ନୂଆଦିଲ୍ଲୀ: ପ୍ରଫେଟ ମହମ୍ମଦଙ୍କ ବିରୁଦ୍ଧରେ ବିବାଦୀୟ ବୟାନକୁ ନେଇ ଦେଶରେ ଦିନକୁ ଦିନ ପ୍ରତିବାଦ ତୀବ୍ର ହେବାରେ ଲାଗିଛି । ପଥର ,ନିଆଁ ଧରି ରାଜରାସ୍ତାକୁ ଓହ୍ଲାଉଛନ୍ତି ବିକ୍ଷୋଭକାରୀ । ଦିଲ୍ଲୀ, କୋଲକାତା, ପଞ୍ଜାବ, ଉତ୍ତରପ୍ରଦେଶ, କର୍ଣ୍ଣାଟକ, ରାଞ୍ଚିରେ ତୀବ୍ର ଉତ୍ତେଜନା ଦେଖାଯାଇଛି ।
ପ୍ରଫେଟ ମହମ୍ମଦଙ୍କ ବିଷୟରେ ଭାରତୀୟ ଜନତା ପାର୍ଟିର ନିଲମ୍ବିତ ମୁଖପାତ୍ରଙ୍କ ମନ୍ତବ୍ୟ ଯୋଗୁଁ ପ୍ରତିବାଦ ବ୍ୟାପକ ହେଉଥିବା ବେଳେ ଟ୍ବିଟ ଯୋଗେ ନିଜ ମନ୍ତବ୍ୟ ରଖିଛନ୍ତି ବାଂଲାଦେଶୀ ଲେଖିକା ତସ୍ଲିମା ନସରିନ । ସେ କହିଛନ୍ତି ଯେ,"ଆଜି ଯଦି ପ୍ରଫେଟ୍ ମହମ୍ମଦ୍ ବଞ୍ଚି ଥାଆନ୍ତେ ସେ ମଧ୍ୟ ମୁସଲମାନଙ୍କର ନିର୍ବୋଧତା ଦେଖି ଆଶ୍ଚର୍ଯ୍ୟ ହୋଇଯାଇଥାନ୍ତେ ।" ନୂପୁରଙ୍କୁ ବିରୋଧ କରି ହଜାର ହଜାର ସଂଖ୍ୟାରେ ଲୋକେ ପ୍ରତିବାଦ କରି ତାଙ୍କର ଗିରଫଦାରୀ ପାଇଁ ଦାବି କରିଛନ୍ତି । ନୂପୁର ଶର୍ମାଙ୍କୁ ଗିରଫ କରି ଆବଶ୍ୟକ ହେଲେ ମୃତ୍ୟୁଦଣ୍ଡ ଦିଆଯାଉବୋଲି ପ୍ରତିବାଦକାରୀ ଦାବି କରିଛନ୍ତି ।