ହାଇଦ୍ରାବାଦ: ଭାରତ ପାଇଁ କ୍ରିକେଟ୍ ମୈଦାନରେ ଲଢ଼ୁଥିବା ଭାରତୀୟ ଦଳର ପୂର୍ବତନ ଅଧିନାୟକ ମହମ୍ମଦ ଆଝାରୁଦ୍ଦିନ ଏଥର ତେଲଙ୍ଗାନା ନିର୍ବାଚନ ମୈଦାନରେ ଲଢ଼ୁଛନ୍ତି । ତେଲଙ୍ଗାନାର ଜୁବଲି ହିଲ୍ସ ନିର୍ବାଚନ ମଣ୍ଡଳୀରୁ କଂଗ୍ରେସ ଟିକେଟରେ ଲଢ଼ୁଛନ୍ତି ଆଝାରୁଦ୍ଦିନ । ତେବେ ସେ ଏହି ନିର୍ବାଚନରେ ବିଜୟୀ ନେଇ ବେଶ ଆଶ୍ବସ୍ତ ନଜର ଆସିଛନ୍ତି । ଜୁବଲି ହିଲ୍ସରେ ଭୋଟରଙ୍କ ନିକଟରୁ ସକାରାତ୍ମକ ପ୍ରତିକ୍ରିୟା ମିଳୁଥିବା ସେ କହିଛନ୍ତି ।
୧୯୯୨, ୧୯୯୬ ଏବଂ ୧୯୯୯ ଦିନିକିଆ ବିଶ୍ବକପ୍ରେ ଭାରତର ନେତୃତ୍ବ ନେଇଥିବା ଆଝାରୁଦ୍ଦିନ ଇଟିଭି ଭାରତ ସହ ଏକ ସ୍ବତନ୍ତ୍ର ସାକ୍ଷାତକାରରେ କହିଛନ୍ତି, "ମୁଁ ମୋର ବିଜୟକୁ ନେଇ ବହୁତ ଆଶ୍ବସ୍ତ ଅଛି । ବାସ୍ତବରେ ଏହା ମୋ ପାଇଁ ଏକ ନୂଆ ପ୍ରତିଯୋଗିତା ନୁହେଁ । ମୁଁ ପୂର୍ବରୁ ମଧ୍ୟ ନିର୍ବାଚନରେ ପ୍ରତିଦ୍ବନ୍ଦ୍ବିତା କରିଛି । କିନ୍ତୁ ମୁଁ ଭାବୁଛି ଏହା ମୋ ପାଇଁ ସ୍ବତନ୍ତ୍ର, କାରଣ ଏହା ମୋର ନିଜ ଘରୋଇ ସହର, ଲୋକମାନେ ମୋତେ ଏଠାରେ ଭଲ ପାଆନ୍ତି । ଜୁବଲି ହିଲ୍ସରେ ଲୋକମାନଙ୍କଠାରୁ ମିଳୁଥିବା ପ୍ରତିକ୍ରିୟା ବେଶ ସକାରାତ୍ମକ ଅଛି । ମୋର ନିର୍ବାଚନମଣ୍ଡଳୀ ଉତ୍କୃଷ୍ଟ, ଲୋକମାନେ ବହୁତ ଭଲ । ସେମାନେ ବିକାଶ ଚାହୁଁଛନ୍ତି । ମୁଁ ବହୁତ ଖୁସି ଏବଂ ମୋତେ ମିଳୁଥିବା ପ୍ରଶଂସା ଗୁଡ଼ିକୁ ମୁଁ ଉପଭୋଗ କରୁଛି ।
୬୦ ବର୍ଷୀୟ ମହମ୍ମଦ ଅଜହରୁଦ୍ଦିନ ମଧ୍ୟ ହାଇଦ୍ରାବାଦର ୟୁସୁଫଗୁଡା ଠାରେ ଏକ ପଦଯାତ୍ରା ଅଭିଯାନ କରି ଭୋଟରଙ୍କୁ ନିଜ ପାଇଁ ଭୋଟ୍ ଭିକ୍ଷା କରିଥିଲେ । ଉତ୍ତରପ୍ରଦେଶ ମୁରାଦାବାଦର ପୂର୍ବତନ ସାଂସଦ ଥିବା ଅଝାରୁଦ୍ଦିନଙ୍କ ବିଶ୍ବାସ ଅଛି ଯେ ଏଥର ତେଲେଙ୍ଗାନାରେ କଂଗ୍ରେସ ସରକାର ଗଠନ କରିବ । ଏହି ଅବସରରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଏବଂ ତାଙ୍କ ପାର୍ଟି ବିଆର୍ଏସ୍କୁ କଟାକ୍ଷ କରିଛନ୍ତି ଆଝାରୁଦ୍ଦିନ । ଗତ ୯ ବର୍ଷରେ ତେଲେଙ୍ଗାନାରେ କୌଣସି ବିକାଶ ହୋଇନଥିବା ସେ କହିଛନ୍ତି ।