ହାଇଦ୍ରାବାଦ:ତେଲେଙ୍ଗାନା ଜୁବିଲି ହିଲ୍ସ ନିକଟରେ ନାବାଳିକାଙ୍କୁ ମର୍ସିଡିଜ୍ କାର ମଧ୍ୟରେ ଗଣଦୁଷ୍କର୍ମ ଘଟଣା (Hyderabad teen rape case) । ସିଟି ପୋଲିସ ଘଟଣାରେ ରବିବାର ଆଉ ଜଣେ ଅଭିଯୁକ୍ତକୁ ଗିରଫ କରିବା ପରେ ତେଲଙ୍ଗାନା ରାଜ୍ୟପାଳ ତାମିଲିସାଇ ସୌନ୍ଦରାରାଜନ ଘଟଣାର ସବିଶେଷ ରିପୋର୍ଟ ଦେବା ପାଇଁ ନିର୍ଦ୍ଦେଶ ଦେଇଛନ୍ତି । ତେବେ ୨ ଦିନ ମଧ୍ୟରେ ଏହି ରିପୋର୍ଟ ଦେବା ପାଇଁ ସେ ମୁଖ୍ୟ ଶାସନ ସଚିବ ଓ ପୋଲିସ ମହାନିର୍ଦ୍ଦେଶକଙ୍କୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି ।
ଘଟଣାରେ ପୋଲିସ ଜଣେ ଯୁବକ ଓ ୩ ଜଣ ନାବାଳକ ଅଭିଯୁକ୍ତଙ୍କୁ ଗିରଫ କରିଛି । ପୋଲିସ ଅନ୍ୟ ଅଭିଯୁକ୍ତଙ୍କୁ ଗିରଫ କରିବା ପାଇଁ ଉଦ୍ୟମ ଜାରି ରଖିଥିବା ଡିସିପି ଜୁଏଲ ଡେଭିସ କହିଛନ୍ତି । ଏହି ଘଟଣାକୁ ଦୃଢ ନିନ୍ଦା କରିଛନ୍ତି ରାଜ୍ୟପାଳ ତାମିଲିସାଇ । ଘଟଣାର ସବିଶେଷ ରିପୋର୍ଟ ଦେବା ପାଇଁ ସେ ପ୍ରେସମିଟ ମାଧ୍ୟମରେ ନିର୍ଦ୍ଦେଶ ଦେଇଛନ୍ତି । ଏହି ନିନ୍ଦନୀୟ ଘଟଣା ଘଟିବା ପରେ ରାଜ୍ୟ ସରକାରଙ୍କୁ ବିରୋଧୀ ମାନେ ଟାର୍ଗେଟ କରିଛନ୍ତି । ଏହି ଘଟଣାରେ ଜଣେ ବିଧାୟକଙ୍କ ପୁଅ ସାମିଲ ଥିବା ବିରୋଧୀ ଅଭିଯୋଗ ଆଣିଛନ୍ତି ।