିବର୍ତ୍ତନର ଆବଶ୍ୟକତା ରହିଛି ବୋଲି ଶାସକ ଦଳ ଯୁକ୍ତି ରଖିଥିଲା ।
ତେବେ ସେପ୍ଚେମ୍ୱର 18ରେ ସଂସଦରେ ବସିବାକୁ ଯାଉଛି ସ୍ୱତନ୍ତ୍ର ଅଧିବେଶନ । ପାଞ୍ଚ ଦିନ ଧରି ବସିବାକୁ ଯାଉଥିବା ଏହି ଅଧିବେଶନରେ ଦେଶର ନାଁ ନେଇ ଗୁରୁତ୍ୱପୂର୍ଣ୍ଣ ନିଷ୍ପତି ନିଆଯାଇପାରେ । ସମ୍ୱିଧାନ ପ୍ରଥମ ଧାରାରେ ପରିବର୍ତ୍ତନ ହୋଇପାରେ । ଦେଶର ନାଁ ଇଣ୍ଡିଆ ନୁହେଁ କେବଳ ଭାରତ ଲେଖାଯିବା ନେଇ ଆଲୋଚନା ହୋଇପାରେ ବୋଲି ଚର୍ଚ୍ଚା ଜୋର ଧରିଛି ।
