ନୂଆଦିଲ୍ଲୀ:ବିଜ୍ଞାପନରେ ମାତ୍ରାଧିକ ଖର୍ଚ୍ଚ କରୁଛନ୍ତି ଦିଲ୍ଲୀ ସରକାର । ହେଲେ RRTS ପ୍ରକଳ୍ପ ପାଇଁ ବଜେଟର ସୀମିତତା ଦର୍ଶାଇ ଅର୍ଥ ବରାଦ କରୁନାହାନ୍ତି । ସୁପ୍ରିମକୋର୍ଟ ଏହି ସମ୍ପର୍କିତ ଏକ ମାମଲାରେ ଗତ 3 ଆର୍ଥିକ ବର୍ଷରେ ଦିଲ୍ଲୀରେ ବିଜ୍ଞାପନ ବାବଦରେ କେତେ ଖର୍ଚ୍ଚ କରାଯାଇଛି ସେନେଇ ତଥ୍ୟ ମାଗିଛନ୍ତି । ଦୁଇ ସପ୍ତାହ ମଧ୍ୟରେ ବର୍ଷ 2020ରୁ ଚଳିତ ବର୍ଷ ପର୍ଯ୍ୟନ୍ତ ମୋଟ ବିଜ୍ଞାପନ ସମ୍ପର୍କିତ ଖର୍ଚ୍ଚ ରାଶି ସତ୍ୟପାଠ ମାଧ୍ୟମରେ କୋର୍ଟକୁ ଅବଗତ କରିବା ପାଇଁ ଦିଲ୍ଲୀ ସରକାରଙ୍କୁ ନିର୍ଦ୍ଦେଶ ମିଳିଛି ।
ଜଷ୍ଟିସ ଏସକେ କୌଲ ଓ ଜଷ୍ଟିସ ସୁଧାଂଶୁ ଧୁଲିଆଙ୍କୁ ନେଇ ଗଠିତ ଦୁଇ ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ । ଦିଲ୍ଲୀ ସରକାର ବଜେଟରେ ସୀମିତତା ଦର୍ଶାଇ କ୍ଷେତ୍ରୀୟ ତ୍ବରିତ ପରିବହନ ପ୍ରଣାଳୀ(RRTS Project) ପାଇଁ ଖର୍ଚ୍ଚ ବରାଦ କରୁନାହାନ୍ତି । ହେଲେ କେବଳ ବିଜ୍ଞାପନ ବାବଦରେ ଆବଶ୍ୟକତାଠାରୁ ଅଧିକ ଖର୍ଚ୍ଚ କରାଯାଉଥବା ଅଭିଯୋଗକୁ କୋର୍ଟ ଗମ୍ଭୀରତାର ସହ ନେଇଛନ୍ତି । 2020ରୁ ଚଳିତ ବର୍ଷ ପର୍ଯ୍ୟନ୍ତ ଦିଲ୍ଲୀ ସରକାର ବିଜ୍ଞାପନ ବାବଦକୁ ମୋଟ କେତେ ଖର୍ଚ୍ଚ କରିଛନ୍ତି ସେ ନେଇ ଖଣ୍ଡପୀଠ ତଥ୍ୟ ମାଗିଛନ୍ତି । ଆପଣଙ୍କ ପାଖରେ ବିଜ୍ଞାପନ ପାଇଁ ପାଣ୍ଠି ଅଛି ହେଲେ RRTS ପ୍ରକଳ୍ପ ପାଇଁ ନାହିଁ ବୋଲି କୋର୍ଟ ସରକାରଙ୍କୁ ପ୍ରଶ୍ନ କରିଛନ୍ତି ।