ନୂଆଦିଲ୍ଲୀ: ଦେଶଦ୍ରୋହ ଆଇନ୍ ଉପରେ ରୋକ ଲଗାଇଛନ୍ତି ସୁପ୍ରିମକୋର୍ଟ। ଆଉ ବ୍ୟବହାର ହୋଇପାରିବନି ଏହି ଆଇନ୍। ପୁନଃର୍ବିଚାର ଯାଏ ଦେଶଦ୍ରୋହ ଆଇନ୍ ତଥା ଆଇପିସିର ୧୨୪(କ) ଜରିଆରେ କୌଣସି ନୂଆ ମାମଲା ରୁଜୁ ମଧ୍ୟ କରାଯିବ ନାହିଁ ବୋଲି ଆଜି (ବୁଧବାର) ଏହି ମାମଲାରେ ଶୁଣାଣି କରି ସୁପ୍ରିମକୋର୍ଟ କହିଛନ୍ତି । ଏଥି ସହିତ ବିଚାରାଧୀନ ମାମଲାଗୁଡ଼ିକରେ ସ୍ଥିତାବସ୍ଥା ବଜାୟ ରଖାଯିବ ବୋଲି କହିଛନ୍ତି ସର୍ବୋଚ୍ଚ ନ୍ୟାୟାଳୟ । କେନ୍ଦ୍ର ଦେଶଦ୍ରୋହ ଆଇନ ଉପରେ ପୁନଃର୍ବିଚାର ନକରିବା ଯାଏଁ ଆଇନ ଉପରେ ରୋକ ଲଗାଇଛନ୍ତି ଏସସି ।
ଯେଉଁମାନେ ଦେଶଦ୍ରୋହ ଅଭିଯୋଗରେ ବିଚାରଧୀନ ଅଛନ୍ତି ସେମାନେ ଉପଯୁକ୍ତ କୋର୍ଟରେ ଜାମିନ ଆବେଦନ କରିପାରିବେ ବୋଲି ସର୍ବୋଚ୍ଚ ଅଦାଲତ କହିଛନ୍ତି । ଏହି ଆଇନ ଉପରେ କେନ୍ଦ୍ର ସରକାର ପୁନଃର୍ବିଚାର କରିବେ ବୋଲି ଚିଫ ଜଷ୍ଟିସ୍ କହିଛନ୍ତି । ଆସନ୍ତା ଜୁଲାଇ ତୃତୀୟ ସପ୍ତାହରେ ଏହି ମାମଲାର ପରବର୍ତ୍ତୀ ଶୁଣାଣି ହେବ । ବୁଧବାର ସୁପ୍ରିମକୋର୍ଟରେ ଦେଶଦ୍ରୋହ ଆଇନ୍ର ସମ୍ବିଧାନିକ ବୈଧତାକୁ ଚ୍ୟାଲେଞ୍ଜ ଦେବା ମାମଲାର ଶୁଣାଣି କରିଥିଲେ ।