ଲକ୍ଷ୍ନୌ: ପୁଣି ଥରେ ସନାତନ ଧର୍ମ ବିରୋଧୀ ମନ୍ତବ୍ୟ ପାଇଁ ବିବାଦ ଘେରକୁ ଆସିଛନ୍ତି ସାମାଜବାଦୀ ପାର୍ଟିର ବରିଷ୍ଠ ନେତା ସ୍ବାମୀ ପ୍ରସାଦ ମୌର୍ଯ୍ୟ । ଦୀପାବଳି ଅବସରରେ ସେ ନିଜର ପତ୍ନୀଙ୍କୁ ପୂଜା କରିବା ସହ ଧନଦାତ୍ରୀ ମା’ ଲକ୍ଷ୍ମୀଙ୍କ ଅସ୍ଥିତ୍ବ ଓ ସ୍ବରୂପକୁ ନେଇ କଟାକ୍ଷ କରିଛନ୍ତି । ଟ୍ବିଟରେ ଏପରି କଟାକ୍ଷପୂର୍ଣ୍ଣ କ୍ୟାପସନ ଲେଖି ସେ ଲକ୍ଷ୍ମୀଙ୍କ ଅସ୍ଥିତ୍ବ ଉପରେ ପ୍ରଶ୍ନ ଉଠାଇଛନ୍ତି ସ୍ବାମୀ ପ୍ରସାଦ । ଯାହାକୁ ନେଇ ବିବାଦ ଆରମ୍ଭ ହୋଇଛି ।
ସ୍ବାମୀ କରିଥିବା ଟ୍ବିଟରେ ନିଜ ପତ୍ନୀଙ୍କ ପୂଜା କରୁଥିବା ଫଟୋ ପୋଷ୍ଟ କରିବା ସହ କ୍ୟାପସନରେ ଲେଖିଛନ୍ତି, ‘‘ବିଶ୍ବରେ ଜନ୍ମଗ୍ରହଣ କରିଥିବା ପ୍ରତ୍ୟେକ ଧର୍ମ, ଜାତି, ରଙ୍ଗ ଓ ଦେଶରେ ଜନ୍ମିତ ଶିଶୁର ଦୁଇଟି ହାତ, ଦୁଇ ଗୋଡ, ଦୁଇ କାନ, ଦୁଇଟି ଆଖି, ଗୋଟିଏ ନାକ, ଗୋଟିଏ ମୁଣ୍ଡ, ପେଟ ଓ ପିଠି ଥାଏ । ଯଦି ଚାରି ହାତ, ଆଠ ହାତ, 10 ହାତ, 20 ହାତ ଏବଂ ଏକ ହଜାର ହାତ ଥିବା ଶିଶୁ ଆଜି ପର୍ଯ୍ୟନ୍ତ ଜନ୍ମ ହୋଇନାହିଁ, ତେବେ ଲକ୍ଷ୍ମୀ କିପରି ଚାରି ହାତ ସହ ଜନ୍ମ ହୋଇପାରିବେ ? ଯଦି ତୁମେ ଦେବୀ ଲକ୍ଷ୍ମୀଙ୍କୁ ପୂଜା କରିବାକୁ ଚାହୁଁଛ, ତେବେ ତୁମର ପତ୍ନୀଙ୍କୁ ପୂଜା ଓ ସମ୍ମାନ କର । ଯିଏ ପ୍ରକୃତ ଅର୍ଥରେ ଦେବୀ । କାରଣ ସେ ହିଁ ତୁମର ପରିବାରର ପୋଷଣ, ସୁଖ, ସମୃଦ୍ଧତା ଓ ଯତ୍ନର ଦାୟିତ୍ବ ପୂରଣ କରନ୍ତି । ’’
ସ୍ବାମୀ ପ୍ରସାଦଙ୍କ ଏବି ବୟାନ ପରେ ତାଙ୍କୁ ବିଭିନ୍ନ ଆଡୁ ସମାଲୋଚନାର ଶିକାର ହେବାକୁ ପଡିଛି । ତାଙ୍କୁ କଡା ଜବାବ ଦେଇଛନ୍ତି କଂଗ୍ରେସର ରାଷ୍ଟ୍ରୀୟ ପ୍ରବକ୍ତା ଆଚାର୍ଯ୍ୟ ପ୍ରମୋଦ କୃଷ୍ଣମ । ଆଚାର୍ଯ୍ୟ କହିଛନ୍ତି,‘‘ ମୌର୍ଯ୍ୟଙ୍କ ଅସୁସ୍ଥତା ଅତି ଗୁରୁତର ଶ୍ରେଣୀର, ଚିକିତ୍ସାର ଆବଶ୍ୟକତା ରହିଛି । ମୁଁ ତାଙ୍କ କଥା ଉପରେ ପ୍ରତିବନ୍ଧକ ଲଗାଇବାକୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ନିବେଦନ କରୁଛି ।’’