ଚର୍ଚ୍ଚାରେ ପଡିଲା ପୂର୍ଣ୍ଣଚ୍ଛେଦ, ଅଧ୍ୟକ୍ଷା ପଦ ବଜାୟ ରଖିବେ ସୋନିଆ

କଂଗ୍ରେସ ହାଇକମାଣ୍ଡ ପରିବର୍ତ୍ତନ ଚର୍ଚ୍ଚାରେ ପଡିଲା ପୂର୍ଣ୍ଣଚ୍ଛେଦ। ଇସ୍ତଫା ଦେବେ ନାହିଁ ସୋନିଆ । କେନ୍ଦ୍ରୀୟ କାର୍ଯ୍ୟକାରିଣୀ ବୈଠକ ପରେ ନିଷ୍ପତ୍ତି ନେଇ ସୂଚନା । 5 ରାଜ୍ୟର ଫଳାଫଳ ପରେ ଲାଗି ରହିଥିଲା ଇସ୍ତଫା ଚର୍ଚ୍ଚା । ଅଧିକ ପଡନ୍ତୁ

ନୂଆଦିଲ୍ଲୀ: 5 ରାଜ୍ୟରେ କଂଗ୍ରେସର ଶୋଚନୀୟ ପରାଜୟ ପରେ କଂଗ୍ରେସ ହାଇକମାଣ୍ଡ ପରିବର୍ତ୍ତନ ନେଇ ଲାଗି ରହିଥିବା ଚର୍ଚ୍ଚାରେ ପଡିଛି ପୂର୍ଣ୍ଣଚ୍ଛେଦ । ଆଜି ଦଳର କେନ୍ଦ୍ରୀୟ କାର୍ଯ୍ୟକାରିଣୀ ବୈଠକ ଶେଷ ହେବା ପରେ ବର୍ତ୍ତମାନର ଅନ୍ତରୀଣା ଅଧ୍ୟକ୍ଷା ଭାବେ ଦାୟିତ୍ବ ତୁଲାଉଥିବା ସୋନିଆ ଗାନ୍ଧୀ ହିଁ ଦଳକୁ ଆଗାମୀ ନେତୃତ୍ବ ଦେବା ନେଇ ସ୍ପଷ୍ଟ ହୋଇଛି । ଗତକାଲି ଠାରୁ ଏକାଧିକ ଜାତୀୟ ଗଣମାଧ୍ୟମରେ ସୋନିଆଙ୍କ ଇସ୍ତଫା ସହ କଂଗ୍ରେସକୁ ନୂଆ ମୂଖ୍ୟ ମିଳିବା ନେଇ ଲଗାତାର ଚର୍ଚ୍ଚା ହୋଇ ଆସୁଥିଲା, ଯାହାର ଆଜି ଅବସାନ ଘଟିଛି ।

ଆଜି ଅପରାହ୍ନରେ ବସିଥିବା କଂଗ୍ରେସ କେନ୍ଦ୍ରୀୟ କାର୍ଯ୍ୟକାରିଣୀ ବୈଠକରେ ପ୍ରାୟ 4 ଘଣ୍ଟା ଧରି ଆଲୋଚନା ହୋଇଥିଲା । ତେବେ ବୈଠକ ସରିବା ପରେ ହାଇକମାଣ୍ଡ ବଦଳିବା ପ୍ରଶ୍ନରେ ଉତ୍ତର ଦେଇ ଦଳର ବରିଷ୍ଠ ନେତା ମଲ୍ଲିକାର୍ଜୁନ ଖାଡ୍ଗେ କହିଛନ୍ତି, ସୋନିଆ ଦଳ ମୁଖ୍ୟ ଭାବେ ଦାୟିତ୍ବ ବଜାୟ ରଖିବା ସହ ଆଗାମୀ କାର୍ଯ୍ୟପନ୍ଥା ନିର୍ଦ୍ଧାରଣ କରିବେ । ତାଙ୍କ ନେତୃତ୍ବ ଉପରେ ସମସ୍ତ ସଦସ୍ୟଙ୍କ ଭରସା ଥିବା ମଧ୍ୟ କହିଛନ୍ତି ଖାଡ୍ଗେ ।

ବ୍ୟୁରୋ ରିପୋର୍ଟ, ଇଟିଭି ଭାରତ