ଭୁବନେଶ୍ବର: ବାଲେଶ୍ବର ଚାନ୍ଦିପୁରସ୍ଥିତ କ୍ଷେପଣାସ୍ତ୍ର ଘାଟିରୁ ସଫଳତାର ସହ ପରୀକ୍ଷା ହେଲା ଏୟାର ମିସାଇଲ ଭର୍ଟିକାଲ୍ ଲଞ୍ଚ ସର୍ଟ ରେଞ୍ଜ ସର୍ଫେସ (Vertical Launch Short Range Surface to Air Missile ) VL-SRSAM ମିସାଇଲ । ପ୍ରତିରକ୍ଷା ଅନୁସନ୍ଧାନ ଏବଂ ବିକାଶ ସଂଗଠନ (DRDO) ଦ୍ବାରା ଏହି ପରୀକ୍ଷଣ ସଫଳତାର ସହ ଶେଷ ହୋଇଥିବା ସରକାରୀ ଭାବେ ଘୋଷଣା କରାଯାଇଛି । ଏହି ମିଶାଇଲର ଲକ୍ଷ୍ୟଭେଦ କ୍ଷମତା 15 କିମି ରହିଛି ।
ଏହି ମିସାଇଲକୁ ଭାରତୀୟ ନୌସେନାରେ ସାମିଲ କରାଯିବା ନେଇ ଲକ୍ଷ୍ୟ ରଖାଯାଇଛି । ଭାରତୀୟ ନୌସେନା ଯୁଦ୍ଧ ଜାହାଜରୁ ମିସାଇଲକୁ ଭର୍ଟିକାଲ୍ ଲଞ୍ଚର୍ ୟୁନିଟ ମାଧ୍ୟମରେ ଭବିଷ୍ୟତରେ ଅତି ସହଜରେ ଉତକ୍ଷେପଣ ମଧ୍ୟ କରାଯାଇ ପାରିବ ।
ମଙ୍ଗଳବାର ଚାନ୍ଦିପୁରରେ ଏହି ପରୀକ୍ଷଣକୁ DRDO ର ବୈଜ୍ଞାନିକ ଏବଂ ଭାରତୀୟ ନୌସେନାର ବରିଷ୍ଠ ଅଧିକାରୀମାନେ ପରିଚାଳନା କରିଥିଲେ । ଏହାର ପ୍ରଥମ ପର୍ଯ୍ୟାୟ ପରୀକ୍ଷଣ 2021 ମସିହା 22 ଫେବୃଆରୀରେ ସଫଳତାର ସହ କରାଯାଇଥିଲା ।
ଏହି ପରୀକ୍ଷଣ ସଫଳ ହେବାପରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ DRDO ବୈଜ୍ଞାନିକ ଓ ଭାରତୀୟ ନୌସେନାକୁ ଅଭିନନ୍ଦନ ଜଣାଇଛନ୍ତି । ପ୍ରତିରକ୍ଷା ମନ୍ତ୍ରୀ କହିଛନ୍ତି, ଏହି ଅତ୍ୟାଧୁନିକ ବାୟୁ ଯୁଦ୍ଧାସ୍ତ୍ର ଭାରତୀୟ ନୈସେନାର ଜାହାଜର ପ୍ରତିରକ୍ଷା କ୍ଷମତାକୁ ଆହୁରି ଶକ୍ତିଶାଳୀ କରିବ । ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ସଫଳ ପରୀକ୍ଷଣ ନେଇ DRDOକୁ ଟ୍ବିଟ କରି ଧନ୍ୟବାଦ ଜଣାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
