ହାଇଦ୍ରାବାଦ: ଆଫଗାନିସ୍ତାନରେ ସୀମା ଲଘିଂଛି ତାଲିବାନ ଆତଙ୍କବାଦୀଙ୍କ ବର୍ବରତା । ତାଲିବାନଙ୍କ ଆତଙ୍କୀରାଜର ଛାତିଥରା ଦୃଶ୍ୟକୁ ଦେଖୁଛନ୍ତି ବିଶ୍ବର କୋଣ ଅନୁକୋଣରେ ଥିବା ଲୋକେ । ମହିଳାଙ୍କ ପ୍ରତି ଆତଙ୍କବାଦୀଙ୍କ ଅତ୍ୟାଚାରକୁ ମଧ୍ୟ ଦେଖୁଛି ସାରା ଦେଶ । ତାଲିବାନଙ୍କ ଭୟରେ ଦୀର୍ଘ ୨୦ ବର୍ଷ ପରେ ପୁଣି ଆଫଗାନିସ୍ତାନରେ ଜଳୁଛି ଛାତ୍ରୀଙ୍କ ସ୍କୁଲ ରେକର୍ଡ । ଆଫଗାନିସ୍ତାନରେ ଛାତ୍ରୀଙ୍କ ପାଠପଢା ପାଇଁ ରହିଛି ଏକ ଅନୁଷ୍ଠାନ SOLA । ଏହି ବିଦ୍ୟାଳୟର ସହ-ପ୍ରତିଷ୍ଠାତା ତଥା ସଭାପତି ଶବନା ବସିଜ-ରଶିଖ, ବର୍ତ୍ତମାନ ନିଜ ଛାତ୍ରୀ ଓ ସେମାନଙ୍କ ପରିବାରବର୍ଗଙ୍କୁ ସୁରକ୍ଷିତ ରଖିବା ପାଇଁ ଜଳାଇଛନ୍ତି ଛାତ୍ରୀଙ୍କ ରେକର୍ଡ । ଆଉ ଏ ସମ୍ପର୍କରେ ଟ୍ବିଟ କରି ସେ ସୂଚନା ଦେଇଛନ୍ତି ।
ଆଫଗାନିସ୍ତାନର ମହିଳାଙ୍କ ଶିକ୍ଷା ଗ୍ରହଣକୁ ବିରୋଧ କରେ ତାଲିବାନ । ତାଲିବାନ ଶାସନର ନିୟମାବଳୀ ମଧ୍ୟରେ ସବୁଠୁ ଅଧିକ ଅତ୍ୟାଚାର ସହିଥାନ୍ତି ମହିଳା । ସେମାନଙ୍କ ସ୍ବାଧୀନତାକୁ ଛଡ଼ାଇ ନେଇଥାଏ ଏହି ତାଲିବାନ ଆଇନ । ମହିଳାଙ୍କ ବିଦ୍ୟମାନକୁ ତାଲିବାନ ଅଣଦେଖା କରିବା ସହିତ ସେମାନଙ୍କ ପ୍ରତି କରିଆସିଥିଲା ଅତ୍ୟାଚାର । ତେବେ ଦୀର୍ଘ ୨୦ ବର୍ଷର ଲଢେଇ ପରେ ପୁଣି ଆଫଗାନିସ୍ତାନକୁ ନିଜ ଅକ୍ତିଆରକୁ ନେଇଛି ତାଲିବାନ । ତେବେ ପୂର୍ବରୁ ମହିଳାଙ୍କ ପାଠପଢାକୁ ଅନୁମତି ଦେଉନଥିବା ତାଲିବାନ ସେମାନଙ୍କ ଶିକ୍ଷାଗତ ଯୋଗ୍ୟତାର ସମସ୍ତ ରେକର୍ଡକୁ ପୋଡ଼ି ଦେଉଥିଲା । ତେବେ ଏହି ଛାତ୍ରୀଙ୍କ ମଧ୍ୟରେ ରହିଥିଲେ SOLAର ସଭାପତି ଶବନା ।